بۇگىن مەملەكەت باسشىسى جاڭا سالىق كودەكسىنە جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانى ءمالىم. سول ورايدا, قر ۇەم سالىق جانە كەدەن ساياساتى دەپارتامەنتىنىڭ باس ساراپشىسى جازيرا مىڭباەۆادان پىكىرىن سۇراعان ەدىك, دەپ جازادى Egemen.kz.
«جاڭا سالىق كودەكسى مەملەكەت باسشىسىنىڭ بىرقاتار تاپسىرمالارىن ورىنداۋ شەڭبەرىندە ازىرلەندى. سالىق كودەكسى سالىقتىق اكىمشىلەندىرۋدى جاپپاي جەڭىلدەتۋدى كوزدەيدى. اتاپ ايتقاندا, سالىق ەسەپتىلىگىنىڭ كولەمى 30 پايىزعا قىسقاردى, سالىقتاردىڭ سانى 20 پايىزعا ازايدى. سونىمەن قاتار, ينۆەستيتسيانى ارتتىرۋ بويىنشا كوپتەگەن بەلسەندى جۇيەلەردى كوبەيتۋ, ءسان-سالتانات زاتتارىنا سالىق جۇكتەمەسىن ارتتىرۋ – ماڭىزدى وزگەرىستەر», دەيدى جازيرا مىڭباەۆا.
سونداي-اق, ج.مىڭباەۆا قوسىلعان قۇن سالىعىنىڭ (ققس) جاڭا بازالىق مولشەرلەمەسى 16 پايىز بولىپ بەكىتىلگەنىن جانە قور نارىعىن ىنتالاندىرۋ ءۇشىن بيرجالىق قۇندى قاعازدارعا تولەنەتىن ديۆيدەنتتەرگە سالىق جەڭىلدىكتەرى سول قالپىندا ساقتالاتىنىن, «بايتەرەك» ۇلتتىق قورىنان شىعارىلعان باعالى قاعازدار كورپوراتيۆتىك تابىس سالىعىنان بوساتىلاتىنىن اتاپ ءوتتى.
سونىمەن قاتار ساراپشى كىتاپ ونىمدەرىن شىعارۋ, ارحەولوگيا سالالارى – قوسىمشا قۇن سالىعىنان بوساتۋ كوزدەلگەنىن تىلگە تيەك ەتتى.
ء«دارى-دارمەك پەن مەديتسينالىق قىزمەتتەرگە تومەندەتىلگەن ققس مولشەرلەمەسى بەلگىلەندى: 2026 جىلدان – 5 پايىز, 2027 جىلدان – 10 پايىز, بۇل – بەيىمدەلۋ ءۇشىن. سونىمەن قاتار, اۋىل شارۋاشىلىعى ونىمدەرىن وندىرۋشىلەرگە ققس ەسەپكە جاتقىزۋ بويىنشا 70 پايىزدىق ۇلەس 80 پايىزعا ارتتىرىلىپ وتىر, بۇل – اۋىل شارۋاشىلىعى ونىمدەرىنە دەگەن سالىق جۇكتەمەسىن ازايتۋعا باعىتتالعان», دەيدى اتالعان دەپارتامەنتتىڭ باس ساراپشىسى.
جازيرا مىڭباەۆا ءوز ءسوزىنىڭ سوڭىندا قوسىلعان قۇن سالىعى بويىنشا تىركەۋ شەگى 20 ايلىق ەسەپتىك كورسەتكىشتەن 10 ايلىققا دەيىن ازايتىلعانىن اتاپ ءوتتى.