كونستيتۋتسياسى كۇنى قارساڭىندا باس پروكۋراتۋرادا سالتاناتتى جيىن ءوتتى. ءىس-شارادا باس پروكۋرور بەرىك اسىلوۆ جەكە قۇرامدى مەملەكەتتىك مەرەكەمەن قۇتتىقتاپ, تاۋەلسىز, قۇقىقتىق ءارى ادىلەتتى مەملەكەتتىڭ بەرىك ىرگەتاسىنا اينالعان اتا زاڭنىڭ تاريحي ماڭىزدىلىعىن اتاپ ءوتتى, دەپ جازادى Egemen.kz.
«وتىز جىل بۇرىن قازاقستان حالقى تاعدىرشەشتى تاڭداۋ جاساپ, ەلدىڭ ستراتەگيالىق دامۋ باعىتىن ايقىنداعان كونستيتۋتسيانى قابىلدادى. ول دەموكراتيالىق قاعيداتتاردى بەكىتىپ, ادام مەن ازاماتتىڭ قۇقىقتارى مەن بوستاندىقتارىن قورعاۋ جۇيەسىن قالىپتاستىردى. ءدال وسى نورمالاردىڭ ارقاسىندا ەلىمىزدە اۋقىمدى رەفورمالار دايەكتى تۇردە جۇزەگە اسۋدا», – دەپ اتاپ ءوتتى ۆەدومستۆو باسشىسى.
مەملەكەتتىك ورگاندار جۇيەسىندە پروكۋراتۋراعا ەرەكشە ءرول بەرىلگەن – ول زاڭدىلىق پەن كونستيتۋتسيالىق ءتارتىپتىڭ قورعاۋشىسى. كەيىنگى وتىز جىلدا پروكۋراتۋرا ورگاندارى اتا زاڭنىڭ ۇستەمدىگىن قامتاماسىز ەتىپ, ازاماتتاردىڭ قۇقىقتارىن, مەملەكەت پەن قوعامنىڭ مۇددەلەرىن قورعاپ كەلەدى.
باس پروكۋرور «پروكۋراتۋرا تۋرالى» كونستيتۋتسيالىق زاڭنىڭ قابىلدانۋى كونستيتۋتسيالىق جۇيەنىڭ دامۋىنا ماڭىزدى قادام بولعانىن جانە پروكۋراتۋرانىڭ مەملەكەتتىڭ قۇقىقتىق قۇرىلىمىنداعى ايرىقشا ميسسياسىن بەكىتكەنىن اتاپ ءوتتى. ء«بىزدىڭ جۇمىسىمىزدىڭ ءاربىر باعىتى – كونستيتۋتسيا پروكۋراتۋراعا زاڭدىلىقتىڭ ساقتالۋىن جوعارى قاداعالاۋ مەن ازاماتتاردىڭ قۇقىقتارىن قورعاۋدى جۇكتەگەن نورمالاردى ىسكە اسىرۋ بولىپ تابىلادى», – دەدى ب.اسىلوۆ.
سونىمەن قاتار ول قارقىندى وزگەرىستەر جاعدايىندا پروكۋراتۋرانىڭ زاماناۋي ورگانعا اينالىپ, كونستيتۋتسيالىق رەفورمالارعا ۇيلەسىمدى تۇردە كىرىگىپ جاتقانىن, تسيفرلىق تەحنولوگيالاردى بەلسەندى ەنگىزىپ, بيزنەستى, ينۆەستيتسيانى, بالالاردىڭ قۇقىقتارى مەن قوعام مۇددەلەرىن قورعاۋدى كۇشەيتىپ وتىرعانىن ايتتى.