قوستانايداعى سىرباي ماۋلەنوۆ اتىنداعى مەكتەپ-گيمنازيادا كورنەكتى اقىنعا ارنالعان مەموريالدىق تاقتا ورناتىلدى. ءىس-شارا بارىسىندا اقىن, دراماتۋرگ اقىلبەك شاياحمەت سىراعاڭنىڭ قوستانايدا قىزمەت ەتكەن كەزەڭدەرىنەن سىر شەرتسە, اقىننىڭ ۇلى, زاڭ عىلىمدارىنىڭ دوكتورى قاسىم سىرباي ۇلى مەكتەپ ۇجىمىنا, شاكىرتتەرگە تابىس تىلەپ, ريزاشىلىق ءبىلدىردى.
كەزىندە سىراعاڭنىڭ اڭگىمەسىن كوپ تىڭداعان, قولىنا سۋ قۇيىپ, دامدەس بولعان اقىن اقىلبەك قوجا ۇلى قالامگەردىڭ شىعارماشىلىعى مەن قىزمەتىنە كەڭىنەن توقتالدى.
«سىرباي ماۋلەنوۆ – قازاق پوەزياسىندا ەرەكشە ءىز قالدىرعان, ۇلت ولەڭىنە جاڭا فورما اكەلگەن عاجايىپ ليريك اقىن. سۇراپىل سوعىس جىلدارى ءوزىمىزدىڭ قاراشاڭىراق – بۇرىنعى «بولشەۆيكتىك جول», قازىرگى «قوستاناي تاڭى» گازەتىندە رەداكتوردىڭ ورىنباسارى بولىپ قىزمەت اتقاردى. ەلگە سىڭىرگەن ەڭبەگى زور ەدى. ول كىسىنىڭ ءومىرى ولمەس شىعارمالارىمەن, وسى گيمنازياداعى جاس ۇرپاقتىڭ بىلىمىمەن جالعاسىپ جاتىر. بۇگىنگى وقيعانىڭ ءمانى تەرەڭ. اعامىزدىڭ رۋحى ءبىر اۋناپ ءتۇسىپ جاتقان شىعار», دەدى اقىن.
ەسكە الۋ كەشىندە قاسىم سىرباي ۇلى ءوز اتىنان گيمنازيا باسشىلىعىنا, ۇستازدارعا, ءبىلىم ورداسىن ۇزدىك تامامداعان بىرنەشە تۇلەككە العىسحات تابىس ەتتى. ءىس-شارا گيمنازيانىڭ ءماجىلىس زالىندا جالعاسىن تاۋىپ, كوپشىلىك سىرباي اقىننىڭ ءومىرى مەن شىعارماشىلىعىنا ارنالعان دەرەكتى ءفيلمدى تاماشالادى.
قوستاناي وبلىسى