ۇكىمەت وتىرىسىندا الداعى ۆەگەتاتسيالىق كەزەڭدە ەلىمىزدىڭ وڭتۇستىك ايماقتارىن سۋمەن قامتاماسىز ەتۋ ماسەلەسى قارالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ولجاس بەكتەنوۆ سۋ تاپشىلىعى جاعدايىندا سۋمەن قامتاماسىز ەتۋ ماسەلەلەرىن شەشۋ ءۇشىن كەشەندى شارالار قابىلداۋ قاجەتتىگىن اتاپ ءوتتى. ەگىس القاپتارىنىڭ قۇرىلىمىن ارتاراپتاندىرۋعا باسا نازار اۋدارىلدى.
پرەمەر-مينيستر باستى مىندەت سۋدى كوپ قاجەت ەتەتىن داقىلداردىڭ ۇلەسىن قىسقارتۋ جانە سۋ ۇنەمدەۋ تەحنولوگيالارىن ەنگىزۋ ەكەنىن اتاپ ءوتتى. ءوڭىر اكىمدىكتەرى مەن ۋاكىلەتتى مەملەكەتتىك ورگاندار ەگىس القاپتارىنىڭ قۇرىلىمىن ءارتاراپتاندىرۋ بويىنشا ينديكاتورلاردىڭ مۇلتىكسىز ورىندالۋىن قامتاماسىز ەتۋى قاجەت. سۋ رەسۋرستارى مينيسترلىگى بەكىتىلگەن ليميتتەردەن تىس سۋ بەرۋ جاعدايلارىنىڭ الدىن الۋى ءتيىس.
«سۋ رەسۋرستارى مينيسترلىگى بەكىتىلگەن ليميتتەردەن تىس سۋ بەرۋ جاعدايلارىنىڭ الدىن السىن. بۇل وزەكتى ماسەلە, مەن قايتالاپ ايتامىن. اۋىل شارۋاشىلىعى مينيسترلىگى ەگىس القاپتارىن ءارتاراپتاندىرۋ جونىندە ءتيىستى كەستە بەكىتتى, الداعى ۋاقىتتا بارلىق جۇمىس وسى كەستەگە سايكەس جۇرگىزىلۋى ءتيىس. مىسالى, ەگەر ءبىر شارۋاشىلىقتا 100 گەكتار بولۋ كەرەك دەسەك, ەرتەڭ 1 گەكتاردان ارتىق ەگىلسە, ءبىز وعان ءبىر تامشى سۋ بەرمەيمىز. ەگەر ەرتەڭ اۋىل شارۋاشىلىعى مينيسترلىگى بەكىتكەن كورسەتكىشتەردى بۇزىپ, ديقاندار شىعىنعا ۇشىراسا, ءبىر تيىنى دا بيۋدجەتتەن وتەلمەيدى. مۇنى حالىققا اشىق جەتكىزۋ كەرەك», دەدى ولجاس بەكتەنوۆ.
اتالعان ماسەلە پرەمەر-مينيستر تىكەلەي باقىلاۋىندا.
وبلىس اكىمدەرىنە 2026 جىلعى ۆەگەتاتسيالىق ماۋسىمعا دايىندىق اياسىندا كوممۋنالدىق مەنشىكتەگى گيدروتەحنيكالىق نىساندار مەن يرريگاتسيالىق كانالدارعا جوندەۋ جۇمىستارىن جۇرگىزۋ تاپسىرىلدى.
سونداي-اق 2026 جىلدىڭ شىلدەسىندە شاردارا توپتىق سۋ قۇبىرىنىڭ قۇرىلىسى اياقتالادى, بۇل قالا تۇرعىندارىن اۋىز سۋمەن ۇزدىكسىز قامتاماسىز ەتۋگە مۇمكىندىك بەرەدى. اتالعان ماسەلە پرەمەر-ءمينيستردىڭ باقىلاۋىندا.
سۋ رەسۋرستارى جانە يرريگاتسيا مينيسترلىگىنە, شەكارا ماڭىنداعى وڭىرلەردىڭ اكىمدىكتەرىنە قاجەتتى سۋ كولەمىنىڭ دەر كەزىندە كەلۋىن قامتاماسىز ەتۋ ءۇشىن كورشىلەس مەملەكەتتەرمەن تىعىز جۇمىس جۇرگىزۋ تاپسىرىلدى.
پرەمەر-ءمينيستردىڭ ورىنباسارى قانات بوزىمباەۆ ەلىمىزدىڭ وڭتۇستىك وڭىرلەرى بويىنشا سۋ تاپشى كەزەڭنىڭ جالعاسىپ جاتقانى راستالعانىن: شاردارا سۋ قويماسىنا سۋ كەلۋى 43%-عا, نارىن – سىرداريا كاسكادىنداعى سۋ كولەمى 3,8 ملرد م3 تومەندەگەنىن باياندادى. 2026 جىلعى ۆەگەتاتسيالىق كەزەڭگە بولجامدى سۋ كەلۋى 1-2 ملرد م3 دەپ باعالانىپ وتىر, بۇل 1 ملرد م3 دەيىن تاپشىلىق قاۋپىن تۋدىرادى.
جامبىل وبلىسىندا سۋ قويمالارى تەك 41%-عا تولدى. 2025 جىلى كۇرىش پەن ماقتا داقىلدارى جوسپارلى كورسەتكىشتەردەن اسىپ ءتۇستى. سونىمەن قاتار سۋ ۇنەمدەۋ تەحنولوگيالارى قولدانىلاتىن جەر كولەمى 543,5 مىڭ گەكتارعا جەتتى, جىل سايىنعى ءوسىم شامامەن 150 مىڭ گەكتاردى قۇرايدى. 2026-2028 جىلدارعا ارنالعان بيۋدجەتتە سۋدى ۇنەمدەۋدى قولداۋعا 228,1 ملرد تەڭگە قاراستىرىلعان.
بۇعان دەيىن, 2025 جىلدىڭ شىلدە ايىندا پرەمەر-مينيستر وڭتۇستىك وڭىرلەردىڭ اكىمدەرىنە ەگىنگە قاجەتتى سۋدىڭ ۇتىمدى پايدالانىلۋىنا قاتاڭ باقىلاۋدى قامتاماسىز ەتۋدى, ىلعالدى كوپ قاجەت ەتەتىن داقىلداردىڭ رۇقساتسىز ەگىلۋىنە جول بەرمەۋدى جانە حالىقتى سۋمەن ۇزدىكسىز قامتاماسىز ەتۋ ءۇشىن الدىن الا شارالار قابىلداۋدى تاپسىرعان ەدى. تەكسەرۋ قورىتىندىسى بويىنشا ىلعالسۇيگىش داقىلداردى رۇقساتسىز ەگۋگە جول بەرگەن لاۋازىمدى تۇلعالار تارتىپتىك جاۋاپكەرشىلىككە تارتىلدى.