2029 جىلى جاسوسپىرىمدەر اراسىنداعى IV جازعى ازيا ويىندارىنىڭ الاۋى تاشكەنتتە تۇتاناتىن بولدى. بۇل شەشىم كۇنى كەشە عانا باحرەيندە وتكەن ازيا وليمپيادالىق كەڭەسىنىڭ وتىرىسىندا قابىلداندى. ەستەرىڭىزگە سالا كەتەيىك, بۇعان دەيىنگى جارىستار 2009 جىلى سينگاپۋردە, 2013 جىلى نانجيندە, بيىل مانامادا ۇيىمداستىرىلدى.
7–21 قاراشا ارالىعىندا ساۋد ارابيا استاناسى ەر-ريادتا الاۋى تۇتاناتىن يسلام ىنتىماقتاستىعى ويىندارىندا ەلىمىزدىڭ اۋىر اتلەتتەرى قانداي قۇرامادا كۇش سىناساتىنى بەلگىلى بولدى. پارسى شىعاناعىنا اتتاناتىندار تىزىمىندە ەدىگە ەمبەردى (79 كگ), نۇرعيسا ادىلەت ۇلى (94 كگ), ارتيوم انتروپوۆ (110 كگ), داريا بالابايۋك (63 كگ), اراي نۇرلىبەكوۆا (69 كگ), ايانات جۇماعالي (77 كگ), ارۋجان داۋلەتوۆا (86 كگ), ليۋبوۆ كوۆالچۋك (+ 86 كگ) سىندى زىلتەمىشىلەر بار.
بيىل بوكستان World Boxing ۇيىمىنىڭ مۇرىندىق بولۋىمەن وتەتىن الەم كۋبوگىنە قاتىساتىن 18 كوماندا انىقتالدى. ولار – قازاقستان, وزبەكستان, اۋستراليا, جاپونيا, اۋستريا, تايپەي, قىرعىزستان, انگليا, نيگەريا, فينليانديا, پولشا, گەرمانيا, وڭتۇستىك كورەيا, ءۇندىستان, يسپانيا, يران, ۋكراينا, يتاليا. سولاردىڭ اراسىنان وزىپ شىققاندارى 15–23 قاڭتار ارالىعىندا نيۋ-دەليدە ۇيىمداستىرىلاتىن فينالدىق سايىستا كۇش سىناسادى.
حالىقارالىق كونكيشىلەر وداعى (ISU) ايەلدەر اراسىنداعى مانەرلەپ سىرعاناۋشىلاردىڭ رەيتينگىن جاريالادى. ۇزدىكتەر تىزىمىندە جەرلەسىمىز سوفيا سامودەلكينا 1 438 ۇپايپەن 37-ساتىعا جايعاستى. كوش باسىندا جاپونيانىڭ قوس جۇلدىزى – كاوري ساكاموتو (4 786 ۇپاي) مەن مونە چيبا (4 110 ۇپاي). ۇزدىك ۇشتىكتى امەريكالىق يزابو لەۆيتا (4 007 ۇپاي) تۇيىندەدى.
ەر-ريادتا شىمىلدىعى تۇرىلگەن WTA قورىتىندى ءتۋرنيرىن ەلىمىزدىڭ ەڭ ۇزدىك تەننيسشىسى ەلەنا رىباكينا جەڭىسپەن باستادى. تۇساۋكەسەر كەزدەسۋىندە الەمنىڭ ءتورتىنشى راكەتكاسى, بيىل ۋيمبلدون مەن US Open دودالارىنىڭ ءفيناليسى, امەريكالىق اماندا انيسيموۆانى 6:3, 6:1 ەسەبىمەن ۇتتى. كەزدەسۋ نەبارى 58 مينۋتقا سوزىلدى. ەكىنشى تۋردا ەلەنا WTA رەيتينگىندە ەكىنشى ورىندا تۇرعان پولشالىق يگا شۆەنتەكپەن شەبەرلىك بايقاسادى.
ۋەفا-نىڭ رەسمي سايتىندا 2028, 2029 جىلدارى وتەتىن چەمپيوندار ليگاسى, ەۋروپا ليگاسى, كونفەرەنتسيا ليگاسىنىڭ شەشۋشى ويىندارىن قابىلداۋعا نيەت بىلدىرگەن 15 مەملەكەتتىڭ ءتىزىمى جاريالاندى. سولاردىڭ قاتارىندا ءبىزدىڭ ەل دە بار. بۇل كەزدەسۋلەردى جوعارى دەڭگەيدە ۇيىمداستىرۋعا استانا مەن الماتى قالالارى ايرىقشا قۇلشىنىس تانىتىپ وتىر.
ەلىمىزدىڭ پرەمەر-ليگاسىندا جانكۇيەرلەردىڭ ەڭ كوپ قولداۋىنا يە بولعان كوماندالاردىڭ ءتىزىمى جاريالاندى. بۇل رەيتينگتە «قايرات» كوش باستاپ تۇر. ءوز الاڭىندا, سىرتتا وتكەن ماتچتاردا الماتىلىق كلۋبتى بارلىعى 241 194 كورەرمەن ء(ار ماتچتا ورتا ەسەپپەن 9 277 ادام) قولداعان ەكەن. ەكىنشى, ءۇشىنشى ورىنداردا – «اقتوبە» (224 651, ورتا ەسەپپەن – 8 640) مەن «استانا» (224 651, ورتا ەسەپپەن – 8 640). ەڭ از جانكۇيەرلەر تۇرىكستاندا (63 087, ورتا ەسەپپەن – 2 426) تىركەلدى.