الماتىدا ءتۇتىنى بۋداقتاعان اۆتوكولىكتەردى تەكسەرۋ كۇشەيدى

قالالىق ەكولوگيا باسقارماسى مۇنداي تەكسەرىستى الماتى قالاسى اكىمدىگى بەكىتكەن ءىس-شارالار جوسپارىنا سايكەس تۇراقتى ەكولوگيالىق مونيتورينگ اياسىندا “Eco Almaty” جشس جول پوليتسياسى قىزمەتكەرلەرىمەن بىرگە جۇرگىزىپ وتىر. وسى ارقىلى اتالعان مەكەمەلەر اۋانىڭ لاستانۋىن ازايتىپ, پايدالانىلعان گازداردىڭ ۋلىلىعىن باعالاپ وتىرۋدى كوزدەيدى.

ماسەلەن, 2025 جىلى 4-10 قازان ارالىعىندا ماماندار 224 كولىكتى تەكسەرگەن. ونىڭ 138-ءى بەنزين, ياكي گازبەن جۇرسە, 23-ءىنىڭ زياندى قالدىقتاردىڭ رۇقسات ەتىلگەن مولشەرىنەن, 64 ديزەلدى كولىكتىڭ جارتىسىنا جۋىعى (26) ۋىتتىلىق پەن ءتۇتىن شىعارۋ نورمالارىنان اسىپ كەتكەن.

تۇراقتى تەكسەرۋلەر لاستانۋ كوزدەرىن ۋاقتىلى انىقتاپ, ونى جويۋ جونىندەگى شارالار قابىلداۋعا كومەكتەسەدى. بۇل قالاداعى اۋا ساپاسىن جاقسارتۋعا ىقپال ەتۋى ءتيىس.

سونداي-اق الماتىدا «اتموسفەرالىق اۋانى قورعاۋ سالاسىندا ارنايى ەكولوگيالىق تالاپتاردى ەنگىزۋ تۋرالى» اتموسفەرالىق اۋانى قورعاۋ قاعيدالارىنىڭ جوباسى ازىرلەنگەن بولاتىن. بۇل ەرەجەنىڭ باستى ماقساتى – مەگاپوليس اۋاسىنىڭ لاستانۋ دەڭگەيىن جۇيەلى تۇردە تومەندەتۋ. ەكولوگيا باسقارماسىنىڭ دەرەكتەرىنە سايكەس, قالاداعى بارلىق ءتۇتىننىڭ 60%-ى اۆتوكولىكتەردەن, قالعانى جەكە تۇرعىن ءۇي سەكتورى مەن ستاتسيونارلىق لاستانۋ كوزدەرىنەن ء(وندىرىس ورىندارى, مونشالار, قوعامدىق تاماقتانۋ, قۇرىلىس نىساندارى) شىعادى ەكەن.

جوعارىداعى ەرەجەنى شىن مانىندە جۇزەگە اسىرۋ ەكولوگيالىق جاعدايدى جاقسارتىپ, اسىرەسە قىسقى مەزگىلدە الماتىلىقتاردىڭ تۇتىنگە تۇنشىقپاي ءومىر سۇرۋىنە سەپتەسەدى.