بيىلعى بەس ايدىڭ قورىتىندىسى بويىنشا ءولىمنىڭ بىرقاتار كورسەتكىشتەرىنىڭ تومەندەۋى جانە بالالار مەن انالارعا مەديتسينالىق كومەك كورسەتۋ تيىمدىلىگىنىڭ ءوسۋى بايقالعان. وسىلايشا, ۇلتتىق ستاتيستيكا بيۋروسىنىڭ (ۇسب) دەرەكتەرىنە سايكەس, سابيلەر ءولىمىنىڭ كورسەتكىشى 26,3%-عا, التى ايدا انا ءولىمى 9,7%-عا تومەندەگەن, دەپ حابارلايدى Egemen.kz.
دەنساۋلىق ساقتاۋ مينيسترلىگىنىڭ مالىمەتىنشە وڭ ناتيجەلەرگە بوساندىرۋ قىزمەتى مەن پەدياتريالىق كومەكتى دامىتۋ بويىنشا جۇيەلى جۇمىس ەسەبىنەن قول جەتكىزىلگەن.
جاڭا تۋعان نارەستەلەر حيرۋرگياسىنىڭ دامۋىنا بايلانىستى جىل سايىن تۋا بىتكەن كەمىستىگى (تبك) بار 1500-گە جۋىق جاڭا تۋعان نارەستە جەدەل ەم الادى. ولاردى انىقتاۋ جانە ەمدەۋ ءۇشىن ەلدە ءتيىمدى جۇمىس ىستەيتىن ينفراقۇرىلىم – ءبىر كۇندىك كلينيكالار, ۇرىقتى ساقتاۋ ورتالىقتارى, دامۋ جانە ەرتە ارالاسۋ ورتالىقتارى قۇرىلدى.
تبك بار بالالاردى ەمدەۋگە ارنالعان 40 ورتالىق, كورۋ, ەستۋ قابىلەتىن ساقتاۋعا ارنالعان 20 ورتالىق جۇمىس ىستەيدى, ولاردىڭ باستاپقى مۇگەدەكتىگى 7,5%-عا تومەندەگەن, ەڭ باستىسى – جاڭا تۋعان نارەستەلەردىڭ ءومىر ءسۇرۋ دەڭگەيى 88%-دان 93%-عا دەيىن ارتقان.
قازىرگى ۋاقىتتا رەسپۋبليكادا 75 وڭالتۋ ورتالىعى جۇمىس ىستەيدى. «قامقورلىق» باستاماسى شەڭبەرىندە 25 وڭالتۋ ورتالىعى اشىلعان.
كادرلىق الەۋەتتى نىعايتۋ شەڭبەرىندە «پەدياتريا» ماماندىعى قالپىنا كەلتىرىلدى, 14 بالالار ماماندىعى بويىنشا رەزيدەنتۋرا ءبولىندى.
2024 جىلعى ماۋسىمنان باستاپ بوساندىرۋ قىزمەتىن قارجىلاندىرۋ ۇلعايتىلدى: بوساندىرۋ جانە بالالىق شاقتى قامتيتىن بەس نەگىزگى بەيىن بويىنشا تاريفتەر 40%-عا ءوستى. بۇل مەديتسينالىق كومەكتىڭ ساپاسىن جاقسارتۋعا جانە وعان قولجەتىمدىلىكتى ارتتىرۋعا مۇمكىندىك بەردى.
جالپى, بالا تۋدىڭ 14,6%-عا جانە حالىقتىڭ تابيعي ءوسىمىنىڭ 20,3%-عا تومەندەۋىنە قاراماستان, قازاقستاننىڭ دەنساۋلىق ساقتاۋ سالاسىندا انا مەن بالا دەنساۋلىعىن ساقتاۋ سالاسىنداعى تۇراقتى وڭ ديناميكا بايقالادى.