حورۆاتيادا ءانۇرانىمىز شىرقالا ما؟

1993 جىلى تورونتو مەن 1994 جىلى ىستانبۇلدان قورجىنىمىز بوس قايتتى. 1995 جىلى اتلانتادا ەل­مادي جابرايىلوۆ (82 كگ) كۇ­مىس مە­دالدى ەنشىلەدى. فينال­دا ونىڭ بارسەلونا وليم­پيا­دا­سىنىڭ جەڭىمپازى, الەم چەمپيونى, امەريكالىق كەۆين دجەك­سونعا ءالى جەتپەدى. 1997 جىلى كراسنويارسكىدە ماۋلەن مامىروۆ (54 كگ) قولا جۇلدەنى قانجىعاسىنا بايلادى. سودان كەيىن ءتورت بىردەي بايراقتى باسەكەدەن ەڭسەمىز ءتۇسىپ ورال­دىق. 1998 جىل مەن 2002 جىلدارى تەگەراندا, 1999 جىلى انكارا­دا, 2001 جىلى سوفيادا ساتسىزدىككە ۇشىرادىق. 2003 جىلى نيۋ-يوركتە گەننادي لاليەۆ (74 كگ) ءۇشىنشى تۇعىر­عا تابان تىرەدى. 2005 جىلى ما­گومەد كرۋگليەۆ (84 كگ) ءدال سول ناتيجەنى قايتالادى. 2006 جىلى گۋانجوۋ مەن 2007 جىلى باكۋدە تىم سۇرەڭسىز كۇرەستىك. ال 2009 جىلى حەرنينگتە لەونيد سپيريدونوۆ (66 كگ) قولا جۇلدەگەر اتاندى. 2010 جىلى ماسكەۋدە ابىلحاكىم شاپيەۆ (74 كگ) ءۇشىنشى ورىندى يەلەن­دى. جوعارىدا ەسىمدەرى اتالعان التى بالۋاننىڭ ەكەۋى عانا ءوز تۇلەكتەرىمىز. ولار – مامىروۆ پەن كرۋگليەۆ. قالعاندارى لەگيونەرلەر. اتاپ ايتساق, جاب­رايىلوۆتىڭ ۇلتى – شەشەن, لا­ليەۆ – وسەتين, سپيريدونوۆ – ياكۋت, شاپيەۆ – اۆار.

2011 جىلى قازاقتىڭ قوس قىرانى – داۋلەت نيازبەكوۆ (55 كگ) پەن داۋرەن جۇماعازيەۆ (60 كگ) ماۋلەن مامىروۆتىڭ ەرلىگىن قايتالاپ, الەمدىك دودادا قولا مەدالدى مويىندارىندا جارقىراتتى. 2013 جىلى بۋداپەشتتە, 2014 جىلى تاشكەنتتە, 2015 جىلى لاس-ۆەگاستا جەر سيپاپ قالدىق. 2016 جىلى ماجار­ستاننىڭ باس شاھارىندا وليم­پيا­دالىق ەمەس سالماق دارە­جە­لەرى بويىنشا الەم چەمپيو­ناتى ۇيىمداستىرىلىپ, سول جارىستا نۇرلان بەكجانوۆ (70 كگ) كۇمىسپەن كۇپتەلدى. فينال­دا ول رەسەيلىك ماگو­مەد قۇرباناليەۆتەن ۇتىل­دى. 2017 جىلى پاريجدە اق­جۇرەك تاڭاتاروۆ (70 كگ) قولا مەدالمەن جانكۇيەرلەرىن قۋانتتى. 2018 جىلى بۋداپەشتە نۇريسلام ساناەۆ (57 كگ) اقتىق سىنعا دەيىن القىنباي جەتتى. فينالدا رەسەي وكىلى زاۋر ۋگۋەۆقا جول بەرگەن تىۆالىق لەگيونەر كۇمىس مەدالدى قاناعات تۇتتى.

2019 جىلى استانادا ۇيىم­داس­تىرىلعان الەم چەمپيونا­تىندا ەلىمىزدىڭ ەركىن كۇرەس وكىل­دەرى وتە جاقسى ناتي­جە كورسەتتى. بۇل جارىس­تا ءتورت بالۋانىمىز جەڭىس تۇ­عى­رىنا كوتەرىلدى. فينالدا داعىستاندىق گادجيمۇراد راشيدوۆتان ۇتىلعان داۋلەت نيازبەكوۆ (65 كگ) پەن وسەتين داۆيد باەۆتان جەڭىلگەن نۇرقوجا قايپانوۆ (70 كگ) كۇمىس السا, جارتىلاي فينالدا سۇرىنگەن نۇريسلام ساناەۆ (57 كگ) پەن دانيار قايسانوۆ (74 كگ) قولاعا قول سوزدى. بۇرىن-سوڭدى وتاندىق ەركىن كۇرەس شەبەرلەرى اتالعان جارىستا ءدال وسىنداي تابىسقا قول جەتكىزگەن جوق ەدى.

2021 جىلى وسلوداعى جارىس تا ءبىز ءۇشىن ويداعىداي وتپەدى. 2022 جىلى جۇلدە الۋ­عا تەك ازامات داۋلەتبەكوۆ­تىڭ (86 كگ) كۇش-جىگەرى جەتتى. وعان بۇيىرعانى – قولا. 2023 جىلى وتاندىق ەركىن كۇ­رەس تاري­حىندا تەڭدەسسىز وقي­عا تىركەلدى. بەلگرادتىڭ بوز­كىلەمىندە 19 جاستاعى ريزا­بەك ايتمۇحان (92 كگ) الەم چەمپيونى اتاندى. نەبىر مىقتى بالۋانداردان باسىم تۇسكەن قانداسىمىز باس جۇلدە ءۇشىن باسەكەدە ازەربايجاندىق وسمان نۇرماگومەدوۆتىڭ وسال تۇسىن تاپتى. ريزابەككە دەيىن ەلىمىز­دىڭ بىردە-ءبىر با­لۋانى بۇل بە­لەس­تى باعىن­دى­را الما­عان ەدى. ­سول جارىس­تا ازامات داۋلەتبە­كوۆ (86 كگ)­ ەكىنشى رەت ءۇشىنشى ساتىعا تۇ­راقتادى. 2024 جىلى تيرا­نا­دا نۇرقوجا قايپا­نوۆ (70 كگ)­ توپ جاردى. فينالدا ول يوسينوسۋكە اوياگيدى جىقتى. ءسويتىپ, نۇرقوجانىڭ ەسىمى ەلىمىزدەن شىققان ەكىنشى الەم چەمپيونى رەتىندە سپورتتىق شەجىرەگە التىن ارىپتەرمەن جازىلدى.

ەركىن كۇرەستەن قازاقستان قۇراماسى ءوز تاريحىندا 2 التىن, 5 كۇمىس جانە 12 قولاعا قول جەتكىزدى. بارلىعى – 19 جۇلدە. ستاتيستيكالىق مالىمەتتەر­گە جۇگىنسەك, كۇرەستىڭ بۇل تۇرى­نەن ەل قۇراماسى ءوز تاريحىندا نەبارى ەكى رەت قانا ال­تىن تۇعىرعا كوتەرىلگەنىن اڭ­عا­رۋعا بولادى. ءبىر قۋانتار­لىعى, ونىڭ ەكەۋىن دە ولار 2023 پەن 2024 جىلدارى جالاۋى جەلبىرەگەن كەيىنگى ەكى جارىستا ولجالادى. وسىنى نەگىزگە الا وتىرىپ, 13-21 قىركۇيەك ارا­لىعىندا حورۆاتيانىڭ استاناسى – زاگرەبتە وتەتىن بايراق­تى باسەكەدەن وتاندىق بالۋاندارىمىز باس جۇلدەسىز ورالمايدى دەپ ۇمىتتەنەمىز.