پرەمەر-مينيستر ولجاس بەكتەنوۆ توراعالىق ەتەتىن تسيفرلىق شتاب مەملەكەت باسشىسىنىڭ بيىلعى جولداۋىندا قويىلعان مىندەتتەردى جەدەل ءارى جۇيەلى تۇردە جۇزەگە اسىرۋ جۇمىسىن جۇرگىزىپ جاتىر.
شتاب بىرىڭعاي تسيفرلىق ەكوجۇيە قالىپتاستىرۋعا, كرەاتيۆتى يندۋستريانى دامىتۋعا, IT-ستارتاپتار مەن جوعارى وقۋ ورىندارىن قولداۋعا باعىتتالعان بىرقاتار شەشىم قابىلدادى. وسىعان وراي بىرقاتار مەملەكەتتىك ورگانعا تاپسىرما جۇكتەلدى.
ياعني قارجى, ۇلتتىق ەكونوميكا, جاساندى ينتەللەكت جانە تسيفرلىق دامۋ مينيسترلىكتەرى جەرگىلىكتى اتقارۋشى ورگاندارمەن بىرگە, «Astana Hub حالىقارالىق IT-ستارتاپتار تەحنوپاركى» كورپوراتيۆتىك قورىن وڭىرلىك يننوۆاتسيالار جانە كاسىپكەرلىك ورتالىعى رەتىندە نىعايتۋ ءۇشىن وسى جىلعى 10 قاراشاعا دەيىن اقپاراتتىق-كوممۋنيكاتسيالىق تەحنولوگيالار سالاسىنداعى باسىم قىزمەت تۇرلەرىنىڭ تىزبەسى كەڭەيتىلەدى.
ازاماتتار ءۇشىن قولايلى ءارى قاۋىپسىز تسيفرلىق ورتا قالىپتاستىرۋ ماقساتىندا مەملەكەتتىك ورگاندار مەن ولارعا ۆەدومستۆولىق باعىنىستى ۇيىمدار جەكە ءموبيلدى قوسىمشالاردى ازىرلەۋگە تىيىم سالۋى جانە ولاردىڭ تەك eGov جانە Aitu پلاتفورمالارىندا جۇزەگە اسىرىلۋى قامتاماسىز ەتىلەدى.
«Alem.cloud» ۇلتتىق سۋپەركومپيۋتەر ورتالىعىندا ەسەپتەۋ رەسۋرستارىن ءبولۋ قاعيدالارى بەكىتىلىپ, سودان كەيىن ءتيىستى نورماتيۆتىك قۇقىقتىق اكت ازىرلەنەدى. عىلىم جانە جوعارى ءبىلىم مينيسترلىگى قولدانىستاعى تەتىكتەر شەڭبەرىندە جوو-لارعا قولداۋ كورسەتۋدى قامتاماسىز ەتەدى.
تسيفرلىق شتابتىڭ شەشىمىمەن مەملەكەتتىك ورگاندارعا Astana Hub IT-ستارتاپتار تەحنوپاركى قىزمەتىنىڭ باسىم تۇرلەرىنىڭ تىزبەسىنە مۋلتيمەديا, ويىنداردىڭ ديزاينىن جاساۋ مەن باسىپ شىعارۋ, باعدارلامالىق قامتاماسىز ەتۋدى ەنگىزۋ, سۇيەمەلدەۋ مەن تۇرلەندىرۋ, كيبەرسپورت سالاسىنداعى قىزمەتتەر سياقتى تانىمال باعىتتاردى قوسۋ تاپسىرىلدى. بۇدان باسقا, اتالعان تىزبە قر رەزيدەنتى ەمەستەرگە باعدارلامالىق قامتۋدى پايدالانا وتىرىپ, بيزنەس-پروتسەستەر اۋتسورسينگى, اعىلشىن ءتىلىن وقىتۋ سياقتى قىزمەتتەرمەن تولىقتىرىلدى. قىزمەتتەر اياسىن كەڭەيتۋ Astana Hub-تىڭ جاھاندىق تەحنولوگيالىق قوعامداستىقتى تارتۋ ورتالىعى رەتىندەگى ۇستانىمىن كۇشەيتە تۇسەدى.
ىڭعايلى ءارى قاۋىپسىز تسيفرلىق ورتانى قالىپتاستىرۋ ماقساتىندا بارلىق مەملەكەتتىك ءموبيلدى سەرۆيستەر SuperApp قاعيداتى بويىنشا eGov جانە Aitu ەكوجۇيەلەرىنە كەزەڭ-كەزەڭىمەن بىرىكتىرىلمەك. ينتەگراتسيا ءموبيلدى قوسىمشالاردىڭ بىتىراڭقىلىق ماسەلەسىن جويادى, ۇدەرىستەردى جەدەلدەتەدى ءارى حالىققا مەملەكەتتىك قىزمەتتەر كورسەتۋ ساپاسىن ارتتىرادى.
«Alem.cloud» سۋپەركومپيۋتەرلىك ورتالىعىنىڭ ەسەپتەۋ رەسۋرستارىن ءبولۋ ەرەجەلەرىن بەكىتۋ Astana Hub ستارتاپتارى, عىلىمي ۇيىمدار مەن ۋنيۆەرسيتەتتەر, مەملەكەتتىك ورگاندار مەن ولاردىڭ ۆەدومستۆولىق باعىنىستى ۇيىمدارى, سونداي-اق شەتەلدىك كومپانيالاردى قوسا العاندا, جەكە سەكتور جوبالارى ءۇشىن جوعارى ءونىمدى قۋاتتارعا قول جەتكىزۋدىڭ ناقتى ءارى ايقىن تەتىگىن قالىپتاستىرادى.
«Alem.cloud» قۋاتىن پايدالانۋعا بەرۋدىڭ باسىم باعىتتارى جاساندى ينتەللەكتىنىڭ ۇلتتىق دامۋ مىندەتتەرىن ەسكەرە وتىرىپ انىقتالادى ءارى ءبىلىم بەرۋ, دەنساۋلىق ساقتاۋ, اۋىل شارۋاشىلىعى, سۋمەن جابدىقتاۋ, مەملەكەتتىك باسقارۋ, مۇناي-گاز سالاسى, تاۋ-كەن مەتاللۋرگيا كەشەنى, ەنەرگەتيكا, گەولوگيالىق بارلاۋ, كولىك جانە لوگيستيكا, ونەركاسىپ, قۇرىلىس, روبوتتەحنيكا مەن تاعى دا باسقا سالالاردى قامتيدى.