سوڭعى ءتورت جىلدا ۇستازداردىڭ جالاقىسى ەكى ەسە ءوستى - پرەزيدەنت

پرەزيدەنت احمەت بايتۇرسىن ۇلىنىڭ «مەكتەپتىڭ جانى – مۇعالىم» دەگەن قاناتتى ءسوزىن ەسكە سالا وتىرىپ:

ء«بىز وركەنيەتتى ەل بولامىز دەسەك, ۇستازدارعا بارىنشا جاعداي جاساۋىمىز كەرەك. مەن ءبىلىم بەرۋ سالاسىنا ايرىقشا ءمان بەرەمىن. پرەزيدەنت رەتىندە قابىلداعان العاشقى شەشىمدەرىمنىڭ ءبىرى دە ۇستازدارعا قاتىستى بولدى», دەدى قاسىم-جومارت توقاەۆ.

پرەزيدەنت جاھاندانۋ داۋىرىندە ءبىلىم مەن عىلىم ەلدىڭ بولاشاعىن ايقىندايتىنىن ايتىپ, وسكەلەڭ ۇرپاققا ساپالى ءبىلىم بەرۋدىڭ ماڭىزىن ەرەكشە اتاپ ءوتتى.

«قازىر – ءبىلىم مەن عىلىمنىڭ زامانى. جاھاندانۋ داۋىرىندە وزىق ءبىلىمدى يگەرگەن, جاڭا تەحنولوگيانى مەڭگەرگەن ەلدىڭ ۇپايى تۇگەل بولادى. بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز. سوندىقتان وسى سالانى قولداۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى», دەيدى پرەزيدەنت. 

مەملەكەت باسشىسىنىڭ ايتۋىنشا, سوڭعى جىلدارى بۇل باعىتتا اۋقىمدى جۇمىس اتقارىلدى. 2019 جىلدان بەرى ءبىلىم سالاسىنىڭ بيۋدجەتى ءۇش ەسە ارتتى. وسى ۋاقىتتا 1 ميلليوننان استام وقۋشىعا ارنالعان 1200 مەكتەپ اشىلدى. «كەلەشەك مەكتەپتەرى» ۇلتتىق جوباسى اياسىندا جالپى سانى 217 مەكتەپ قۇرىلىسى جوسپارلاندى. قازىر 128 مەكتەپ سالىندى. بۇدان بولەك, ءبىلىم بەرۋ ينفراقۇرىلىمىن قولداۋ قورىنىڭ قارجىسىنا الپىستان استام مەكتەپ سالىندى. تاعى 30-عا جۋىعى سالىنىپ جاتىر.

سونىمەن قاتار «پەداگوگ مارتەبەسى تۋرالى» ارنايى زاڭ قابىلداندى. «قازاقستاننىڭ ەڭبەك سىڭىرگەن ۇستازى» اتاعى بەلگىلەندى. بۇگىندە 74 مۇعالىم وسى قۇرمەتتى اتاققا يە بولدى. بىلتىر 2 ۇستاز «قازاقستاننىڭ ەڭبەك ەرى» اتاندى. 

«مۇعالىمدەردىڭ الەۋمەتتىك جاعدايىن جاقسارتۋ ءاردايىم باستى نازاردا. سوڭعى ءتورت جىلدىڭ ىشىندە ولاردىڭ جالاقىسى 2 ەسە ءوستى. قازىرگى تاڭدا 500 مىڭنان استام ۇستازعا ۇستەمە اقى تولەنەدى. ء«بىلىم بەرۋدەگى وزگەرىستەردىڭ مىڭ كوشباسشىسى» جوباسى قولعا الىندى. وسى جوباعا قاتىسقان 332 مامان مەكتەپ ديرەكتورى بولىپ تاعايىندالدى. مۇعالىمدەر ءوز مىندەتىنە كىرمەيتىن ارتىق جۇمىستان بوساتىلدى. ۇستازدىڭ نازارى بالا وقىتۋ ىسىندە بولۋعا ءتيىس», دەيدى ەل پرەزيدەنتى.