اقش-تا وتكەن «The Ultimate Fighter» (TUF) رەاليتي-شوۋىندا قازاق ۇلانى ءالىبي ىدىرىس (11-0) وزبەكستاندىق فۋركاتبەك ەكۋبوۆپەن (15-4) ايقاستى. ايگىلى چەيل سوننەن كومانداسىندا جاتتىعاتىن «Belarusian Fight Championship» پرومۋوشەنىنىڭ التىن بەلبەۋىنىڭ يەگەرىن ۇتۋ قانداسىمىزعا كوپ قيىندىق تۋعىزعان جوق. بارلىق تورەشى ءالىبيدىڭ مىقتىلىعىن ءبىراۋىزدان مويىندادى.
«TUF» رەاليتي-شوۋى وسىمەن 33-مارتە ۇيىمداستىرىلىپ وتىر. جارىستا جەڭىمپاز اتانعان فايتەر بىردەن UFC-گە جولداما الادى. كەزىندە كامارا ۋسمان, نەيت دياز, توني فەرگيۋسون, تاعى باسقا جۇلدىزداردىڭ ءدال وسى جوبا ارقىلى تانىلعانىن جانكۇيەرلەر جاقسى بىلەدى. قازىر ءالىبي ىدىرىسقا ءوزىن تۇبەگەيلى مويىنداتۋعا تاماشا مۇمكىندىك تۋىپ وتىر. ول كۇش سىناسىپ جۇرگەن 56,7 كگ سالماقتا سەگىز سپورتشى ءوز ونەرىن ورتاعا سالادى. ءالىبي العاشقى سىناقتان سۇرىنبەي ءوتتى. ەندى وعان جارتىلاي فينال مەن فينالدا جەڭىسكە جەتۋ قاجەت. ەگەر وسى جوسپار ويداعىداي جۇزەگە اسسا, جەڭىلىستىڭ كەرمەك ءدامىن تاتىپ كورمەگەن قازاقتىڭ قايسار ۇلىن ءبىز UFC-دەن كورەمىز. بۇل رەتتە ءدال وسى سالماقتا الەمنىڭ ەڭ بەلدى پروموۋشەنىندە اسۋ الماباەۆ پەن ازات ماقسۇمنىڭ دا بارىن ەستەرىڭىزگە سالا كەتەيىك.
30 جاستاعى اقتوبەنىڭ تۋماسى ءوزىنىڭ بارلىق جەكپە-جەگىن «نايزا» پروموۋشەنىندە وتكىزىپ, سول ۇيىمنىڭ چەمپيونى اتاندى. 2019–2025 جىلدار ارالىعىندا مەدەت جۇمامۇرات (سابمينشن), يسلام ايباتوۆ (سابمينشن), تەمۋر جاپاروۆ (ۇپاي سانىمەن), ارگەن مالىكوۆ (نوكاۋت), اسلان وتەعاليەۆ (ۇپاي سانىمەن), دجوحار ەسكيەۆ (نوكاۋت), فلاۆيو سانتوس (نوكاۋت), اليسسون سيلۆا (ۇپاي سانىمەن), ەريسسون فەررەيرا دە سيلۆا (نوكاۋت), ەديلسون سانتوسقا (نوكاۋت) سان سوقتىردى.
ءالىبي اقتوبە قالاسىندا «ەركىن كۇش» كلۋبىندا بىلىكتى باپكەر ايبەك شوقبىتوۆتىڭ قول استىندا جاتتىعادى. كوماندالىق ارىپتەستەرى قاتارىندا جالعاس جۇماعۇلوۆ, داۋرەن ەرمەكوۆ, گويتي دازاەۆ, نۇربەك قابدىراحمانوۆ, داستان امانكەلدى, باعدات جۇبانىش, تاعى باسقا تانىمال سپورتشىلار بار. سولاردىڭ اراسىنان جالعاس دارالانىپ, كەزىندە UFC-دە كۇش سىناستى. وزگە جىگىتتەردىڭ دە قارقىنى جامان ەمەس. ولار دا ءتۇرلى پروموۋشەندە ورەلى ونەرلەرىمەن جانكۇيەرلەردى قۋانتىپ ءجۇر.