قازاقستاندا انا مەن بالا ءولىمىنىڭ دەڭگەيى تومەندەدى. بۇل تۋرالى بۇگىن ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا حابارلادى, دەپ جازادى Egemen.kz.
بىلتىر انا ءولىمىنىڭ دەڭگەيى 12%-عا, نارەستە ءولىمىنىڭ دەڭگەيى 11%-عا تومەندەگەن. بيىلعى جىلدىڭ 6 ايىنىڭ قورىتىندىسى بويىنشا انا ءولىمىنىڭ دەڭگەيى 10%-عا, نارەستە ءولىمىنىڭ دەڭگەيى 26%-عا ازايعان.
مينيستر بۇل كورسەتكىشتەرگە ددسۇ مەن يۋنيسەف-ءتىڭ حالىقارالىق ۇسىنىمدارىنا نەگىزدەلگەن مەديتسينالىق كومەك كورسەتۋدەگى جاڭا تاسىلدەردى ەنگىزۋ ناتيجەسىندە قول جەتكىزىلگەنىن ايتتى. سونىڭ ىشىندە, ەلىمىزدە اكۋشەريا سالاسىندا 25 جانە پەدياتريا بويىنشا 20 كلينيكالىق حاتتامالار جاڭارتىلعان.سونداي-اق, بوسانعاننان كەيىنگى قان كەتۋلەردىڭ الدىن الۋدىڭ جاڭا ادىستەرى ەنگىزىلگەنە. سونىڭ ناتيجەسىندە بيىل اعزالاردى ساقتاپ قالۋ وپەراتسيالارى 20%-عا ارتقان.
مەديتسينالىق اۆياتسيا جەلىسى بويىنشا دەر كەزىندە جانە جوعارى مامانداندىرىلعان مەديتسينالىق كومەك كورسەتۋ شارالارى اۋىر جاعدايداعى ايەلدەر مەن بالالاردىڭ 96%-ىن قۇتقارىپ قالۋعا مۇمكىندىك بەرگەن.ودان بولەك وتكەن جىلدان باستاپ بوساندىرۋ جانە بالالارعا ارنالعان ۇيىمداردىڭ مەديتسينالىق تەحنيكامەن جابدىقتالۋى 87%-عا دەيىن جاقسارىپ, توزۋ كورسەتكىشى 37%-عا دەيىن تومەندەگەن.
ال بيىل ەلىمىزدە 12 زاماناۋي پەريناتالدىق ورتالىقتى سالۋ جوسپارلانعان. جاڭا نىساندار استانا, الماتى, شىمكەنت, اتىراۋ, تاراز, قاراعاندى, قاسكەلەڭ, قوستاناي, قىزىلوردا, ورال قالالارىندا جانە تۇركىستان وبلىسىنىڭ تەمىرلان اۋىلىندا بوي كوتەرەدى.