ماشينا جاساۋ سالاسىنداعى تىڭ وزگەرىس

ءبىزدىڭ بولىمدە زاماناۋي تەحنولوگيالار ەنگىزىلگەن. بۇل ءادىس ءۇش قاباتتى بوياۋدى ءبىر تسيكل­دە جاعۋعا مۇمكىندىك بەرەدى. ياعني بۇرىنعىداي ءار قابات جەكە كەپتىرىلمەيدى, بارلىق ۇدەرىس ءبىر تىزبەكتە وتەدى. سونىڭ ارقاسىندا بوياۋ ساپاسى تۇراقتى دەڭگەيدە ساقتالىپ, ۋاقىت پەن ەنەرگيا ۇنەمدەلەدى. مىسالى, ءداستۇرلى ادىستە ءار قابات ءۇشىن جەكە پەش قاجەت بولسا, جاڭا جۇيەدە ونىڭ ءبارى ءبىر كەزەڭدە ورىندالادى.

ەكولوگيالىق تالاپتار – ءبىزدىڭ تسەحتىڭ باستى باسىمدىعىنىڭ ءبىرى. وسى باعىتتا «Artio» جۇيەسى جۇمىس ىستەيدى. بۇل جۇيە بوياۋ ۇدەرىسى كەزىندە بولىنەتىن ۇشپا ورگاني­كالىق قوسىلىستاردى جوعارى تەمپەراتۋرادا تولىق ىدىراتىپ, ولاردى كومىرقىشقىل گازى مەن سۋ بۋىنا اينالدىرادى. سونىمەن قاتار ۇدەرىستە پايدا بولعان جىلۋ قايتا قول­دانىلادى. بۇل ءتاسىل گاز جانە ەلەكتر ەنەرگياسىنىڭ شىعىنىن ازايتىپ, جالپى ءوندىرىستىڭ ەكولو­گيالىق قاۋىپسىزدىگى مەن ەنەرگيا تيىمدىلىگىن ارتتىرادى.

«Kia Qazaqstan» زاۋىتىنىڭ ىسكە قوسىلۋى ەلىمىز ءۇشىن ۇلكەن جەتىستىك بولدى. ەندى بىزدە اۆتو­كولىكتەردى تولىق وندىرىستىك تسيكلمەن دايىنداپ, سىرتقا شىعارۋعا مۇمكىندىك تۋدى. بۇل جاڭا جۇمىس ورىندارىنىڭ اشىلۋىنا جانە ينجەنەر ماماندارى­نىڭ كاسىبي دامۋىنا جول اشىپ وتىر. زاۋىتتا قازىر جۇزدەگەن جاس مامان ەڭبەك ەتەدى, ولاردىڭ كوپشىلىگى ارنايى وقۋ ورىندارىندا دايىندىقتان وتكەن. ءبىر بولىگى كورەيادا تاعىلىمداماعا قاتىسقان.

ءوندىرىستىڭ وسىنداي دەڭگەيگە كوتەرىلۋى تەحنولوگيالىق تاۋەلسىز­دىكتى نىعايتىپ, قازاقستاندى ورتالىق ازياداعى اۆتوموبيل ءوندىرىسىنىڭ جاڭا ورتالىعىنا اينالدىرادى. بۇل – تەك زاۋىت ەمەس, ەلدىڭ ينجەنەرلىك الەۋەتىن كوتەرىپ, زاماناۋي ءوندىرىس مادە­نيەتىن قالىپتاستىراتىن ورتا.

ءبىزدىڭ ماقساتىمىز – جوعارى ساپالى ءونىم شىعارىپ قانا قويماي, ەكولوگيالىق جانە تەحنو­لو­گيالىق تۇرعىدان جاڭا ستاندارت قالىپتاستىرۋ. «Kia Qazaqstan» زاۋىتىنىڭ تاجىريبەسى بولاشاقتا وتاندىق ماشينا جاساۋ سالاسىنىڭ دامۋىنا سەرپىن بەرەدى دەپ سەنەمىن.

ءامىرحان امانجولوۆ,

 «Kia Qazaqstan» زاۋىتى بوياۋ تسەحىنىڭ ينجەنەر-تەحنولوگى