قازاقستان پرەمەر-ءمينيسترى ولجاس بەكتەنوۆ پارلامەنت پالاتالارىنىڭ بىرلەسكەن وتىرىسىندا 2025 جىلدىڭ العاشقى بەس ايىنداعى ەلدىڭ ەكونوميكالىق دامۋى تۋرالى باياندادى. ۇكىمەت باسشىسى ەلىمىزدىڭ جالپى ىشكى ءونىمىنىڭ ء(جىو) ءوسىمى 6%-دى قۇراعانىن جانە بۇل وڭ قارقىننىڭ ساقتالۋى ماڭىزدى ەكەنىن اتاپ ءوتتى, دەپ حابارلايدى Egemen.kz.
بەكتەنوۆتىڭ ايتۋىنشا, نەگىزگى كاپيتالعا تارتىلعان ينۆەستيتسيالار كولەمى 18%-عا ۇلعايعان. سونىمەن قاتار, ەكىنشى دەڭگەيلى بانكتەردىڭ بيزنەسكە نەسيە بەرۋ كولەمى دە ارتىپ, وتكەن جىلمەن سالىستىرعاندا 16%-عا كوبەيگەن.
ەكونوميكانىڭ نەگىزگى قوزعاۋشى سالالارى رەتىندە قۇرىلىس (15%-دان استام), كولىك جانە قويمالاۋ (23%), وڭدەۋ ونەركاسىبى (6%) جانە ساۋدا (شامامەن 8%) اتالدى.
«بۇل قازىرگى ۋاقىتتا قارقىندى ءوسۋدى قامتاماسىز ەتەتىن نەگىزگى سالالار. ەندىگى باستى مىندەتىمىز – وسى قارقىندار مەن كورسەتكىشتەردى ساقتاۋ جانە ودان ءارى ارتتىرۋ», دەدى پرەمەر-مينيستر.
ونىڭ ايتۋىنشا, ۇكىمەت دامۋ بيۋدجەتىن كۇشەيتۋ جانە سالىق رەفورماسىن جۇرگىزۋ ارقىلى ينفراقۇرىلىمدىق جوبالاردى قارجىلاندىرۋدى ۇلعايتۋدى كوزدەپ وتىر. بۇل ۇزاقمەرزىمدى ءارى ورنىقتى وسىمگە جول اشۋى ءتيىس.
سونىمەن قاتار پرەمەر-مينيستر ولجاس بەكتەنوۆ پارلامەنت پالاتالارىنىڭ بىرلەسكەن وتىرىسىندا نارىق كونيۋنكتۋراسىن كورسەتپەيتىن باعالاردى رەتتەۋگە بايلانىستى سالا ۇزاق ۋاقىت بويى ينۆەستيتسيا ءۇشىن تارتىمسىز بولىپ كەلگەنىن اتاپ ءوتتى. ەركىن باعاعا كوشكەننەن كەيىن جاعداي وزگەرىپ جاتىر.
«سالالار بويىنشا ججم نارىعىن ىرىقتاندىرۋ باعىتىندا جۇرگىزىلىپ جاتقان جۇمىستار وڭ ناتيجە بەرۋدە. ججم باعاسى ۇزاق ۋاقىت بويى رەتتەلگەندىكتەن جانە ناقتى نارىقتىق جاعدايدى ءىس جۇزىندە كورسەتپەگەندىكتەن, ۇكىمەت باعانى ىرىقتاندىرۋعا كوشتى جانە ءبىز بۇل جۇمىس قازىردىڭ وزىندە ءوز ناتيجەسىن بەرىپ جاتقانىن كورىپ وتىرمىز. ينۆەستيتسيالار وسى سالاعا قايتا باستادى. سەبەبى بۇرىن سالا ينۆەستيتسيا ءۇشىن تارتىمسىز بولاتىن. قازىر جەكە بيزنەس مەملەكەتتىڭ باعانى ىرىقتاندىرۋىن جانە اتالعان سالانىڭ ينۆەستيتسيالىق تارتىمدىلىعى ارتىپ كەلە جاتقانىن كورىپ وتىر», دەدى ولجاس بەكتەنوۆ.