باتىس قازاقستاندا ەكى زاۋىت قۇرىلىسى باستالادى

باتىس قازاقستان وبلىسى اكىمدىگىنىڭ ءباسپاسوز قىزمەتى حابارلاعانىنداي, ءوڭىر باسشىسى وسى كۇندەرى قىتاي حالىق رەسپۋبليكاسىندا قىزمەت بابىمەن ءجۇر. وڭىردە مەملەكەت باسشىسىنىڭ تاپسىرماسىنا سايكەس, قىتاي كاسىپكەرلەرىنىڭ قاتىسۋىمەن 14 ينۆەستيتسيالىق جوبا قولعا الىنعان. كورشى ەلدىڭ ينۆەستورلارى ەنەرگەتيكا, اۋىل شارۋاشىلىعى, دەنساۋلىق ساقتاۋ سياقتى بىرقاتار ماڭىزدى سالالارعا جالپى قۇنى 134 ميلليارد تەڭگەدەن استام قارجى سالۋعا نيەتتى. بۇل باعىتتا ەكى جاقتى ناقتى كەلىسىم بار. ەندى ساناۋلى كۇندەردەن كەيىن ەكى زاۋىتتىڭ قۇرىلىسى باستالادى. وعان قاجەتتى قۇرال-جابدىق تيەلگەن كونتەينەرلەردىڭ العاشقى لەگى قىتايدىڭ ۆەيفان قالاسىنان اقجايىققا جونەلتىلدى.

زاۋىتقا قاجەتتى قوندىرعىلاردىڭ العاشقى پارتياسىن تيەۋ راسىمىنە باتىس قازاقستان وبلىسىنىڭ اكىمى ناريمان تورەعاليەۆ باستاعان دەلەگاتسيا ارنايى قاتىستى.

«پرەزيدەنت قاسىم-جومارت توقاەۆ قحر توراعاسى سي تسزينپينمەن كەزدەسكەندە «قىتاي – قازاقستاننىڭ ەڭ ءىرى ساۋدا سەرىكتەسى. ورتاق ءىرى جوبالارىمىز جۇزەگە اسىرىلىپ جاتىر»,- دەپ ايتقان بولاتىن. مەملەكەت باسشىسى اتاپ وتكەندەي, ءبىز شيكىزاتقا تاۋەلدى بولماي, وڭدەۋ ونەركاسىبىن, اۋىل شارۋاشىلىعىن, ءوندىرىستى دامىتۋعا ەرەكشە ءمان بەرىپ وتىرمىز. بۇل جوبالار ءوڭىر ەكونوميكاسىنىڭ دامۋىنا ەلەۋلى سەرپىن بەرەدى», دەدى باتىس قازاقستان وبلىسىنىڭ اكىمى ناريمان تورەعاليەۆ.

جوسپار بويىنشا, ارنايى يندۋستريالدى ايماقتا الدىمەن قۋاتى 34 مەگاۆاتت بولاتىن گاز ەلەكتر ستانتسياسى سالىنادى. بۇل جوبا كەيىنگى ءوندىرىس ورىندارىن تۇراقتى ەنەرگيامەن قامتاماسىز ەتۋگە باعىتتالعان. سونىمەن قاتار مۇناي كاتاليزاتورلارىن قايتا وڭدەۋ زاۋىتىنىڭ قۇرىلىسى باستالماق.

وبلىستا جوسپارلانعان 14 جوبانىڭ ءبارىن ءبىر كونسورتسيۋم اتقارادى. قۇرامىنداعى بىرنەشە كومپانيا تەك ەنەرگەتيكا سالاسىن عانا ەمەس, اگروتەحنيكا, مۇناي, قۇرىلىس, دەنساۋلىق ساقتاۋ سالالارىن دا ينۆەستيتسيالايدى. باتىسقازاقستاندىق جۇمىسشى توپ شاندۋن پروۆينتسياسىنداعى كەشەندى ارالاپ, تىڭ تەحنولوگيامەن تانىستى.

قىتايلىق «VEGA Power» كومپانياسىنىڭ باس ديرەكتورى گە تسزيان اقجايىقتاعى جوبا كەزەڭ-كەزەڭىمەن جۇزەگە اسىرىلاتىنىن, العاشقى كەزەڭدە 30 ميلليون اقش دوللارى كولەمىندە ينۆەستيتسيا سالىناتىنىن اتاپ ءوتتى. جوبا تولىق جۇزەگە اسقاندا 10-نان استام ءونىم ءتۇرى شىعارىلادى.

وبلىس اكىمىنىڭ ايتۋىنشا, ينۆەستورلار وڭىردە تىركەلىپ, سالىق ءتۇسىمى جەرگىلىكتى بيۋدجەتكە باعىتتالۋى ءتيىس; جەرگىلىكتى كادرلار جۇمىسقا ورنالاستىرىلادى; بولاشاق مامانداردى وقىتۋ ينۆەستورلاردىڭ قاراجاتى ەسەبىنەن جۇرگىزىلەدى.

بۇدان بولەك, باتىس قازاقستان وبلىسى مەديتسينا سالاسى بويىنشا دا قىتايمەن بايلانىستى نىعايتادى. ورالدىق دەلەگاتسيا iKang Guobin Checkup Center ەمحاناسىنا بارىپ, قىتايدىڭ دەنساۋلىق ساقتاۋ جۇيەسىندەگى زاماناۋي ادىستەرمەن جانە مەديتسينالىق قىزمەت كورسەتۋدىڭ يننوۆاتسيالىق ۇلگىلەرىمەن تانىستى.

ايتا كەتۋ كەرەك, بيىل العاشقى جارتىجىلدىقتىڭ قورىتىندىسى بويىنشا باتىس قازاقستان وبلىسى تىكەلەي شەتەلدىك ينۆەستيتسيالار كولەمى بويىنشا رەسپۋبليكادا 3-ورىندا تۇر.

ايتا كەتەيىك, بۇل كەزدەسۋلەر ەلىمىزدىڭ قىتاي حالىق رەسپۋبليكاسىنداعى ەلشىلىگىنىڭ قولداۋىمەن ۇيىمداستىرىلعان.