كەيىنگى جىلدارى بۇكىل الەمدە جانكۇيەرلەر تاراپىنان ۇستەل تەننيسىنە دەگەن قىزىعۋشىلىقتىڭ ارتا تۇسكەنىن اڭعارۋ قيىن ەمەس. سونىڭ ءبىر عانا دالەلى – دەڭگەيى اسا جوعارى جارىستاردىڭ ەڭ بەلدى ارنالاردان ءجيى كورسەتىلۋى, عالامتور مەن ءتۇرلى پلاتفورماداعى كورەرمەن سانىنىڭ كۇرت ارتۋى.
وسىدان ءبىراز ۋاقىت بۇرىن قاتاردىڭ باس شاھارى دوحادا الەم چەمپيوناتىنىڭ جالاۋى جەلبىرەدى. سول جارىستا ساراپقا سالىنعان بەس باس جۇلدەنىڭ تورتەۋىن قىتاي قۇراماسى ولجالادى. بىرەۋىن جاپونيا جامپوزدارى جەڭىپ الدى. كۇمىس پەن قولا مەدال العاندار قاتارىندا برازيليا, تايپەي, اۋستريا, رۋمىنيا, وڭتۇستىك كورەيا, فرانتسيا, گونكونگ, شۆەتسيا ورەندەرى بار. تورتكۇل دۇنيەنىڭ تەڭدەسسىزدەرى باس قوسقان باسەكەدە ەلىمىزدىڭ دە ۇستەل تەننيسشىلەرى ونەر كورسەتتى. وتانداستارىمىزدىڭ اراسىنان ەڭ ۇزدىك كورسەتكىشكە كيريلل گەراسيمەنكو قول جەتكىزدى. ول 1/16 فينالعا دەيىن جەتىپ, وسى مەجەدە الەم كۋبوگىنىڭ يەگەرى, پانامەريكا ويىندارىنىڭ 6 دۇركىن جەڭىمپازى, برازيليالىق ۋگو كالدەرانوعا جول بەردى. نەگىزى, بۇل ويىننىڭ العاشقى ەكى پارتياسى گەراسيمەنكونىڭ پايداسىنا شەشىلگەن ەدى. بىراق ودان كەيىن قاھارىنا مىنگەن كالدەرانو قاتارىنان ءتورت پارتيانى ءوز پايداسىنا شەشتى.
اتالعان جارىستان كەيىن دە ءدۇبىرلى دودالاردا دارالانىپ جۇرگەن ساڭلاقتار بىرقاتار تۋرنيردە باق سىنادى. سونىڭ ناتيجەسىندە اپتا سايىن الەمدىك رەيتينگكە وزگەرىس ەنگىزىلىپ وتىرادى. بۇگىندە لين شيدۋن (8675 ۇپاي) شاشاسىنا شاڭ جۇقتىرار ەمەس. بيىل اقپان ايىندا ءبىرىنشى ورىنعا كوتەرىلگەن 20 جاستاعى قىتايدىڭ اسا دارىندى ويىنشىسى ءالى دە سول تۇعىردان تۇسكەن جوق. شيدۋن بۋداپەشت, اممان, الماتى, ماكاو, ماسكات, فرانكفۋرت, سينگاپۋر, تاعى باسقا قالالاردا ۇيىمداستىرىلعان تۋرنيرلەردە توپ جاردى.
ەكىنشى ورىندا قىتايدىڭ تاعى ءبىر ءدۇلد ۇلى – ۆان تسيتسۋن (5275). ونىڭ جاسى 25-تە. العاش رەت 2018 جىلى جاسوسپىرىمدەردىڭ دۇنيەجۇزىلىك وليمپياداسىندا التىن تۇعىرعا كوتەرىلگەن تسيتسۋن سول كەزدەن بەرى بابىن جوعالتقان جوق. شەبەرلىگىن شىڭداي ءجۇرىپ, تالاي بيىكتى باعىندىردى. ولاردىڭ اراسىنان ازيا ويىندارى, ازيا كۋبوگى, WTT ساناتىنداعى تۋرنيرلەر سەرياسى, پاريج وليمپياداسىنىڭ كوماندالىق سايىسىنداعى جارقىن جەڭىستەرىن اتاپ وتۋگە بولادى. بيىل دوحاداعى الەم چەمپيوناتىندا دا ءدال وسى سپورتشى قارسىلاس شاق كەلتىرگەن جوق.
پارسى شىعاناعىندا ك.گەراسيمەنكونى جولىنان ىعىستىرعان ۋگو كالدەرانو (4575) ۇزدىكتەر تىزىمىندە ءۇشىنشى ورىندا. 28 جاستاعى مارقاسقا سول جارىستى كۇمىس مەدالمەن قورىتىندىلادى. بىلتىر وليمپيا ويىندارىندا ءتورتىنشى ورىنعا تۇراقتادى. جاپونيا جۇلدىزى توماكادزۋ حاريموتو (4550) وزىق تورتتىكتى تۇيىندەپ تۇر. سونداي-اق توپ-10 تەننيسشىنىڭ قاتارىندا قىتايلىق ليان تسزينكۋن (3900) مەن سيان پەن (2270), فرانتسيالىق فەليكس لەبرۋن (3220) مەن الەكس لەبرۋن (2420), شۆەتسيالىق ترۋلس مورەگارد (3155), سلوۆەنيالىق داركو يورگيچ (2070) سىندى سايىپقىراندار بار.
ەلىمىزدىڭ ەڭ مىقتى ۇستەل تەننيسشىسى ك.گەراسيمەنكو 60-ورىندا. 28 جاستاعى استانانىڭ تۋماسى ريو-دە-جانەيرو, توكيو, پاريج وليمپيادالارىنا قاتىستى. الەم چەمپيوناتتارىندا دا ءجيى بوي كورسەتىپ ءجۇر. بىرقاتار اسا ءىرى حالىقارالىق جارىستا تابىستى ونەر كورسەتتى. ماسەلەن, بيىل ەلىمىزدىڭ ەرلەر مەن ايەلدەر قۇراماسى ءوز تاريحىندا تۇڭعىش رەت ازيا چەمپيوناتىندا ۇزدىك سەگىز كوماندانىڭ قاتارىنا قوسىلدى. جەرلەستەرىمىزدىڭ وسىنداي تابىسقا جەتۋىنە كيريلدىڭ قوسقان ۇلەسى وراسان زور. ول ءوز باسەكەسىنىڭ بارلىعىندا جەڭىسكە جەتتى.
كەيبىرەۋلەرگە ك.گەراسيمەنكونىڭ ITTF رەيتينگىندە 60-ورىندا تۇرۋى قاراپايىم عانا كورسەتكىش بولىپ كورىنۋى مۇمكىن. استە ولاي ەمەس. بۇگىندە تاڭدا توپ-60-تىقتىڭ قاتارىنا ساناۋلى عانا مەملەكەتتىڭ ورەندەرى ەنىپ وتىر. اتاپ ايساق, بۇل تىزىمدە قىتايدىڭ – 11, جاپونيا مەن وڭتۇستىك كورەيانىڭ – 6, فرانتسيا مەن گەرمانيانىڭ – 5, اۋستراليانىڭ – 4, تايپەي مەن مىسىردىڭ – 3, برازيليا, شۆەتسيا, دانيانىڭ – 2-دەن, سلوۆەنيا, نيگەريا, حورۆاتيا, اقش, گونكونگ, يسپانيا, پولشا, ءۇندىستان, ۇلىبريتانيا, كانادانىڭ 1 وكىلى بار. بار-جوعى 22 ەلدىڭ عانا ورەندەرى مىقتىلاردىڭ ساناتىنا قوسىلىپ وتىر. كورىپ وتىرعانىمىزداي, بۇل تىزىمدە كسرو قۇرامىندا بولعان ءبىر عانا مەملەكەتتىڭ ويىنشىسى بار. ول – ەلىمىزدىڭ ءبىرىنشى راكەتكاسى كيريلل گەراسيمەنكو.
ەلىمىزدىڭ ەكىنشى راكەتكاسى الان قۇرمانعاليەۆتىڭ دە قارقىنى جاقسى. جاسوسپىرىمدەر مەن جاستار بۋىنى اراسىنداعى جارىستاردا ءوزىن تۇبەگەلى مويىنداتقان قانداسىمىز 2019 جىلى الەمنىڭ ەڭ ۇزدىك جاس ويىنشىسى اتاندى. ءوز قاتارلاستارى اراسىندا الەمدىك رەيتينگتە كوش باستادى. ەرەسەكتەر دۋىنا دا ەركىن قوسىلدى. كەيىننەن تالاي ءدۇبىرلى دودادا دارالاندى. قازىرگى كەزدە ا.قۇرمانعاليەۆ ITTF رەيتينگىندە 155-ورىندا تۇر. الاننىڭ جاسى 18-دە ەكەنىن ەسكەرسەك, شەبەرلىگى شىڭدالا كەلە ونىڭ باعىنداراتىن بەلەستەرى بۇگىنگىدەن الدەقايدا زور بولاتىنىنا سەنىم مول.
ۇستەل تەننيسىن سەرىك ەتكەن وزگە جەرلەستەرىمىز مىناداي ورىندارعا جايعاسقان: ايدوس كەنجەعۇلوۆ – 296, سانجار جۇبانوۆ – 349, ەسكەندىر حاركي – 356, ۆلاديسلاۆ زاحاروۆ – 433, داستان كەنجەعۇلوۆ – 469, ساعادات قۇرمامباەۆ – 479.