الماتى — بىشكەك تاس جولىندا بولعان جول اپاتىنان سەگىز ادام قازا تاپتى, دەپ حابارلايدى Egemen.kz الماتى وبلىسى پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
الماتى وبلىسىنىڭ پد مالىمەتىنشە, الماتى – بىشكەك اۆتوجولىنىڭ 107-شاقىرىمىندا بولعان جول-كولىك وقيعاسى فاكتىسى بويىنشا پوليتسيا قىزمەتكەرلەرى سوتقا دەيىنگى تەرگەۋدى باستادى.
«الدىن الا دەرەكتەرگە سايكەس, Lexus كولىگى قارسى جولاققا شىعىپ كەتىپ, Toyota Alphard اۆتوكولىگىمەن سوقتىعىسقان. جول اپاتى سالدارىنان العان جاراقاتتارىنان سەگىز ادام وقيعا ورنىندا كوز جۇمدى, تاعى ەكەۋى اۋرۋحاناعا جەتكىزىلدى», دەپ حابارلادى ۆەدومستۆونىڭ ءباسپاسوز قىزمەتى.
قازىر وقيعانىڭ ءمان-جايىن انىقتاۋ ءۇشىن بارلىق قاجەتتى تەرگەۋ شارالارى جۇرگىزىلىپ جاتىر.
پوليتسيا جۇرگىزۋشىلەرگە جول قوزعالىسى ەرەجەلەرىن قاتاڭ ساقتاپ, جولدا بارىنشا مۇقيات بولۋدى ەسكەرتتى.