جاقىندا «The Economist» اقش پەن ەۋروپادا ءداستۇرلى ءبىلىم بەرۋ فورماتىنا قايتا ورالۋ ءۇردىسى بايقالا باستاعانىن جازدى. كەيىنگى 10 جىلدا مەكتەپتەر مەن ۋنيۆەرسيتەتتەر ساباق پەن باعالاۋدى تولىق تسيفرلاندىرۋعا تىرىسقان ەدى. الايدا 2022-2024 جىلدار ارالىعىندا جازباشا جانە اۋىزشا ەمتيحانداردىڭ ۇلەسى قايتا وسكەن ەكەن, دەپ جازادى Egemen.kz.
«Circea» كومپانياسىنىڭ دەرەگىنە سايكەس, 2022-2024 جىلدار ارالىعىندا اقش جوعارى وقۋ ورىندارىندا ەمتيحانعا ارنالعان ءداستۇرلى كوك داپتەرلەردى پايدالانۋ ەكى ەسە ارتقان. ساراپشىلار بۇل وزگەرىستى گەنەراتيۆتى جاساندى ينتەللەكتىنىڭ, اسىرەسە «ChatGPT» سياقتى سەرۆيستەردىڭ كەڭ تارالۋىمەن بايلانىستىرادى. «Pew Research Center» ساۋالناماسىندا اقش-تا كوللەدج وقىتۋشىلارىنىڭ 66 پايىزى تاپسىرمالاردى وسىعان بايلانىستى قايتا قۇراستىرعانىن ايتقان. ال 76 پايىزى ەندى جۇمىستى قاعازعا جازۋدى تالاپ ەتكەن. «EdWeek» زەرتتەۋىندە مۇعالىمدەردىڭ 56 پايىزى نوۋتبۋك, سمارتفون مەن پلانشەتتى ساباقتاعى باستى كەدەرگى دەپ اتاعان. تاعى 43 پايىزى ەسەپ پەن جازبا جۇمىستى قاعاز-قالاممەن ورىنداۋ اكادەميالىق ادالدىقتىڭ ەڭ سەنىمدى ءتاسىلى ەكەنىن جەتكىزگەن.
بىرقاتار وقۋ ورىندارى تەحنولوگيانى شەكتەۋگە كىرىسكەن. رۋتگەرس ۋنيۆەرسيتەتى اۋديتوريادا نوۋتبۋك قولدانۋعا تىيىم سالسا, كەي مەكتەپتەر «PowerPoint»-ءتىڭ ورنىنا اۋىزشا پرەزەنتاتسيالاردى ەنگىزگەن. نيۋ-يوركتەگى «Hunter College High School» ينفورماتيكا ساباعىندا كود جازۋدى ءبىلىم الۋشىلار ەسىندە جاقسى ساقتاۋى ءۇشىن داپتەرگە جازعىزۋعا كوشكەن. بۇل قۇبىلىس اقش-پەن شەكتەلمەيدى. 2023 جىلى شۆەتسيا باستاۋىش سىنىپتاردا تسيفرلىق قۇرىلعىلاردى ازايتىپ, قاعاز وقۋلىقتاردى قايتا ەنگىزدى. دانيا مەن فينليانديا دا وسىنداي باعىتتى ۇستانىپ وتىر. ساراپشىلار مۇنى تەحنولوگيادان باس تارتۋ ەمەس, وقۋ ساپاسىن ارتتىرۋعا باعىتتالعان قادام باعالاعان.
«The Economist» ماتەريالىندا الەۋمەتتىك ايىرماشىلىق تا اتاپ وتىلەدى. «Pew» دەرەگى بويىنشا, اقش-تا افروامەريكالىق جاسوسپىرىمدەردىڭ 70 پايىزى ينتەرنەتتى «ۇنەمى پايدالانادى», ال اق ناسىلدىلەر اراسىندا بۇل كورسەتكىش 37 پايىز. ياعني تەحنولوگياعا تاۋەلدىلىك تابىس دەڭگەيى مەن ورتاعا بايلانىستى وزگەرەتىنىن جازادى باسىلىم.