قاسىم-جومارت توقاەۆ تۇركى مەملەكەتتەرى ۇيىمىنىڭ ءحىى سامميتىندە سويلەگەن سوزىندە قازىرگى جاعدايدا ەنەرگەتيكا ماسەلەسىنە دە باسا ءمان بەرۋ كەرەك ەكەنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنىڭ پىكىرىنشە, قازىر الەمدە اسا كۇردەلى ماسەلەگە اينالعان سۋ تاپشىلىعى تاياۋ ارادا ورتا ازياداعى ەڭ وزەكتى سىن-قاتەر بولۋى مۇمكىن.
«وزەن-سۋلاردىڭ ورتاق يگىلىك ەكەنىن ەسكەرە وتىرىپ, ونى ءتيىمدى پايدالانۋ ءۇشىن جاڭا تاسىلدەر كەرەك دەپ سانايمىز. سۋارۋ جۇيەسىنە تسيفرلىق باقىلاۋ ورناتۋ, تامشىلاتىپ سۋارۋ ادىستەرىن كەڭىنەن قولدانۋ, سۋ قويمالارىنىڭ تيىمدىلىگىن ارتتىرۋ جونىندە بىرلەسكەن باعدارلاما قابىلداۋعا بولادى. قازىر كاسپي تەڭىزى تارتىلىپ بارا جاتقانىن بىلەسىزدەر. بۇعان ءبارىمىز الاڭداپ وتىرمىز. قارت كاسپيدىڭ تۇركى جۇرتى ءۇشىن ورنى قاشاندا بولەك. ونى حالىقتارىمىزدىڭ اراسىنداعى دانەكەر دەۋگە بولادى. سوڭعى جىلدارى تەڭىز دەڭگەيىنىڭ تومەندەۋى ايماقتىڭ ەكولوگياسى مەن ەكونوميكاسىنا كەرى اسەرىن تيگىزىپ وتىر. بۇل – جاھاندىق اۋقىمداعى ماسەلە. مەن مۇنى شانحاي ىنتىماقتاستىق ۇيىمىنىڭ سامميتىندە جانە بىرىككەن ۇلتتار ۇيىمى باس اسسامبلەياسىنىڭ مەرەكەلىك سەسسياسىندا ايتتىم. ءبىز تامىرلاس جانە شەكارالاس ەلدەر رەتىندە كاسپي تەڭىزىنىڭ احۋالىن جاقسارتۋعا باسا ءمان بەرۋىمىز كەرەك. مەن تۇركى مەملەكەتتەرىن وسى باعىتتا كۇش بىرىكتىرىپ, بىرلەسكەن جوبالار ازىرلەۋگە, حالىقارالىق باستامالاردى قولداۋعا شاقىرامىن. قازاقستان بىرىككەن ۇلتتار ۇيىمىنىڭ قولداۋىمەن كەلەسى جىلى ساۋىردە وڭىرلىك سامميت وتكىزۋدى جوسپارلاپ وتىر. تاقىرىپ: «تۇراقتى بولاشاق جولىنداعى ورتاق كوزقاراس». ءبىز تۇركى ەلدەرى وسى ءسامميتتىڭ جۇمىسىنا جوعارى دەڭگەيدە بەلسەنە قاتىسادى دەپ ۇمىتتەنەمىز», دەدى قاسىم-جومارت توقاەۆ.