جاتقا «جەم بولعان» جەكە دەرەك

العاش بولىپ بۇل ماسەلە جونىندە دابىل قاققان  كيبەرشابۋىلداردى زەرت­تەۋ جانە تالداۋ ورتالىعىنىڭ پرەزيدەنتى ولجاس ساتيەۆ. ونىڭ ايتۋىنشا, تاراعان اقپارات بۇرىنعى مالىمەتتەر بازاسىنان الىنعان بولۋى مۇمكىن نەمەسە مۇلدە جاڭا دەرەككوزدەن الىنعان. ونداي جاعدايدا بۇل اسا كولەمدى دەرەكتەردىڭ زاڭسىز جاريالانۋى رەتىندە تىركەلەدى. ساراپشى قازىرگى ۋاقىتتا اقپاراتتار «Telegram»-داعى جابىق ارنالاردا ساتىلىپ جاتقانىن ايتتى. ياعني جەكە دەرەكتەر قىلمىستىق نارىققا ءتۇسىپ كەتكەن.

وسى جاعدايعا بايلانىستى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتى تەكسەرىس جۇرگىزىپ جاتقانىن حابارلادى. مينيسترلىك وكىلى دەر­بەس دەرەكتەردى قورعاۋدى دامىتۋ باسقارماسىنىڭ باسشىسى نۇربول مۇقاشەۆ رەسمي پىكىر ءبىلدىردى. «الەۋمەتتىك جەلىلەردە ازاماتتاردىڭ دەربەس دەرەكتەرى تارالدى دەگەن اقپاراتقا بايلانىستى مينيسترلىك ءتيىستى جۇمىس جۇرگىزىپ جاتىر. اقپاراتتىق قا­ۋىپ­­سىزدىك كوميتەتى قۇقىق قور­عاۋ جانە ارنايى ورگاندارمەن بىرلەسە وتىرىپ, ۇسىنىلعان ما­لىمەتتەردىڭ شىنايىلىعى مەن وزەكتىلىگىن انىقتاۋ ماقساتىندا تەكسەرۋدى باستادى. العاشقى تالداۋ بۇل دەرەكتەردىڭ مەملەكەتتىك ەمەس ەكەنىن, ياعني جەكەمەنشىك اقپاراتتىق جۇيەلەردەن الىن­عانىن كورسەتىپ وتىر. بۇگىنگى تاڭدا مەملەكەتتىك اقپاراتتىق جۇيە­لەردەن دەربەس دەرەكتەردىڭ تارالۋى نەمەسە حاكەرلىك شابۋىلدار تىركەلگەن جوق», دەدى ول.

سونداي-اق رەسمي وكىل ەگەر ازاماتتىڭ دەربەس دەرەگى تارالعان تىزىمدە بولسا, وعان «eGov» پورتالى ارقىلى جەكە كابينەتىنە ارنايى حابارلاما جىبەرىلەتىنىن ايتتى. مۇنداي ءتاسىل بۇعان دەيىن دە قولدانىلعان. جەكە كابينەتكە ەسكەرتۋ جىبەرۋ – تسيفرلىق تۇرعىدا بەلسەندى ازاماتتار ءۇشىن قولايلى شىعار. بىراق كۇندەلىكتى پورتالعا كىرمەيتىن, اسىرەسە ەگدە جاستاعى ادامدار حابارلامانى مۇلدە بايقاماۋى مۇمكىن. بۇل ءوز كەزەگىندە جەكە دەرەكتەردىڭ تارالۋ فاكتىسى تۋرالى ازاماتتىڭ ءوزى بىلمەي قالۋىنا سەبەپ بولادى.

جەكە دەرەكتەردىڭ جاريالانىپ كەتۋ جاعدايى 2024 جىلى دا بولعان. ەل ازاماتتارىنىڭ دەرەگى قىتاي سايتتارىنان تابىلعان. ن.مۇ­قاشەۆتىڭ ايتۋىنشا, ول كەزدە جەكە دەرەكتەر قىزمەت كورسەتۋ سالالارى مەن ميكروقارجى ۇيىم­دارىنىڭ ەسكى بازالارىنان الىن­عان. تالداۋ جۇرزىلگەننەن كەيىن «قازاقتەلەكوم», «AirAstana» كومپانيالارىنىڭ دا قاۋىپ­­سىزدىك ەرجەسىن بۇزعانى انىق­تالىپ, 100 اەك (369 200 تەڭگە) كولەمىندە ايىپپۇل سالىنعان. الايدا الەۋمەتتىك جەلى قولدانۋ­شىلارىنىڭ پىكىرىنشە, الىپ كومپانيالارعا از سوماداعى ايىپ­­پۇل سالۋ ولاردىڭ تسيفرلىق قاۋىپسىزدىككە جاۋاپكەرشىلىك الۋىنا تۇرتكى بولمايدى. ال بۇل جولعى مالىمەتتەردىڭ قايدان الىنعانى ءالى بەلگىسىز, بىراق جاۋاپتى مەكەمە دەرەكتەر رەسمي بازادان الىنباعان دەپ وتىر. مينيسترلىك بۇل جاع­داي­دى قاتاڭ باقىلاۋدا ۇستاپ وتىر­عانىن جانە تەكسەرۋ اياقتالعان سوڭ قوسىمشا اقپارات جاريالانا­تى­نىن حابارلادى. ادەتتەگىدەي جا­ۋاپتى ورگاندار ءار وقيعادان كە­يىن تەكسەرىس جۇرگىزىپ, مالىمدەمە جا­ساۋ­مەن عانا شەكتەلەدى.

وقيعانىڭ قايتالانۋى جيىلەپ بارادى. قوعامدا سۇراق كوپ. دەرەك­تەر مەملەكەتتىك جۇيەدەن شىقپاسا, ول جەكە جۇيەلەرگە قالاي جەتكەن؟ جۇيەلەر كىمگە تيەسىلى, قانداي نەگىزدە جۇمىس ىستەيدى؟ ەگەر دەرەكتەر شىنىمەن ەسكى بولسا, وندا ولاردىڭ قازىر قايتا ساتىلىپ جات­قانى قالاي تۇسىندىرىلەدى؟ جەكە بازالاردا ساقتالعان ازاماتتاردىڭ دەرەكتەرى قانداي كەلىسىممەن وڭدەلىپ, تاراتىلىپ ءجۇر؟ ۇلتتىق قاۋىپسىزدىك كوميتەتى بۇل سۇراقتارعا رەسمي جاۋاپ بەرۋدەن باس تارتتى. ساراپشىلاردىڭ ايتۋىنشا, بۇل جەردە باستى ماسەلە ازاماتتىڭ جەكە دەرەكتەرىن كىم, قالاي جانە قانداي جاۋاپكەرشىلىكپەن ساقتايتىنىندا. ال دەرەك تارالعاننان كەيىن تەكسەرۋ جۇرگىزۋ جەتكىلىكسىز. ناقتى شارالار قابىلدانۋ كەرەك.