مەديتسيناداعى تسيفرلاندىرۋ ۇدەرىسى بۇگىندە جاڭا دەڭگەيگە شىعىپ جاتىر. ستۋدەنتتەردەن قۇرالعان «Enactus» كومانداسى جاساندى ينتەللەكت نەگىزىندەگى تەلەمەديتسينالىق جۇيە جاساپ, ونى تاجىريبەگە ەنگىزۋدى باستادى. بۇل جوبا دارىگەر مەن پاتسيەنت اراسىنداعى بايلانىستى جەڭىلدەتىپ قانا قويماي, دياگنوزدى ءدال قويادى, دەپ جازادى Egemen.kz.
جاڭا جۇيەنىڭ ەرەكشەلىگى – جاساندى ينتەللەكت دارىگەر مەن ناۋقاستىڭ اراسىنداعى «كومەكشى» ءرولىن اتقارادى. ناۋقاس اۋرۋ بەلگىلەرىن ەنگىزگەندە, باعدارلاما ولاردى تالداپ, ىقتيمال اۋرۋ تۇرلەرىن قاراپايىم تىلدە تۇسىندىرەدى. مىسالى, «باس اۋرۋى» نەمەسە «قىزۋ» سياقتى سيمپتومدار جازىلسا, جۇيە ولاردىڭ سەبەپتەرىن ءتۇسىندىرىپ, ءارى قارايعى قادامداردى ۇسىنادى. ەگەر جاعدايدىڭ شۇعىل ەكەنىن انىقتاسا, جەدەل جاردەم شاقىرۋ قاجەتتىگىن حابارلايدى. بۇل – ناۋقاستاردىڭ بەلگىلەرىن دۇرىس سيپاتتاي الماۋىنان تۋىندايتىن قاتەلىكتەردى ازايتىپ, شۇعىل كومەكتىڭ ۋاقىتىلى جەتۋىنە جول اشادى.
جوبا اۆتورلارىنىڭ ايتۋىنشا, جاساندى ينتەللەكت تەك رەسمي مەديتسينالىق حاتتامالار مەن حالىقارالىق نۇسقاۋلىقتارعا سۇيەنىپ جۇمىس ىستەيدى. ينتەرنەتتەگى بەيرەسمي اقپاراتتى قولدانبايدى. ء«بىزدىڭ ماقسات – دياگنوستيكا ساپاسىن ارتتىرىپ, دارىگەردىڭ جۇمىسىن جەڭىلدەتۋ. قازىرگى كورسەتكىش بويىنشا جۇيەنىڭ دالدىگى 98 پايىزعا جەتىپ وتىر. الداعى ۋاقىتتا پلاتفورماعا ناۋقاستىڭ اۋرۋ تاريحى, تالداۋ ناتيجەلەرى, رەتسەپتى مەن ەمدەۋ جوسپارى ەنگىزىلىپ, بارلىعى ءبىر جەردەن قولجەتىمدى بولادى», – دەيدى جوبانى ازىرلەۋشىلەر.
جۇيە تەك باستاپقى دياگنوستيكامەن شەكتەلمەيدى. وندا بەينە-كەڭەس مۇمكىندىگى بار. ناۋقاس تاۋلىكتىڭ كەز كەلگەن ۋاقىتىندا كەزەكشى دارىگەرمەن بايلانىسىپ, العاشقى كەڭەس الا الادى. بۇل جەدەل جاردەم جەتكەنگە دەيىن دۇرىس ارەكەت جاساۋعا كومەكتەسەدى. ال دارىگەر ءۇشىن جاساندى ينتەللەكت پاتسيەنتتىڭ شاعىمدارىن جۇيەلەپ, الدىن الا مەديتسينالىق ەسەپ دايىندايدى. بۇل ۋاقىت ۇنەمدەۋگە, قۇجات اينالىمىن جەڭىلدەتۋگە جانە قاتەلىكتى ازايتۋعا مۇمكىندىك بەرەدى.