قاسىم-جومارت توقاەۆ, ەڭ الدىمەن, ەرەكشە قوناقجايلىق كورسەتكەنى ءۇشىن ازەربايجان پرەزيدەنتى يلحام اليەۆكە ريزاشىلىعىن ءبىلدىرىپ, بۇگىنگى جيىننىڭ ءمان-ماڭىزى ايرىقشا, كۇن ءتارتىبى وزەكتى ەكەنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى جاھاندىق قاۋىپسىزدىك جۇيەسى كۇردەلى كەزەڭدى باستان وتكەرىپ جاتقانىن اتاپ ءوتىپ, قاقتىعىستار مەن شيەلەنىستەر, گەوساياسي تەكەتىرەستەر الەمنىڭ كەز كەلگەن مەملەكەتىنە اسەر ەتەتىن قاۋىپتى ۇردىسكە اينالعانىنا توقتالدى.
«وسىنداي الماعايىپ زاماندا 30 جىلدان استام ۋاقىت شەشىمىن تاپپاعان شيەلەنىسكە قاتىستى ازەربايجان مەن ارمەنيانىڭ بەيبىتشىلىك دەكلاراتسياسىنا قول قويعانىن ەرەكشە اتاپ وتكىم كەلەدى. بۇل تۇراقتىلىق پەن ەكونوميكالىق ورلەۋگە جول اشاتىن تاريحي مامىلە بولدى. قازىر الەمدەگى گەوساياسي احۋال اسا كۇردەلى, سوندىقتان تۇركى ەلدەرى ورتاق مۇددە جولىندا كۇش جۇمىلدىرۋعا ءتيىس. بۇگىندە جاھان جۇرتى ءبىزدى زور سىن-قاتەرلەرگە توتەپ بەرە الاتىن, بەدەلى مىقتى, ىنتىماعى جاراسقان مەملەكەتتەر رەتىندە تانيدى. بىرقاتار ەل ءبىزدىڭ ۇيىمعا ەرەكشە قىزىعۋشىلىق تانىتۋدا. بۇل رەتتە قازاقستان ىنتىماقتاستىق اياسىن كەڭەيتۋگە باعىتتالعان «تۇركى مەملەكەتتەرى ۇيىمى+» فورماتىن قۇرۋ يدەياسىن قولدايدى. وسى باستاما ءبىزدىڭ ۇيىمنىڭ حالىقارالىق بەدەلىن ارتتىرۋعا جول اشاتىنى ءسوزسىز», دەدى قاسىم-جومارت توقاەۆ.