جىل باسىنان بەرى مۇگەدەك جانە اسىراۋشىسىنان ايىرىلعان ادامداردى مەملەكەتتىك الەۋمەتتىك قولداۋ اياسىندا رەسپۋبليكالىق بيۋدجەتتەن 272,7 ملرد تەڭگە ءبولىندى. بۇعان قوسىمشا مەملەكەتتىك الەۋمەتتىك ساقتاندىرۋ قورىنان (بۇدان ءارى – ماسق) ەڭبەككە قابىلەتتىلىگىنەن جانە اسىراۋشىسىنان ايىرىلعان جاندارعا شامامەن 37,3 ملرد تەڭگە سوماسىنا الەۋمەتتىك تولەمدەر بەرىلدى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بيىلعى جىلدىڭ 1 ماۋسىمداعى جاعداي بويىنشا مۇگەدەكتىگى بويىنشا ءماج الاتىن ازاماتتار سانى شامامەن 542,5 مىڭ ادامدى, ال اسىراۋشىسىنان ايىرىلۋ جاعدايىندا جاردەماقى الۋشىلار سانى 198,1 مىڭ ادامدى قۇراعان.
ەستەرىڭىزگە سالا كەتەيىك, مۇگەدەكتىگى بويىنشا جاردەماقى مولشەرى مۇگەدەكتىك توبى مەن سەبەبىنە جانە جىل سايىن بەكىتىلەتىن ەڭ تومەن كۇنكورىس دەڭگەيىنە (ەتكد) بايلانىستى ەسەپتەلەدى. اسىراۋشىسىنان ايىرىلۋ بويىنشا جاردەماقى دا اسىراۋىنداعى ادام سانى مەن قايتىس بولۋ سەبەبىنە قاراي بەلگىلەنەدى.
سونىمەن قاتار, الەۋمەتتىك تاۋەكەلدەرگە تاپ بولعان جاعدايدا مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا ماسق-دان قوسىمشا الەۋمەتتىك تولەمدەر تولەنەدى. بيىلعى 1 ماۋسىمداعى مالىمەتكە سايكەس, 93,2 مىڭ ادام ەڭبەككە قابىلەتتىلىگىنەن ايىرىلۋ بويىنشا, ال 64,2 مىڭ وتباسى اسىراۋشىسىنان ايىرىلۋ بويىنشا الەۋمەتتىك تولەم العان.
بۇل تولەمدەردىڭ كولەمى ازاماتتىڭ سوڭعى ەكى جىلداعى الەۋمەتتىك اۋدارىمدارىنا, ەڭبەككە جارامدىلىق دارەجەسىنە, اسىراۋىنداعى ادامدار سانىنا جانە جۇيەگە قاتىسۋ وتىلىنە بايلانىستى انىقتالادى.
«مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى 2025 جىلعى 1 قاڭتاردان باستاپ ەڭ تومەن كۇنكورىس دەڭگەيىنىڭ ۇلعايۋىنا بايلانىستى 6,5% - عا ءوستى. قر ۇكىمەتىنىڭ شەشىمى بويىنشا ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا ماسق-دان تولەنەتىن تولەمدەردىڭ مولشەرى دە 6,5% - عا ارتتى.ماسەلەن, وسى جىلى جالپى اۋرۋدان مۇگەدەكتىگى بويىنشا ءماج مولشەرى 1-توپ ءۇشىن – 101 702 تەڭگەنى, 2-توپ ءۇشىن – 81 362 تەڭگەنى, 3-توپ ءۇشىن – 55 474 تەڭگەنى قۇرايدى», دەلىنگەن حابارلامادا.
ايتا كەتەيىك, 1 ماۋسىمداعى جاعداي بويىنشا ەڭبەككە قابىلەتتىلىگىنەن ايىرىلۋ بويىنشا الەۋمەتتىك تولەمدەردىڭ ورتاشا مولشەرى 70 245 تەڭگەنى, اسىراۋشىسىنان ايىرىلۋ بويىنشا – 72 524 تەڭگەنى قۇرايدى.