ەلىمىزدە ەلەكتروندىق ساۋدانى ودان ءارى دامىتۋ ماقساتىندا 2027 جىلعا دەيىنگى ەلەكتروندىق ساۋدا دامۋىنىڭ جوسپارى ىسكە اسىرىلىپ جاتىر. سالانى دامىتۋ ءۇشىن Kaztrade كومپانياسىمەن بىرلەسىپ, رەسپۋبليكا كاسىپكەرلەرىنە ەلەكتروندىق ساۋدانى ىلگەرىلەتۋ ماسەلەلەرى بويىنشا ونلاين-سەمينارلار وتكىزىلەدى, دەپ حابارلايدى Egemen.kz.
بۇل تۋرالى ساۋدا جانە ينتەگراتسيا مينيسترلىگى ىشكى ساۋدانى دامىتۋ دەپارتامەنتىنىڭ ديرەكتورى اڭسار ورازاليەۆ ايتتى.
ونىڭ ايتۋىنشا, وتاندىق تاۋارلاردىڭ ماركەتپلەيستەردەگى ۇلەسىن كەڭەيتۋ ءۇشىن «قازاقستاندا جاسالعان» ارنايى بولىمدەرىن ەنگىزۋ جۇمىستارى جۇرگىزىلىپ جاتىر. 2024 جىلى ەلەكتروندىق ساۋدا الاڭدارى ءۇشىن باعدارلامالىق قامتاماسىز ەتۋدى ازىرلەۋ جانە سۇيەمەلدەۋ جوبالارىن قولداۋعا ارنالعان سىياقى مولشەرلەمەسىن سۋبسيديالاۋ جانە كەپىلدىكتەر بەرۋ تۇرىندەگى مەملەكەتتىك قولداۋ قاعيدالارى قابىلداندى.
«وتاندىق ماركەتپلەيستەردىڭ قىتايدان تاۋار ساتىپ الۋعا باعىتتالعان (B2B فورماتى بويىنشا) جاڭا جوبالارى ىسكە اسىرىلىپ جاتىر. تىكەلەي ساتىپ الۋ دەلدالدار تىزبەگىن قىسقارتىپ, تاۋار ساناتىنا قاراي ساتىپ الۋ قۇنىن 10-30%-عا تومەندەتۋگە مۇمكىندىك بەرەدى. اشىق تاريفتەر ءىرى يمپورتتاۋشىلار تاراپىنان ورىنسىز باعا ءوسىمىن شەكتەۋگە جاعداي جاسايدى», دەدى اڭسار ورازاليەۆ.
ۆەدومستۆو وكىلىنىڭ ايتۋىنشا, Ozon جانە Wildberries ماركەتپلەيستەرى استانا مەن الماتىدا جالپى اۋدانى 291 مىڭ شارشى مەتر بولاتىن ءۇش فۋلفيلمەنت ورتالىعىن سالۋ بويىنشا ينفراقۇرىلىمدىق جوبالاردى جۇزەگە اسىرىپ جاتىر. وسىعان بايلانىستى بيىلعى 4 قاراشادا فۋلفيلمەنت ورتالىقتارىنا ارنالعان ۇلتتىق ستاندارت (ساقتاۋدان جانە جەتكىزۋدەن باستاپ, تاپسىرىستاردى باسقارۋ مەن تاۋاردى قاداعالاۋعا دەيىن) بەكىتىلدى. ول 2026 جىلعى 1 قاڭتاردا كۇشىنە ەنەدى. ستاندارت تەك ساقتاۋ پروتسەستەرىن عانا ەمەس, تاۋارلاردى وتكىزۋ ماسەلەلەرىن دە قامتيدى, بۇل حالىقارالىق تاجىريبەگە سايكەس كەلەدى. ونىڭ ەنگىزىلۋى ساۋدا سالاسىنا ينۆەستيتسيالاردىڭ ارتۋىنا جانە ەلەكتروندىق كوممەرتسيانىڭ ودان ءارى دامۋىنا ىقپال ەتپەك.
«ەلەكتروندىق ساۋدانىڭ ۇلتتىق وپەراتورى – «قازپوشتا» اق سىرتقى ەلەكتروندىق ساۋدا سالاسىندا ءىرى حالىقارالىق كومپانيالار YTO Express جانە JD.com-مەن بىرلەسكەن جوبالاردى ىسكە اسىرىپ جاتىر. وسى جوبالار اياسىندا الماتى وبلىسىندا ەلەكتروندىق ساۋدا تاۋارلارىن وڭدەي الاتىن ۇلەستىرۋ ورتالىعى سالىنادى, سونداي-اق ورتالىق ازيا مەن تمد نارىقتارىنا ارنالعان JD.com پلاتفورماسىنىڭ قازاق-ورىس ءتىلدى نۇسقاسى ىسكە قوسىلادى», دەپ مالىمدەدى سپيكەر.
ەسكە سالا كەتەيىك, 2026 جىلعى 10 ساۋىردە الماتىدا قازاقستاننىڭ ريتەيل جانە قارجى سەكتورىنداعى جاڭا تەحنولوگيالارعا ارنالعان PROFIT Retail & Finance Day كونفەرەنتسياسى وتەدى.