قول كۇرەسىنەن بولگاريادا ءوتىپ جاتقان الەم چەمپيوناتىندا 16 جاستاعى ۇلبوسىن ەلمۇرات سەنساتسيا جاسادى. ول فينالدا ايەلدەر اراسىندا 13 مارتە تورتكۇل دۇنيەنىڭ تەڭدەسسىزى دەپ تانىلعان سلوۆاكيالىق ليۋسيا دەبرانوۆانى ايقىن باسىمدىقپەن ۇتتى. ونىڭ الدىندا عانا يبراگيمدەر وتباسىنان شىققان اعايىندى ءۇش سپورتشى – بەكنۇر, ازامات, ادىلەت باس جۇلدەنى ولجالاعان ەدى. سونداي-اق نۇرسۇلتان الدان مەن ىرىستى ورازحان دا ءوز سالماق دارەجەلەرىندە چەمپيون اتاندى.
تاەكۆوندودان پولشادا شىمىلدىعى تۇرىلگەن حالىقارالىق تۋرنيردە نوديرا احمەتوۆا كۇمىس مەدال ەنشىلەدى. جارتىلاي فينالدا بولگاريالىق الەكساندرا گيورگيەۆانى ۇتقان جەرلەسىمىز شەشۋشى سىندا يسپانيالىق ۆيولەتتا ارريباستان ايلاسىن اسىرا المادى.
فۋتبولدان ەلىمىزدىڭ ايەلدەر قۇراماسى الداعى ايدا ازەربايجانعا قارسى جولداستىق كەزدەسۋ وتكىزۋدى جوسپارلاپ وتىر. بۇل ماتچتار 24–27 قازان ارالىعىندا شىمكەنتتەگى قاجىمۇقان مۇڭايتپاسوۆ اتىنداعى ستاديوندا وتەدى.
قازىردە ەلىمىزدىڭ بىرقاتار تەننيسشىسى قىتايدا باق سىناپ جاتىر. حانچجوۋداعى اتر 250 تۋرنيرىندە الەكساندر بۋبليك اۋستراليالىق الەكساندر ۆۋكيچ, چەحيالىق داليبور سۆرچيناعا سان سوقتىرىپ, جارتىلاي فينالدا كورت قوجايىنا ۆۋ ءيبيندى 6:3, 6:3 ەسەبىمەن قاپى قالدىردى. ەندى بۋبليك باس جۇلدە ءۇشىن تارتىستا فرانتسيالىق ۆالەنتەن رويەمەن كۇش سىناسادى. الەكساندر شەۆچەنكو چەدۋدەگى جارىستىڭ جارتىلاي فينالىندا ءسۇرىندى. ونى يتاليالىق لورەنتسو مۋزەتتي توقتاتتى.
27 قىركۇيەكتە ازەربايجاننىڭ ەۆلاح قالاسىندا تمد ويىندارىنىڭ الاۋى تۇتانادى. بۇل جارىستا بوكستان ەلىمىزدىڭ جاسوسپىرىمدەر قۇراماسىنىڭ اعا جاتتىقتىرۋشىسى باعدات وڭعاربەكوۆ مىنا شاكىرتتەرىنە سەنىم ارتىپ وتىر: 46 كگ – اڭسار ۇسەنحان, 48 كگ – قورعانبەك بالتين, 50 كگ – اسلان جەڭىسباەۆ, 52 كگ – ەدىگە نۇرقوجا, 54 كگ – جالعاس اپباز, 57 كگ – ۇلاس ءالىمجان, 60 كگ – يسلام سۇلەيمەنوعلى, 63 كگ – الديار باياندينوۆ, 66 كگ – ءامىر رامادان, 70 كگ – دارىن تولەگەن, 75 كگ – تورەعالي سەيدۋللاەۆ, 80 كگ – باۋىرجان الياكپار, + 80 كگ – ەركەتاڭ جارقىنبەك.
فۋتبولدان قازاقستان پرەمەر-ليگاسىنىڭ 8-تۋرىنىڭ كەيىنگە شەگەرىلگەن ماتچىندا الماتىنىڭ «قايراتى» ورتالىق ستاديوندا استانانىڭ «جەڭىسىن» قابىلدادى. باسەكە بارىسىندا العاشقى ەكى گولدى 11, 37-مينۋتتاردا داستان ساتباەۆ سوقتى. ەكىنشى كەزەڭنىڭ باسىندا يسلامبەك قۋات ەسەپ ايىرماشىلىعىن قىسقارتقانىمەن, 80-مينۋتتا برازيليالىق لەگيونەر ريكاردينو ويىننىڭ نۇكتەسىن قويدى. ناتيجەسىندە, 3:1 ەسەبىمەن جەڭىسكە جەتىپ, 52 ۇپاي العان «قايرات» جارىس كەستەسىندە جەكە-دارا كوش باستادى. «استانا» كلۋبىنىڭ الماتىلىقتاردان ەكى ۇپايى كەم.
قۇرلىقتىق حوككەي ليگاسىنىڭ (قحل) كەزەكتى تۋرىندا «بارىس» مينسكىدە جەرگىلىكتى «ديناموعا» قارسى وينادى. باسەكە ايدىن يەلەرىنىڭ باسىمدىعىمەن ءوتىپ, قاقپامىزعا 42 سوققى جاسادى. استانالىقتار سەگىز سوققىمەن عانا شەكتەلدى. دەگەنمەن قاقپاشىنىڭ سەنىمدى ويىنىنىڭ ارقاسىندا نەگىزگى ۋاقىتتا ەسەپ اشىلعان جوق. وۆەرتايمدا «دينامو» ساپىنداعى امەريكالىق لەگيونەر سەم اناس نىسانانى ءدال كوزدەپ, كومانداسىنا جەڭىس سىيلادى – 1:0.