ورتالىق كوممۋنيكاتسيالار قىزمەتىندە «تسيفرلىق ترانسفورماتسيا جانە سالالاردى تسيفرلاندىرۋ» تاقىرىبىندا ءباسپاسوز كونفەرەنتسياسى ءوتتى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى وكىلدەرى تسيفرلىق سالاداعى وزگەرىستەر تۋرالى ايتىپ بەردى.
ۆيتسە-مينيستر دميتري مۋن مەملەكەتتىك قىزمەتتەردىڭ تسيفرلىق فورماتقا كوشۋ بارىسى تۋرالى كەڭ كولەمدە باياندادى. ونىڭ ايتۋىنشا, تسيفرلىق ترانسفورماتسيا – بۇل جاڭا تەحنولوگيالاردى ەنگىزۋ عانا ەمەس, حالىقتىڭ كۇندەلىكتى ءومىرىن جەڭىلدەتۋدىڭ ناقتى قۇرالى. كەيىنگى ءتورت جىلدا مەملەكەتتىك ورگانداردىڭ 1 500-دەن استام بيزنەس بارىسى قايتا قارالىپ, ولاردىڭ باسىم بولىگى وڭتايلاندىرىلعان. ء«بىز جۇرگىزىپ جاتقان رەينجينيرينگتىڭ باستى ماقساتى – ازاماتتار ءۇشىن قىزمەتتى جەڭىلدەتۋ, قولمەن جاسالاتىن وپەراتسيالاردى قىسقارتۋ جانە اۆتوماتتاندىرۋ دەڭگەيىن ارتتىرۋ. بۇرىن قاعازباستىلىق كوپ بولاتىن, بۇگىندە كوپتەگەن قىزمەت تولىقتاي ونلاينعا كوشىرىلدى», دەدى دميتري مۋن.
مىسالى, بۇرىن تالاپكەرلەر قۇجات جيناپ, ۋنيۆەرسيتەتكە بارىپ وتكىزۋگە مىندەتتى بولسا, قازىر بارلىعى eGov پورتالى ارقىلى ونلاين جۇرگىزىلەدى. «ابيتۋريەنتتەرگە جاتاقحاناعا ءوتىنىش بەرۋ, ەمحاناعا تىركەلۋ سەكىلدى بىرنەشە بولەك ءراسىمدى ورىنداۋعا تۋرا كەلەتىن. قازىر بۇل قىزمەتتەردىڭ بارلىعى پرواكتيۆتى تۇردە ۇسىنىلادى. ناتيجەسىندە, ستۋدەنتتەر مەن اتا-انالاردىڭ ۋاقىتى مەن قارجىسى ۇنەمدەلدى. ناقتىراق ايتساق, جىلىنا 380 ميلليون تەڭگەدەن استام قارجى ۇنەمدەلىپ وتىر», دەدى ۆيتسە-مينيستر.
سونداي-اق جول-كولىك وقيعالارىن راسىمدەۋدە «ەۋروپروتوكول» جۇيەسى ەنگىزىلدى. ەندى جەڭىل اپاتتاردى پوليتسيا شاقىرماي-اق, ءموبيلدى قوسىمشا ارقىلى تىركەۋگە بولادى. «بۇرىن ساقتاندىرۋ تولەمىن الۋ ءۇشىن 40 كۇنگە دەيىن ۋاقىت قاجەت بولسا, قازىر بۇل مەرزىم 5 كۇنگە قىسقاردى. جىلدىڭ العاشقى جارتىسىندا 3 مىڭنان استام ازامات وسى قىزمەتتى پايدالانعان. بۇل – حالىقتىڭ تسيفرلىق شەشىمدەرگە دەگەن سەنىمى ارتقانىن بىلدىرەدى», دەپ اتاپ ءوتتى د. مۋن.
سونىمەن قاتار ازاماتتاردى بورىشكەرلەر تىزىمىنەن شىعارۋ ءراسىمى دە تولىق اۆتوماتتاندىرىلعان. بۇرىن جەكە سوت ورىنداۋشىلارىنا شىعىندالىپ, ۇزاق كۇتۋ قاجەت بولسا, قازىر ءبارى ونلاين جۇزەگە اسادى.
تسيفرلاندىرۋ تەك الەۋمەتتىك جانە قارجىلىق سالادا عانا ەمەس, ەكولوگيادا دا تيىمدىلىگىن كورسەتىپ وتىر. ورمان ءورتىن ەرتە انىقتاۋ ءۇشىن كوكشەتاۋ مەن بۋراباي ۇلتتىق پاركتەرىندە, ەرتىس ورمانى مەن مەدەۋ وڭىرىندە 148 بەينەباقىلاۋ كامەراسى ورناتىلعان. «بۇل تەحنولوگيا ءورتتى ءۇش ەسە جىلدام انىقتاۋعا, جانۋ اۋماعىن 20 ەسەگە ازايتۋعا جانە شىعىنداردى 15 ەسەگە قىسقارتۋعا مۇمكىندىك بەردى. مۇنداي شەشىمدەر تابيعاتتى قورعاۋ ىسىندە دە تيىمدىلىكتى ارتتىرىپ وتىر», دەدى ۆيتسە-مينيستر.
سونداي-اق «Smart Data Ukimet» پلاتفورماسى ارقىلى بۇگىندە 45 مەملەكەتتىك قىزمەت پرواكتيۆتى فورماتقا كوشىرىلگەن. ازامات ءوتىنىش بەرمەي-اق, مەملەكەت ءوزى قىزمەتتى اۆتوماتتى تۇردە ۇسىنادى. ماسەلەن, كوپبالالى انالارعا جاردەماقى تاعايىنداۋ, جۇمىسسىز قالعاندارعا تولەم راسىمدەۋ نەمەسە مەكتەپتەگى ىستىق تاماققا جەڭىلدىك بەرۋ سياقتى قىزمەتتەر اقىسىز ءارى ونلاين كورسەتىلەدى. تەك كەيىنگى ايلاردا عانا حالىققا 4 ميلليوننان استام پرواكتيۆتى قىزمەت ۇسىنىلىپتى. قازىرگى كەزدە حالىققا قىزمەت كورسەتۋ ورتالىقتارىنا تۇسەتىن جۇكتەمەنى ازايتۋ ماقساتىندا ەڭ كوپ سۇرانىسقا يە 10 قىزمەت ونلاين فورماتقا كوشىرىلىپ جاتىر. قازىردىڭ وزىندە جەكە كۋالىكتى اۋىستىرۋ, ەتسق الۋ, جۇرگىزۋشى كۋالىگىن راسىمدەۋ مۇمكىندىگى ىسكە قوسىلعان. ۆيتسە-ءمينيستردىڭ ايتۋىنشا, بۇل وزگەرىستەردىڭ ناتيجەسىندە حقكو-عا باراتىن ازاماتتاردىڭ سانى ەكى ەسەگە ازايادى.