11–19 قازان ارالىعىندا الماتىدا «اتر 250 Almaty Open» ءتۋرنيرى وتەدى. قازىردىڭ وزىندە بىرقاتار تانىمال تەننيسشىلەردىڭ وسى جارىسقا قاتىساتىنى بەلگىلى بولىپ وتىر. باق سىناۋشىلار قاتارىندا رەسەيلىك دانيل مەدۆەدەۆ پەن كارەن حاچانوۆ, گرەكيالىق ستەفانوس تسيتسيپاس, ەلىمىزدىڭ ءبىرىنشى راكەتكاسى الەكساندر بۋبليك, تاعى باسقا ساڭلاقتار بار.
ءتۋرنيردىڭ تۇساۋى 2020 جىلى استانادا كەسىلدى. سول جارىستىڭ فينالىندا اۋستراليالىق دجون ميللمان مەن فرانتسيالىق ادريان ميننارينو كەزدەسىپ, العاشقىسى 7:5, 6:1 ەسەبىمەن جەڭىسكە جەتتى. كەلەسى جىلى وڭتۇستىك كورەيانىڭ وكىلى كۆون سۋن-ۋ مەن اۋستراليادان كەلگەن دجەيمس داۆكورت باس جۇلدەنى ءوزارا ساراپقا سالدى. بۇل تارتىستا ازيالىقتىڭ اسىعى الشىسىنان ءتۇستى. 2020 جىلى نوۆاك دجوكوۆيچكە تەڭ كەلەر ەشكىم تابىلمادى. اتاعى جەر جارعان سەربيانىڭ ساڭلاعى شەشۋشى باسەكەدە ستەفانوس تسيتسيپاسقا سان سوقتىردى. 2023 جىلى ادريان ميننارينونىڭ اسىعى الشىسىنان ءتۇستى. فينالدا ول سەباستيان كوردانى قاپى قالدىردى.
سول جىلدارى وتكەن جۇپتىق سايىستاردا ساندەر جيللە/يوران فليگەن (گەرمانيا), سانتياگو گونسالەس (مەكسيكا)/اندرەس مولتەني (ارگەنتينا), نيكولا مەكتيچ/ماتە پاۆيچ (حورۆاتيا), ناتانيەل لەممونس/دجەسون ۋيتروۋ (اقش) جەڭىمپاز اتاندى. 2021 جىلى ايەلدەر اراسىندا دا جارىس ۇيىمداستىرىلىپ, بەلگيالىق ەليسون ۆان ۋيتۆانك تەڭدەسسىز دەپ تانىلدى. فينالدا ول ءبىزدىڭ يۋليا پۋتينتسەۆادان باسىم ءتۇستى.
بىلتىردان بەرى «اتر 250 Almaty Open» دەگەن اتاۋعا يە بولعان تۋرنير الاتاۋ باۋرايىندا وتە باستادى. كارەن حاچانوۆ فينالدا كانادالىق گابريەل دياللونى ۇتتى. ەسەپ – 6:2, 5:7, 6:3. ەرلەردىڭ جۇپتىق سىنى ءۇندىستاننىڭ ۇزدىكتەرى ريتۆيك چوۋداري بولليپاللي/اردجۋن كادحەنىڭ جەڭىسىمەن اياقتالدى.
بيىل دا الەمنىڭ بىرقاتار مەملەكەتىنەن كەلگەن اتاقتى تەننيسشىلەر الماتىعا كەلەدى. سولاردىڭ قاتارىندا بىلتىرعى جارىستىڭ جەڭىمپازى ك.حاچانوۆ تا بار. 29 جاستاعى ماسكەۋدىڭ تۋماسى بۇل كۇندەرى توپ-10-دىقتى تۇيىندەپ تۇر. ول اقش پەن اۋستراليانىڭ اشىق بىرىنشىلىكتەرىنىڭ جارتىلاي فينالىندا وينادى. اتر تۋرنيرلەرىن جەتى رەت ۇتىپ, 2021 جىلى توكيو وليمپياسىندا كۇمىس مەدالعا يە بولدى.
ك.حاچانوۆپەن تۇيدەي قۇرداس دانيل مەدۆەدەۆ قازىرگى كەزدە الەمدىك رەيتينگتە 18-ورىندا. كەزىندە ۇزدىكتەر كوشىن باستاعان ماسكەۋلىك اتر-ءدىڭ 20 تۋرنيرىندە توپ جارعان. 2021 جىلى US Open-ءدى ۇتتى. ءۇش رەت اۋستراليانىڭ اشىق بىرىنشىلىگىنىڭ فينالىنا دەيىن جەتتى.
26 جاستاعى ستەفانوس تسيتسيپاس اتر دودالارىندا 12 رەت باس جۇلدەنى ولجالاپ, وسىدان بىرەر جىل بۇرىن الەمنىڭ ءۇشىنشى راكەتكاسى اتاندى. مەلبۋرن مەن پاريجدەگى «ۇلكەن دۋىلعا» ساناتىنداعى جارىستاردىڭ فينالىندا وينادى. قازىردە گرەك تەننيسشىسى اتر رەيتينگىندە 28-ورىندا تۇر.