نيدەرلاندتىڭ ەيندحوۆەن قالاسىندا وتكەن حالىقارالىق تۋرنيردە ەلىمىزدىڭ بوكسشىلارى تابىستى ونەر كورسەتتى. فينالعا شىققان بەس جىگىتىمىز دە قارسىلاستارىن ەركىن ۇتىپ, جەڭىس تۇعىرىنىڭ ەڭ بيىك ساتىسىنا كوتەرىلدى.
جەڭىستى جولدى دانيال ءسابيت (50 كگ) باستاپ, موڭعول الدارحيشيگ باتۋلگادان باسىم ءتۇستى. كوپ كەشىكپەي رينگكە ابىلايحان ءجۇسىپوۆ كوتەرىلدى. الەم چەمپيوناتىنىڭ ءۇش دۇركىن قولا جۇلدەگەرى تىم كۇشتى قارسىلاسقا تاپ بولدى. وزبەكستاننىڭ ۇكىلەگەن ءۇمىتى اسادحۋدجا مۋيدينحۋدجاەۆ 2023 جىلى تاشكەنتتە الەم چەمپيونى, بىلتىر پاريجدە وليمپيا ويىندارىنىڭ جەڭىمپازى اتاندى. ەكى ساڭلاق بىردەن اشىق ايقاسقا باردى. ەكىنشى راۋندتا ابىلايحاننىڭ قاباعى جارىلدى. دارىگەرلەر جەرلەسىمىزگە جەكپە-جەكتى جالعاستىرۋعا رۇقسات بەرمەدى. ەرەجەگە ساي ءدال سول ساتكە دەيىن كىمنىڭ ۇپايى كوپ بولسا, جەڭىس سونىڭ ەنشىسىنە جازىلادى. بۇل رەتتە ا.ءجۇسىپوۆتىڭ جولى بولدى.
ەراسىل جاقپەكوۆ (80 كگ) پەن داۋلەت تولەمىسوۆ (80 كگ) ۋكراينانىڭ وكىلدەرىمەن قولعاپ ءتۇيىستىردى. بۇل باسەكەلەردە ءبىزدىڭ جىگىتتەردىڭ باسىمدىعى انىق بايقالدى. ەراسىل ارتۋر كاسيانوۆتى وڭاي ەڭسەرسە, داۋلەت ميكولا لاكتيونوۆقا ادىم اشتىرمادى. الىپتاردىڭ ايقاسى نۇرلان ساپاربايدىڭ (+90 كگ) جارقىن جەڭىسىمەن اياقتالدى. كەزدەسۋ بارىسىندا گەرمانيالىق دەنيس وحونى ەكى رەت نوكداۋنعا جىبەرگەن جامپوزىمىز باس جۇلدەنى قانجىعاسىنا بايلادى. ەرتۋعان زەينۋللينوۆ (65 كگ), سابىرجان اققالىقوۆ (75 كگ), ساعىندىق توعامباي (90 كگ) قولا مەدالدى ەنشىلەدى.
ءسويتىپ, قىزعالداقتار ەلىندە جالاۋى جەلبىرەگەن جارىستا 5 التىن, 3 قولا مەدال ولجالاعان ەلىمىزدىڭ ۇلتتىق قۇراماسى جالپى كوماندالىق ەسەپتە جەكە-دارا كوش باستادى.