مەملەكەت باسشىسى قاسىم-جومارت توقاەۆ ەلدەگى ساياسي جۇيەنى جەتىلدىرۋ باعىتىنداعى وزگەرىستەر مەن سايلاۋ ۇدەرىسىن دەموكراتيالاندىرۋ شارالارىنىڭ جالعاساتىنىن اتاپ ءوتتى, دەپ حابارلايدى Egemen.kz.
«ساياسي باعدارىمىز بەن قابىلداعان ناقتى شەشىمدەرىمىز ۇلتىمىزدىڭ ۇزاق مەرزىمدى مۇددەسى مەن مەملەكەتتىڭ قاۋىپسىزدىگىن قورعاۋ, ەلدى دامىتۋ قاعيداتتارىن كوزدەيدى. مۇنى بەرىك ۇستانامىز.
جولداۋدا ءبىر پالاتالى پارلامەنتتى پروپورتسيونالدى سايلاۋ جۇيەسى ارقىلى جاساقتاۋ قاجەت ەكەنىن اشىق ايتتىم. ءبىر پالاتالى پارلامەنتتى تەك پارتيالىق ءتىزىم بويىنشا قالىپتاستىرۋ پارتيالاردىڭ ينستيتۋتسيونالدىق نەگىزىن نىعايتۋعا سەپتىگىن تيگىزەدى. سايلاۋشىلارمەن جۇيەلى جۇمىس ىستەۋىنە ىقپال ەتەدى. ياعني مەملەكەتتىلىگىمىزگە پايدا اكەلەدى. بۇل ەشقانداي كەرى كەتۋ نەمەسە دەموكراتيالىق قاعيداتتاردان باس تارتۋ ەمەس. ەل قامىن ويلاپ, ساياسي تۇرعىدان سالماقتاپ وسىنداي ۇيعارىمعا كەلدىم», دەيدى مەملەكەت باسشىسى.
پرەزيدەنتتىڭ ايتۋىنشا, ايماقتىق دەڭگەيدە ازاماتتار بيلىكپەن تىكەلەي ءارى تۇراقتى قارىم-قاتىناس جاسايدى. سوندىقتان جەرگىلىكتى ءماسليحاتتار مەن اكىمدىكتەر بەلسەندى جۇمىس ىستەپ, ەلدىڭ مۇڭ-مۇقتاجىن شەشۋدە ماڭىزدى ءرول اتقاراتىنىن كورسەتۋگە ءتيىس.
«سوڭعى جىلدارى تىكەلەي سايلاۋ ينستيتۋتىن ايتارلىقتاي كەڭەيتتىك. اۋەلى اۋىل اكىمدەرىن سايلاۋدى ەنگىزدىك, كەيىن ول اۋدان, سودان سوڭ وبلىستىق ماڭىزى بار قالا باسشىلارىن سايلاۋعا ۇلاستى. سول سەبەپتى قازاقستاندا اي سايىن ءتۇرلى ەلەكتورالدى ناۋقان ءجۇرىپ جاتادى. بۇل ءبىزدىڭ وڭىردەگى بىرەگەي ساياسي تاجىريبە سانالادى.
بارشامىز وسىناۋ ءىستىڭ ماقساتقا ساي ورىندالۋىن باقىلاپ, ەگەر ونىڭ جاعىمسىز سالدارى بولسا, شارا قابىلداۋ قاجەت. رەفورمالار – تابيعي ۇدەرىس, مۇندا ارتىق كونسەرۆاتيزمگە ورىن جوق. جەرگىلىكتى ءماسليحاتتاردى سايلاۋدا ماجوريتارلىق جۇيەنى ساقتاۋ كەرەك دەپ سانايمىن», دەيدى مەملەكەت باسشىسى.