ورال قالاسىنداعى ءاليا مولداعۇلوۆا اتىنداعى №38 مەكتەپ-ليتسەيدە «جاس ساقشى» كادەت سىنىبى اشىلدى. سىنىپقا قىزمەتتىك مىندەتىن اتقارۋ كەزىندە قازا تاپقان پوليتسيا اعا سەرجانتى مالىك رۋشانوۆتىڭ ەسىمى بەرىلگەن, دەپ حابارلايدى Egemen.kz.
كادەت سىنىبىنا بارلىعى 22 وقۋشى قابىلدانعان. ولار ارنايى باعدارلاما نەگىزىندە ءتارتىپ, قۇقىقتىق ءبىلىم مەن پاتريوتتىق تاربيە باعىتىندا ءبىلىم الادى. «بۇل باستاما جاس بۋىندى وتانعا قىزمەت ەتۋگە, جاۋاپكەرشىلىك پەن زاڭدىلىقتى قۇرمەتتەۋگە تاربيەلەۋگە باعىتتالعان» دەيدى ۇيىمداستىرۋشىلار.
مالىك ساعىن ۇلى رۋشانوۆ – باتىس قازاقستان وبلىسى, ءبورلى اۋدانى, وسپەن اۋىلىنىڭ تۋماسى. ول 1990 جىلدان باستاپ ىشكى ىستەر ورگاندارىندا قىزمەت اتقارىپ, 1995 جىلعى 7 قازاندا اقساي قالاسىندا قىزمەت بابىندا ەرلىكپەن قازا تاپقان.
سىنىپتىڭ اشىلۋ راسىمىنە ىشكى ىستەر ورگاندارى وكىلدەرى, سالا ارداگەرلەرى, مەكتەپ ۇجىمى مەن وقۋشىلار, مارقۇمنىڭ تۋىستارى جانە قوعام بەلسەندىلەرى كەلدى. جيىندا مالىك رۋشانوۆتىڭ ءومىر جولى مەن ەرلىگى تۋرالى ەستەلىك ايتىلىپ, جاس ۇرپاققا ونىڭ باتىرلىعى ۇلگى ەتىلدى.
ايتا كەتەيىك, باتىس قازاقستان وبلىسىندا بۇعان دەيىن ەكى «جاس ساقشى» كادەت سىنىبى اشىلعان بولاتىن. ونىڭ ءبىرى – اقساي قالاسىنداعى №5 ورتا مەكتەپتىڭ پوليتسيا پودپولكوۆنيگى يشبۋلات تورەعوجا ۇلى شەكتەباەۆ اتىنداعى سىنىبى بولسا, ەكىنشىسى ورال قالاسىنداعى ب.مومىش ۇلى اتىنداعى №46 مەكتەپتە – پوليتسيا سەرجانتى يۆات قۇبايدوللا ۇلى رۋشانوۆ اتىنداعى سىنىپ.
باتىس قازاقستان وبلىستىق پوليتسيا دەپارتامەنتىنىڭ قولداۋىمەن اشىلىپ جاتقان «جاس ساقشى» كادەت سىنىپتارى – جاس ۇرپاق بويىندا ءتارتىپ پەن پاتريوتيزم سەزىمىن قالىپتاستىرىپ, بولاشاق قۇقىق قورعاۋشىلاردى تاربيەلەيتىن العاشقى باسپالداققا اينالىپ كەلەدى.