استانادا باستاۋىش سىنىپ مۇعالىمدەرى اراسىندا «زياتكەر ۇستاز» رەسپۋبليكالىق شاحمات ءتۋرنيرى ءوتتى. قازاقستاننىڭ 20 وڭىرىنەن 130-دان استام پەداگوگ 2 ملن تەڭگە جۇلدە قورى ءۇشىن باق سىناستى.
قازاقستان شاحمات فەدەراتسياسى ۇيىمداستىرعان بۇل تۋرنير پەداگوگتەردى قولداۋعا, ولاردىڭ كاسىبي ءارى ينتەللەكتۋالدى دامۋىن ىنتالاندىرۋعا, سونداي-اق قوعامداعى ءرولىن كۇشەيتۋگە باعىتتالعان.
قازاقستان شاحمات فەدەراتسياسىنىڭ ءبىرىنشى ۆيتسە-پرەزيدەنتى دارمەن سادۋاكاسوۆ تۋرنير جوعارى دەڭگەيدە وتكەنىن جەتكىزدى.
«بۇل تەك جارىس ەمەس, شاحماتقا دەگەن سۇيىسپەنشىلىك پەن پەداگوگيكالىق ميسسيا ۇيلەسىم تاپقان ەرەكشە تۋرنير. سايىس باستاۋىش سىنىپ مۇعالىمدەرىنىڭ ينتەللەكتۋالدى الەۋەتىن ارتتىرىپ, بالالاردىڭ نەگىزگى ءبىلىم مەن داعدىلارىن قالىپتاستىرۋداعى ۇستازداردىڭ بىلىكتىلىگىن ايقىندايدى», دەدى د.سادۋاقاسوۆ.
ينتەللەكتۋالدى سايىستا كەنجەعاليەۆا گۇلبارشىن (اتىراۋ وبلىسى, قۇرمانعازى اۋدانى, نۇرجاۋ جالپى ورتا مەكتەبى) جەڭىمپاز اتانسا, كۇمىس جۇلدە
ءجۇمادىلوۆا ايگەرىمگە (شىمكەنت قالاسى, ت. رىسكۋلوۆ اتىنداعى №25 مەكتەپ-گيمنازياسى), قولا مەدال ەسەنباەۆا جۇلدىزعا (الماتى قالاسى, №185 مەكتەپ-گيمنازياسى) بۇيىردى.
بۇگىندە شاحمات ەلىمىزدىڭ ءبىلىم بەرۋ سالاسىندا ماڭىزدى رولگە يە. ۇكىمەتتىڭ كەشەندى جوسپارى اياسىندا ەلدەگى 1500-دەن استام مەكتەپتىڭ وقۋ باعدارلاماسىنا «شاحمات نەگىزدەرى» ءپانى ەنگىزىلگەن, ال 60 مىڭنان استام وقۋشى ارنايى دايىندىق كۋرستارىنان وتكەن مۇعالىمدەر جەتەكشىلىگىمەن ستراتەگيالىق سايىستى دامىتۋدا.
شاحماتتى دامىتۋدىڭ ماڭىزدىلىعىن مەملەكەت باسشىسى دا ءاردايىم ايتادى. حالىقارالىق شاحمات فەدەراتسياسىنىڭ (FIDE) پرەزيدەنتى اركادي دۆوركوۆيچتى قابىلداعاندا قاسىم-جومارت توقاەۆ ەلىمىزدە شاحمات تەك سپورت قانا ەمەس, ينتەللەكتۋالدى مادەنيەت, تاربيە مەن ءبىلىم بەرۋ جۇيەسىنىڭ اجىراماس بولىگى ەكەنىن اتاعان بولاتىن. سونداي-اق شاحمات ينفراقۇرىلىمىن دامىتۋ مەن ونى بالالار مەن جاستار اراسىندا ناسيحاتتاۋدىڭ ماڭىزى زور ەكەنىن دە ايتقان-دى.