سۋ رەسۋرستارى جانە يرريگاتسيا مينيسترلىگى قۇرىلعالى بەرى سۋ شارۋاشىلىعى سالاسىندا 1 805 مامان تۇراقتى جۇمىسپەن قامتاماسىز ەتىلگەن, دەپ حابارلايدى Egemen.kz.
2023 جىلى باسسەين ينسپەكتسيالارىنىڭ شتاتى 98-دەن 281 ادامعا دەيىن ءوستى. سونداي-اق ەلىمىزدىڭ 10 وڭىرىندە كوممۋنالدىق گيدروتەحنيكالىق قۇرىلىسجايلاردى پايدالانۋ جانە باسقارۋ جونىندەگى مامانداندىرىلعان مەكەمەلەر قۇرىلدى. بۇگىندە وندا 1 197 مامان ەڭبەك ەتىپ جاتىر.
2025 جىل باستالعالى «قازسۋشار» رمك-نىڭ 425 ماۋسىمدىق قىزمەتكەرى تۇراقتى جۇمىسقا ورنالاستىرىلعان. سونىمەن قاتار ءتۇرلى وڭىرلەردە گيدروتەحنيكالىق نىسانداردى قالپىنا كەلتىرۋ جانە سالۋ جوبالارىن جۇزەگە اسىرۋ بارىسىندا 892 تۇراقتى جۇمىس ورنىن قۇرۋ جوسپارلانىپ وتىر.
سالا ءمينيسترى نۇرجان نۇرجىگىتوۆتىڭ ايتۋىنشا, مەملەكەت باسشىسىنىڭ تاپسىرمالارىن ورىنداۋ ماقساتىندا مينيسترلىك سۋ سالاسىنا جاڭا بىلىكتى كادرلاردى تارتۋ باعىتىندا بەلسەندى جۇمىس جۇرگىزىپ كەلەدى.
«سونداي-اق مامانداردىڭ ەڭبەك جاعدايىن جاقسارتۋ شارالارى قولعا الىنىپ جاتىر. ماسەلەن, سۋ سالاسى قىزمەتكەرلەرىنىڭ بىلىكتىلىگىن ارتتىرۋ جانە قايتا دايارلاۋ, سونىمەن قاتار ولاردىڭ جالاقىسىن ەنەرگەتيكا سالاسىنداعى ماماندار دەڭگەيىنە جەتكىزۋ ماسەلەسى شەشىمىن تاپتى», دەدى ن.نۇرجىگىتوۆ.