ەلىمىزدە 2025–2026 جىلدارعا ارنالعان ەپيدەميولوگيالىق ماۋسىمعا دايىندىق شارالارى باستالدى. وسىعان بايلانىستى ەلىمىزدىڭ باس مەملەكەتتىك سانيتاريالىق دارىگەرى ارنايى قاۋلىعا قول قويدى, دەپ حابارلايدى Egemen.kz دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنە سىلتەمە جاساپ.
قاۋلىدا حالىقتىڭ دەنساۋلىعىن قورعاۋعا باعىتتالعان سانيتاريالىق-ەپيدەمياعا قارسى جانە سانيتاريالىق-پروفيلاكتيكالىق شارالار كەشەنى كوزدەلگەن. اتاپ ايتقاندا, 2025 جىلعى 15 قىركۇيەكتەن باستاپ تۇرعىنداردى تۇماۋعا قارسى ۆاكتسيناتسيالاۋ باستالادى.
مەديتسينالىق ۇيىمداردا كىرەبەرىستە سۇزگىلەردىڭ جۇمىسى قامتاماسىز ەتىلەدى, سونىمەن قاتار ماسكا تاعۋ جانە انتيسەپتيكتەردى پايدالانۋ مىندەتتەلەدى.
جرۆي, تۇماۋ جانە COVID-19 بەلگىلەرى بايقالعان جۇكتى ايەلدەرگە جانە ءبىر جاسقا دەيىنگى بالالارعا ۇيگە كەلىپ, ءبىرىنشى كەزەكتە مەديتسينالىق قىزمەت كورسەتۋ ءتارتىبى ەنگىزىلەدى.
مەكتەپكە دەيىنگى مەكەمەلەردە كۇن سايىن تاڭەرتەڭ بالالاردىڭ دەنساۋلىعىن تەكسەرۋ (تاڭەرتەڭگى سۇزگى) جۇرگىزىلەدى. اۋرۋ بەلگىلەرى بار بالالار بالاباقشا ۇجىمىنان وقشاۋلانادى.
«ورتا ءبىلىم بەرۋ ۇيىمدارىندا ءبىر سىنىپ وقۋشىلارىنىڭ 20–30%-ى ءبىر ينكۋباتسيالىق كەزەڭ ىشىندە جرۆي-مەن اۋىرسا, وندا كابينەتتىك وقىتۋ جۇيەسى توقتاتىلىپ, 10 كۇن بويى جاڭا وقۋشىلار سىنىپقا قابىلدانبايدى. ەگەر مەكتەپتەگى وقۋشىلاردىڭ جالپى سانىنىڭ 30%-ى جانە ودان كوپ بولىگى اۋىرسا, مەكتەپ ونلاين وقىتۋ فورماتىنا كوشىرىلەدى», دەپ ءتۇسىندىردى كوميتەتتىڭ ءباسپاسوز قىزمەتى.
اتالعان شارالار 2025–2026 جىلدارداعى ۆيرۋستىق ينفەكتسيالاردىڭ تارالۋ قاۋپىن تومەندەتۋگە, حالىقتىڭ دەنساۋلىعىن ساقتاۋعا جانە دەنساۋلىق ساقتاۋ جۇيەسىنىڭ تۇراقتىلىعىن قامتاماسىز ەتۋگە باعىتتالعان.
قاۋلىنىڭ تولىق ماتىنىمەن قر دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتىنىڭ رەسمي سايتىندا تانىسۋعا بولادى.