قوستاناي وبلىسىندا «ۋچاسكە» جەدەل الدىن الۋ ءىس-شاراسى اياسىندا وتكەن رەيد بارىسىندا ءىرى كولەمدەگى ۇرلىق اشكەرەلەندى. پوليتسيا قىزمەتكەرلەرى وراق باسىنان 54 توننا بيداي ۇرلاعان قاسكويلەردىڭ جولىن كەستى, دەپ حابارلايدى Egemen.kz.
رەيد بارىسى بىلاي بولعان: جەرگىلىكتى ۋچاسكەلىك ينسپەكتور مەيىربەك نۇرگەلدين مەن پوليتسيا ءبولىمى باستىعىنىڭ ورىنباسارى سەرىك بەكەتباەۆ «اۋليەكول – ديەۆ» تاسجولىندا تىركەمەسى بار كاماز-دى توقتاتادى. تەكسەرىس بارىسىندا جۇك قۇجاتتارى دۇرىس بولماعان. وعان قوسا, جۇرگىزۋشى استىقتىڭ قايدان الىنعانىن جانە قايدا اپارا جاتقانىن دا ناقتى اشىپ ايتا الماعان.
جۇك كولىگى پوليتسيا بولىمىنە جەتكىزىلگەن سوڭ, بيدايدىڭ «ديەۆ اگروفيرماسى» اۋماعىنان ۇرلانعانى انىقتالدى. كەيىنىرەك امانقاراعاي اۋىلىندا جالعا الىنعان قويمادان ءۇش كۇن بۇرىن ۇرلانعان بيداي تابىلدى. ۇرلانعان استىقتىڭ جالپى كولەمى 54 توننا بولادى. شارۋاشىلىققا كەلتىرىلگەن زالالدىڭ مولشەرى شامامەن 6,5 ميلليون تەڭگەگە باعالانعان.
وبلىستىق پد الدىن الا ءسوز بايلاسقان بىرنەشە ادام جاساعان ۇرلىق فاكتىسى بويىنشا قىلمىستىق ءىس قوزعادى. پوليتسيا مالىمەتىنشە, ۇرىلاردىڭ ىشىندە شارۋاشىلىق قىزمەتكەرى مەن نوۆوسەلوۆ اۋىلىنىڭ تۇرعىنى دا بار. تەرگەۋ جۇمىسىنا اۋدان پركۋراتۋراسى دا اتسالىسىپ جاتىر.
«ديەۆ اگروفيرماسى» جشس-نىڭ اتقارۋشى ديرەكتورى ولەگ دانيلەنكونىڭ ايتۋىنشا, ۇرلىققا باسقا قىزمەتكەرلەردىڭ دە قاتىسى بولۋى مۇمكىن. شارۋاشىلىق باسشىسى بولاشاقتا مۇنداي جاعدايلاردى بولدىرماۋ ءۇشىن كاسىپورىندا بەينەباقىلاۋ كامەرالارىن ورناتۋ, كولىكتى باقىلاۋ جۇيەسىن جەتىلدىرۋ جانە قىزمەتكەرلەرمەن قىلمىستىڭ الدىن الۋ ماقساتىندا اڭگىمە جۇرگىزۋ ءتارىزدى قاۋىپسىزدىك شارالارىن كۇشەيتۋدى جوسپارلاپ وتىر.
قوستاناي وبلىسى