وڭتۇستىك كورەيانىڭ كۆاندجۋ قالاسىندا ساداق اتۋدان الەم چەمپيوناتى ءوتىپ جاتىر. جەر-جاھاننىڭ ءار قيىرىنان جينالعان قۇرالايدى كوزگە اتقان مەرگەندەر ءبىر اپتا بويى سايىسقا ءتۇسىپ, 10 جۇلدە جيىنتىعىن ساراپقا سالادى.
ساداق اتۋدان الەم چەمپيوناتى 1931 جىلدان بەرى ءوتىپ كەلەدى. بيىل ول 52 مارتە جالاۋىن جەلبىرەتىپ وتىر. سول ارالىقتا اقش قۇراماسى ەڭ كوپ تابىسقا قول جەتكىزدى. امەريكالىقتار 132 (63 التىن+37 كۇمىس+32 قولا) مارتە جەڭىس تۇعىرىنا كوتەرىلدى. ولاردىڭ باستى باسەكەلەستەرى وڭتۇستىك كورەيانىڭ مەرگەندەرى 111 (59+27+25) جۇلدە الدى. ودان كەيىنگى ساتىلارعا شۆەتسيا (18+20+20), كسرو (14+8+4), پولشا (13+12+9) جايعاستى. سونداي-اق توپ-10 كوماندانىڭ قاتارىندا يتاليا (11+9+8), ۇلىبريتانيا (9+18+27), فرانتسيا (8+15+13), دانيا (7+11+9), رەسەي (7+5+6) بار. اتالعان جارىستا بارلىعى 27 مەملەكەتتىڭ ءانۇرانى شىرقالىپ, 44 ەلدىڭ تۋى بيىكتە جەلبىرەدى.
جۇلدە العان كوماندا قاتارىندا ەلىمىز دە بار. 1993 جىلى تۇركيانىڭ انتاليا قالاسىندا وتكەن بايراقتى باسەكەدە كلاسسيكالىق ساداق اتۋدان سىنعا تۇسكەن يانا تۋنيانتس قولا مەدال الدى. 1972 جىلى الماتىدا دۇنيەگە كەلگەن يانانىڭ باسقا دا حالىقارالىق جارىستاردا جەڭىپ العان جۇلدەلەرى جەتەرلىك. 1997 جىلى ىستانبۇلدا اشىق اۋادا ۇيىمداستىرىلعان كوماندالىق الەم چەمپيوناتىندا كۇمىسپەن كۇپتەلىپ, 1998 جىلى بانگكوكتاعى ازيا ويىندارىندا ۇزدىك ۇشتىكتى تۇيىندەدى. ونىڭ الدىندا كسرو چەمپيونى اتانىپ, گران-پري دودالارىندا دارالاندى.
ارادا 32 جىل وتسە دە ەلىمىزدە سول يانا ءتۋنيانتستىڭ ەرلىگىن قايتالايتىن ءبىر مەرگەن تابىلماي تۇر. ودان كەيىن دە ەلىمىزدىڭ ساداق اتۋشىلارى الەم چەمپيوناتىندا تالاي مارتە بوي كورسەتتى. بىراق بىردە-بىرەۋى جەڭىس تۇعىرىنا كوتەرىلە المادى. كۆاندجۋداعى دودادا يلفات ابدۋللين, داستان كارىموۆ, يۆان بەرچا, ساميرا جۇماعۇلوۆا, ديانا تۇرسىنبەك, الەكساندرا زەمليانوۆا (كلاسسيكالىق ساداق), اندرەي تيۋتيۋن, اقبارالى قاراباەۆ, دىلمۇحاممەد مۇسا, ادەل جەكسەنبينوۆا, ۆيكتوريا ليان, روكسانا يۋنۋسوۆا (بلوكتىق ساداق) سىندى سپورتشىلار باق سىناپ جاتىر. باسەكە 12 قىركۇيەكتە ءوز مارەسىنە جەتەدى.