ەندى ەل ازاماتتارى Perplexity Pro جاساندى ينتەللەكت پلاتفورماسىنا ءبىر جىل بويى تەگىن قول جەتكىزە الادى. بۇل مۇمكىنشىلىك جاساندى ينتەللەكت جانە تسيفرلىق دامۋ مينيسترلىگى, «قازتەلەكوم» اق جانە Perplexity AI, Inc. كومپانياسى اراسىندا قول قويىلعان ءوزارا تۇسىنىستىك تۋرالى مەموراندۋم اياسىندا جۇزەگە اسادى, دەپ حابارلايدى Egemen.kz.
بۇل كەلىسىم قازاقستاننىڭ ستۋدەنتتەرى مەن ماماندارىنا, سونداي-اق بارلىق ازاماتتارعا جاساندى ينتەللەكتتىنىڭ زاماناۋي قۇرالدارىن وقۋ, زەرتتەۋ جانە كاسىبي قىزمەتتە قولدانۋعا جول اشادى.
سونىمەن قاتار مەموراندۋم شەڭبەرىندە Alem.AI پلاتفورماسى بازاسىندا عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى (R&D) قولداۋ, سونداي-اق قازاقستاندا دەرەكتەر ورتالىقتارىن دامىتۋ كوزدەلگەن.
«بۇل كەلىسىم ميلليونداعان قازاقستاندىققا بۇرىن تەك شەكتەۋلى پايدالانۋشىلارعا عانا قولجەتىمدى بولعان قۋاتتى جاساندى ينتەللەكت تەحنولوگيالارىن پايدالانۋعا مۇمكىندىك بەرەدى. ءبىز ءبىلىم مەن يننوۆاتسيا ءاربىر ازاماتقا قولجەتىمدى بولاتىن تسيفرلىق ەكوجۇيەنى قالىپتاستىرىپ جاتىرمىز», دەدى جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.
Perplexity كومپانياسىنىڭ ۆيتسە-پرەزيدەنتى جانە تەحنيكالىق ديرەكتورىنىڭ ورىنباسارى دجەرري ما قازاقستاننىڭ زاماناۋي جي-مودەلدەردى الەمدىك بىلىممەن ۇشتاستىرۋداعى ۇستانىمىن جوعارى باعالادى.
«قازاقستان الدىڭعى قاتارلى جاساندى ينتەللەكت ۇلگىلەرىن جاھاندىق بىلىممەن بىرىكتىرۋدىڭ ماڭىزىن دۇرىس باعالادى. بۇل ءاربىر ازامات ءۇشىن جي تەحنولوگيالارىن قولجەتىمدى ەتۋدىڭ تاماشا جولى. قازاقستاننىڭ جي جانە تسيفرلىق دامۋ مينيسترلىگىمەن ارىپتەستىك - جاساندى ينتەللەكتىنى بارلىق سالادا جەدەل ەنگىزۋگە مۇمكىندىك بەرەدى», دەدى ول.
ءوز كەزەگىندە «قازتەلەكوم» اق باسقارما توراعاسى باعدات مۋسين بۇل باستاما ءار ازاماتقا جي تەحنولوگيالارىن كۇندەلىكتى ومىردە قولدانۋعا جول اشاتىنىن اتاپ ءوتتى.
«Perplexity AI كومپانياسىمەن ىنتىماقتاستىق قازاقستان ءۇشىن جاڭا مۇمكىندىكتەرگە جول اشادى. ءبىز جاساندى ينتەللەكت تەحنولوگيالارىنىڭ تەك ماماندارعا عانا ەمەس, ستۋدەنتتەرگە, مەكتەپ وقۋشىلارىنا, كاسىپكەرلەرگە جانە باسقا ازاماتتارعا دا قولجەتىمدى بولۋىن قالايمىز.«قازاقتەلەكوم» اق وسى ەكوجۇيەنى دامىتۋعا بەلسەندى قاتىسىپ, زاماناۋي تسيفرلىق شەشىمدەردى ادامداردىڭ كۇندەلىكتى ءومىرىنىڭ ءبىر بولىگىنە اينالدىرۋ جوبالارىن قولدايتىن بولادى», باعدات مۋسين.
باستامانىڭ ينيتسياتورى ءارى ۇيلەستىرۋشىسى – Astana IT University. ۋنيۆەرسيتەت Perplexity AI كومپانياسىمەن سەرىكتەستىك اياسىندا گەنەراتيۆتى جاساندى ينتەللەكت قۇرالدارىن وقۋ ۇدەرىسىنە ەنگىزىپ, ماشينالىق وقىتۋ بويىنشا زەرتتەۋ جوبالارىن دامىتۋ جانە حالىقارالىق اكادەميالىق بايلانىستى نىعايتۋ جۇمىستارىن جۇرگىزەدى.
Perplexity – جاساندى ينتەللەكت نەگىزىندەگى ينتەللەكتۋالدى جۇيە, ول سەنىمدى دەرەككوزدەرگە سۇيەنە وتىرىپ, سۇراقتارعا ءدال جاۋاپ بەرەدى جانە دەرەككوزدەرگە سىلتەمەلەردى ۇسىنادى. سونىمەن قاتار, ول تەرەڭ زەرتتەۋلەر جۇرگىزۋگە جانە اقپاراتتى ءتيىمدى ىزدەۋگە كومەكتەسەدى.