باتىس قازاقستان وبلىستىق ايتۆ ينفەكتسياسىنىڭ الدىن الۋ ورتالىعى وڭىردە دۇنيەجۇزىلىك جيتس-پەن كۇرەس كۇنىنە ارنالعان ايلىقتىڭ قورىتىندىسىن جاريالادى, دەپ حابارلايدى Egemen.kz.
1996 جىلدان بەرى وڭىردە ادامنىڭ يممۋن تاپشىلىعىنىڭ ۆيرۋسى (ايتۆ) ينفەكتسياسى 1192 مارتە تىركەلگەن ەكەن. بيىلعى 10 اي ىشىندە بقو-دا 61 جاڭا جاعداي انىقتالعان. بۇل از با, كوپ پە؟
«بۇل وتكەن جىلدىڭ سايكەس كەزەڭىمەن سالىستىرعاندا 8 جاعدايعا كوپ. بىراق ءبىز ەڭ الدىمەن انىقتاۋ شارالارىن كۇشەيتىپ, وسىنداي ناتيجەگە جەتتىك», دەيدى وبلىستىق ايتۆ ينفەكسياسىنىڭ الدىن الۋ ورتالىعىنىڭ ديرەكتورى اقتىلەك ومىرباەۆ.
بيىل ايتۆ ينفەكتسياسى ورال قالاسىندا 42 رەت انىقتالىپتى. سونداي-اق ءبورلى اۋدانىندا – 6 جاعداي, تەرەكتى اۋدانىندا – 4 جاعداي, بايتەرەك جانە اقجايىق اۋداندارىندا – 2 وقيعا, ال تاسقالا, جاڭاقالا, قازتالوۆ جانە شىڭعىرلاۋ اۋداندارىندا – 1 جاعداي تىركەلگەن. سونىمەن قاتار باسقا وڭىردەن كەلگەن ادامداردىڭ ءبىرى دە وسىنداي ۆيرۋسقا شالدىققانى انىقتالعان.
ءبىر قۋانارلىعى, وڭىردە بالالار مەن جاسوسپىرىمدەر اراسىندا ۆيرۋس جۇقتىرعان جاعداي جوق. سىرقاتتاردىڭ جەتەۋى – 20-29 جاس ارالىعىندا, 26-سى – 30-39 جاستا. 40-49 جاستاعىلار اراسىندا – 16 جاعداي تىركەلسە, 50-59 جاس ارالىعىندا – 9 جاعداي, 60 جاستان جوعارىلار ىشىندە – 3 جاعداي انىقتالعان. وسىلايشا, سىرقات ادامدار 30 بەن 50 جاس ارالىعىنداعى ەڭبەككە قابىلەتتى جاندار اراسىندا كوپ بولىپ تۇر.
«جىنىستىق قۇرامى بويىنشا انىقتالعان جاعدايلاردىڭ ىشىندە ەر ادامدار باسىم. ولاردىڭ سانى - 41, بۇل بارلىق تىركەلگەن جاعدايدىڭ 67,2%-ىن قۇرايدى. ايەلدەر اراسىنان 20 جاعداي انىقتالدى», دەيدى ورتالىق ديرەكتورىنىڭ ورىنباسارى الماگۇل مانتاقوۆا.
ساراپتاما ينفەكتسيا جۇقتىرۋشىلاردى الەۋمەتتىك مارتەبە تۇرعىسىنان دا سارالاپ كورگەن. ياعني سىرقاتتاردىڭ اراسىندا جۇمىس ىستەيتىنى – 27 ادام, جۇمىسسىزى – 26 ادام, 2 زەينەتكەر, 2 سوتتالعان جانە 2 تەرگەۋدە جاتقان ادام بولعان. بۇدان بولەك, 1 اسكەري قىزمەتشى جانە الەۋمەتتىك مارتەبەسى انىقتالماعان 1 ادام انىقتالىپتى.
دارىگەرلەر وڭىردە ايتۆ ينفەكتسياسى نەگىزىنەن 88,6%-ىنا دەيىن جىنىستىق جولمەن تارالىپ جاتقانىن ايتادى. سونداي-اق جاڭا سىرقاتتاردىڭ 10 پايىزعا جۋىعى ينفەكتسيانى پارەنتەرالدىق جولمەن جۇقتىرعان. بۇل ەڭ الدىمەن ينەكتسيالىق ەسىرتكى قولدانۋدان بولادى.
«ارينە الدىڭعى جىلدارمەن سالىستىرعاندا بۇل كورسەتكىش ءسال تومەندەدى, بىراق ناشاقورلىق ماسەلەسى ءالى دە وزەكتى», دەيدى ماماندار.