ەلىمىزدە نوتاريۋستاردىڭ جۇمىسىنا قاتىستى تالاپتار كۇشەيتىلەدى. ەندى قىزمەت الۋشىلاردىڭ جەكە دەرەكتەرىن نەگىزسىز پايدالانعان نوتاريۋستار ليتسەنزياسىنان ايىرىلادى. بۇل تۋرالى ءماجىلىستىڭ جالپى وتىرىسىندا ادىلەت ۆيتسە-ءمينيسترى بوتاگوز جاقسەلەكوۆا ايتتى, دەپ حابارلايدى Egemen.kz.
پارلامەنت تالقىلاۋىندا دەپۋتات اينا مۇسراليموۆا نوتاريۋستار ازاماتتاردىڭ جەكە دەرەكتەرىنە قول جەتكىزۋى جانە ولاردى رۇقساتسىز قاراعان جاعدايدا قانداي جاۋاپكەرشىلىك قاراستىرىلاتىنى جونىندەگى سۇراق جولدادى.
ۆەدومستۆو وكىلىنىڭ ايتۋىنشا, جاڭا تسيفرلىق كودەكس اياسىندا دەربەس دەرەكتەردى قورعاۋ تالاپتارى كۇشەيتىلگەن.
«شىنىندا دا, قازىر ءبىز جەكە دەرەكتەردى قورعاۋ ماسەلەسىنە ۇلكەن كوڭىل ءبولىپ وتىرمىز. سوندىقتان ءبىزدىڭ زاڭ جوبامىزدا دا ليتسەنزيالىق باقىلاۋدان كەيىن قوسىمشا شارالار قاراستىرىلعان. ەگەر نوتاريۋس ءوز وكىلەتتىگىن پايدالانىپ, اقپاراتتىق جۇيەگە نەگىزسىز كىرىپ, ازاماتتاردىڭ دەرەكتەرىن قاجەتسىز جانە زاڭدى نەگىزسىز قاراسا نەمەسە پايدالانسا, ءبىز بۇل جاعدايدا جاۋاپكەرشىلىكتى كۇشەيتۋدى قاراستىردىق. ول ءتىپتى ليتسەنزيانى ۋاقىتشا توقتاتۋ نەمەسە ودان ايىرۋعا دەيىن بارادى», دەدى بوتاگوز شايماردانقىزى.
دەپۋتات سالىق رەجيمى بويىنشا ەل اۋماعىندا بىرىڭعاي مولشەرلەمە ەنگىزۋدى ۇسىندى
ەسكە سالا كەتەيىك, ءماجىلىستىڭ جالپى وتىرىسىندا دەپۋتاتتار سالىق كودەكسىنە وزگەرىستەر ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى.