قازاقستان مەن ازەربايجان كاسىپكەرلەرى بىرلەسىپ, الاكول جاعاسىنان تاعى ءبىر ءساناتوريدىڭ قۇرىلىسىن باستاۋعا نيەتتى. وسى ماقساتتا كەشە قازاق-ازەربايجان دەلەگاتسياسى اباي وبلىسىنا كەلىپ, ءوڭىر باسشىسى بەرىك ۋاليمەن جۇزدەستى, دەپ حابارلايدى Egemen.kz.
توپ قۇرامىندا قازاقستاننىڭ ازەربايجانداعى ەلشىسى ءالىم بايەل, قازاق-ازەربايجان ىسكەرلىك كەڭەسى تەڭ توراعاسىنىڭ ورىنباسارى اسلان قۇنياروۆ, سونداي-اق ازەربايجان ينۆەستيتسيا حولدينگى مەن ازەربايجان ينۆەستيتسيا كومپانياسىنىڭ وكىلدەرى بولدى. ولار وبلىس اكىمىنە الاكول جاعالاۋىندا ساناتورلىق-كۋرورتتىق كەشەن سالۋ بويىنشا ينۆەستيتسيالىق جوبانى تانىستىردى.
«بۇگىنگى تاڭدا قازاقستان مەن ازەربايجان وداقتاستىق قاتىناستاردىڭ جاڭا دەڭگەيىنە شىقتى. پرەزيدەنت قاسىم-جومارت توقاەۆ وتكەن جىلى ازەربايجانعا ءۇش رەت رەسمي ساپارمەن باردى. مەملەكەت باسشىسى الدىمىزعا ازەربايجانمەن ەكونوميكالىق بايلانىستاردى نىعايتىپ, ءوندىرىس جانە تۋريزم سالالارىندا بىرلەسكەن جوبالاردى جۇزەگە اسىرۋ جونىندە ناقتى مىندەت قويدى. 2024 جىلى ءبىز قازاقستان مەن ازەربايجاننىڭ بىرلەسكەن ينۆەستيتسيالىق قورىن قۇردىق. الاكولدەگى جوبا وسى قور اياسىنداعى العاشقى جوبانىڭ ءبىرى. سونىمەن قاتار ازەربايجاننان قوسىمشا ينۆەستيتسيا تارتامىز» دەدى ەلشى ءا.بايەل.
قازاق پەن ازەربايجان – تاريحى ءبىر, تامىرى ورتاق تۋىسقان ەلدەر ەكەنىن ايتقان وبلىس اكىمى ب.ءۋالي دەلەگاتسيا مۇشەلەرىنە تۋريستىك كەشەن سالۋعا نيەت بىلدىرگەنى ءۇشىن العىس ايتىپ, قازىرگى تاڭدا الاكول تۋريستىك ايماعىنىڭ باس جوسپارى ازىرلەنىپ جاتقانىن, سول جەردەن ورىن بولۋگە دايىن ەكەنىن جەتكىزدى.
قازاقستان مەن ازەربايجاننىڭ بىرلەسكەن ينۆەستيتسيالارى ەسەبىنەن جىل بويى جۇمىس ىستەيتىن, ءبىر مەزەتتە 800 ادامدى قابىلداي الاتىن تۋريستىك نىسان سالۋ جوسپارلانىپ وتىر. ينۆەستيتسيا كولەمى – 20 ميلليون اقش دوللارى. كەشەن ىسكە قوسىلعان كەزدە 200-گە جۋىق جاڭا جۇمىس ورنى اشىلادى. بۇل جوبا ءوڭىردىڭ تۋريستىك تارتىمدىلىعىن ارتتىرىپ, جەرگىلىكتى بيۋدجەتكە تۇسەتىن سالىق كولەمىن ۇلعايتىپ, مەديتسينا مەن دەمالىستى توعىستىرعان جاڭا كلاستەر قالىپتاستىرۋعا مۇمكىندىك بەرەدى.
ءارى قاراي دەلەگاتسيا الاكولگە بارىپ, زەرتتەۋ جۇمىستارىن جۇرگىزدى. ماقانشى اۋدانىنىڭ اكىمى مەن اباي وبلىسى تۋريزم باسقارماسىنىڭ باسشىسى قوناقتاردى ءوڭىردىڭ ينفراقۇرىلىمدىق دامۋ جوسپارلارىمەن تانىستىردى. ءا.بايەل الاكول جوباسىنىڭ قازاقستان مەن ازەربايجاننىڭ تۋريزم سالاسىنداعى ىنتىماقتاستىعىندا ماڭىزدى قادام بولاتىنىن اتاپ ءوتتى.