گەرمانيانىڭ حينتەرتسارتەن قالاسىندا شاڭعىمەن تۇعىردان سەكىرۋدەن FIS ءتۋرنيرى اياقتالدى. جارىستا دانيل ۆاسيلەۆ كۇمىس مەدالدى موينىنا ءىلدى. وتانداسىمىز تەك اۋستريالىق يۋليان شميدتەن قالىپ قويدى. قولا مەدالدى سلوۆەنيالىق روك وبلاك ەنشىلەدى.
ماجارستاننىڭ سومباتحەي قالاسىندا ۇيىمداستىرىلعان «Challenge Cup» ءتۋرنيرىنىڭ سوڭعى كەزەڭىندە ەلىمىزدىڭ سپورتتىق گيمناسشىلارى جاقسى ونەر كورسەتتى. ەركىن جاتتىعۋدا دميتري پوتانين جەڭىمپاز اتاندى. شەشۋشى تۇستا ول باستى قارسىلاستارى كەۆين پەنەۆ (بولگاريا) پەن ارتەم دولگوپياتتى (يزرايل) باسىپ وزدى. «كەرمە» جاتتىعۋىندا ميلاد كاريمي توپ جاردى. شەشۋشى تۇستا ول وڭتۇستىك امەريكادان كەلگەن قوس وعىلان – انحەل باراحاس (كولۋمبيا) پەن لۋچانو لەتەلەردى (چيلي) ارتقا تاستادى.
قىتايدىڭ تسينداو قالاسىندا وتكەن گران-پري تۋرنيرىندە وتاندىق دزيۋدوشىلارىمىز ءساتسىز ونەر كورسەتتى. جارىس جولىنا شىققان سەگىز سپورتشىنىڭ اراسىنان ەڭ ءتاۋىر ناتيجەگە ادىلەت المات قول جەتكىزدى. قولا مەدال ءۇشىن تارتىستا ول تۇركيالىق ۆەدات الباراقتان ۇتىلىپ, بەسىنشى ورىندى قاناعات تۇتتى.
قۇرلىقتىق حوككەي ليگاسىندا (قحل) قاتارىنان ءتورت كەزدەسۋدە ۇتىلعان «بارىستىڭ» بۇل جولى باعى جاندى. باسەكە بارىسىندا ءنوۆوسىبىردىڭ «سيبير» كلۋبىنان ەكى رەت ەكى شايبا ايىرماشىلىعىمەن ۇتىلىپ جاتقان جەرلەستەرىمىز اقىرىندا جەڭىستى قارسىلاستاردىڭ ۋىسىنان ج ۇلىپ اكەتتى. ەسەپ – 6:4. استانالىقتاردىڭ ساپىندا سەمەن سيمونوۆ (ەكى رەت), دميتري برەۋس, دجەيك ماسسي , يەن ماككوشەن, مەيسون مورەللي مەرگەندىك تانىتتى.
فۋتبولدان ەلىمىز چەمپيوناتىنىڭ ءبىرىنشى ليگاسىندا اقتاۋدىڭ «كاسپي» كلۋبى توپ جاردى. ولار 59 ۇپاي جيدى. وسى ناتيجەسىنىڭ ارقاسىندا ماڭعىستاۋ وبلىسىنىڭ كومانداسى پرەمەر-ليگاعا جولداما الدى.
قىتايدىڭ باس شاھارى بەيجىڭدە WTA مەن اتر 1000 تۋرنيرلەرى جالعاسىپ جاتىر. الەمنىڭ ەڭ ۇزدىك تەننيسشىلەرى باس قوسقان جارىستىڭ العاشقى اينالىمىندا بوس بولعان ەلەنا رىباكينا كەلەسى كەزەڭدە امەريكالىق كەتي ماكنەلليدى 7:5, 4:6, 6:3 ەسەبىمەن ەڭسەردى. ودان كەيىن ەلىمىزدىڭ ءبىرىنشى راكەتكاسى گەرمانيالىق ەۆا ليسپەن شەبەرلىك بايقاستى. بۇل ويىندا ەلەنا قارسىلاسىنا جول بەردى – 3:6, 6:1, 4:6. يۋليا پۋتينتسەۆا مەن الەكساندر بۋبليك تۇساۋكەسەر كەزدەسۋلەرىندە جەڭىلىستىڭ كەرمەك ءدامىن تاتتى. سەربيالىق الەكساندرا كرۋنيچپەن جۇپتاسىپ ويناعان اننا دانيلينا ءبىرىنشى كەزەڭدە ماگدوي ليننەت (پولشا) پەن كلارا تاۋسوننان (نورۆەگيا) باسىم ءتۇستى – 6:4, 6:2.
فۋتبولدان ەلىمىزدىڭ پرەمەر-ليگاسىنىڭ 24 تۋر ويىندارى وتە ناتيجەلى بولدى. «جەڭىس» ءوز الاڭىندا «تۇراندى» 6:3 ەسەبىمەن ۇتتى. بۇل ماتچتا دىنمۇحامەد قارامان, ۆسەۆولود سودوۆسكي, زۋراب تەۆدازدە ەكى گولدان سوقتى. «اتىراۋ» جەزقازعاندا جەرگىلىكتى « ۇلىتاۋدىڭ» 5:1 ەسەبىمەن تاس-تالقانىن شىعاردى. قوناقتاردىڭ ويىنشىسى كونستانتين دوروفەەۆ دۋبل اۆتورى اتاندى. «اقتوبە» مەن «قىزىلجار» اراسىنداعى باسەكەنىڭ تاعدىرىن 8-مينۋتتا دانيەل سوسا سوققان جالعىز عانا دوپ شەشتى – 1:0. كوكشەتاۋدا «وقجەتپەس» «استانادان» جەڭىلدى – 1:2. ەلوردالىق كلۋبتىڭ ەنشىسىندەگى ەكى دوپتى دا نازمي گريپشي سالدى. سەمەيدە «ەلىماي» «ورداباسىدان» باسىم ءتۇستى – 2:1. «توبىل» مەن «قايسار» اراسىنداعى ماتچ 1:0 ەسەبىمەن قوستانايلىقتاردىڭ پايداسىنا شەشىلدى.