قازاقستاندا كوممۋنالدىق قىزمەتتەردى تولەۋ ەرەجەلەرى وزگەردى. ەندى تۇرعىندار ءۇشىن ەسەپ ايىرىسۋ جۇيەسى ىڭعايلى ءارى ءبىرىزدى بولادى, دەپ جازادى Egemen.kz.
Krisha.kz مالىمەتىنشە, قازاقستاندا كوممۋنالدىق قىزمەتتەردى تولەۋ ەرەجەلەرى وزگەرىپ, جاڭا جۇيە 20 قىركۇيەكتەن باستاپ كۇشىنە ەنەدى. ەندى بارلىق تولەمدەر ءبىر شوتتا بىرىكتىرىلىپ, تۇرعىندارعا ىڭعايلى فورماتتا ۇسىنىلادى. ەلەكتر ەنەرگياسى, سۋ, قوقىس شىعارۋ جانە وزگە دە قىزمەتتەر ءۇشىن بولەك تۇبىرتەكتەر بولمايدى, ولاردىڭ بارلىعى بىرىڭعاي ەسەپ ايىرىسۋ ورتالىعى (بەو) ارقىلى دايىندالاتىن بىرىڭعاي تولەم قۇجاتىنا ەنگىزىلەدى. شوتتى ەلەكتروندى تۇردە جەكە كابينەت ارقىلى الۋعا بولادى, ال قالاعان جاعدايدا قاعاز تۇرىندە دە راسىمدەلەدى.
بارلىق تولەمدەر الدىمەن بەو-نىڭ ترانزيتتىك شوتىنا ءتۇسىپ, ءۇش كۇن ىشىندە ءتيىستى قىزمەت كورسەتۋشىلەرگە اۋدارىلادى. بۇل ءتاسىل ەسەپ ايىرىسۋدى بارىنشا اشىق ءارى باقىلاۋدى قاتاڭ ەتۋگە باعىتتالعان.
سونىمەن قاتار كوممۋنالدىق تولەمدەردىڭ بىرىڭعاي مەرزىمى بەكىتىلدى. ەندى ءار ايدىڭ تولەمىن كەلەسى ايدىڭ 25-ىنە دەيىن وتەۋ قاجەت. بۇرىن تولەم مەرزىمى كەلىسىمشارتقا نەمەسە جەرگىلىكتى زاڭناماعا بايلانىستى ءارتۇرلى بولاتىن, ەندى بۇل ەرەجە بارشاعا ورتاق. قىزمەت كورسەتۋشىلەر جىبەرىلگەن قاتەلەر ءۇشىن جاۋاپ بەرەدى, ال اكىمدىك تولەمدەر مەن ەسەپ-قيساپتى تەكسەرۋگە قۇقىلى. شاعىم قابىلداۋ ءتارتىبى دە وزگەردى: ەندى ارىزدار تەك قول قويىلىپ, فوتو نەمەسە بەينەماتەريالدارمەن دالەلدەنسە عانا قارالادى.