استانا تورىندە «التىن گەفەست» تاۋ-كەن مەتاللۋرگيا ونەركاسىبىنىڭ سالالىق بايقاۋى ءوز مارەسىنە جەتتى. اتالعان بايقاۋدا «ۇزدىك الەۋمەتتىك جوبا» رەتىندە سەمەيدە اشىلعان جاڭا IT-مەكتەپ-ليتسەيى جەڭىمپاز اتاندى, دەپ جازادى Egemen.kz.
بىلتىر اشىلعان IT-مەكتەپ-ليتسەي 1 800 وقۋشىعا ارنالعان. وقۋ ورنىندا ينفورماتيكالىق, مۋلتيمەديالىق بولمەلەر, زەرتحانالار, شەبەرحانالار مەن ەڭبەك جانە كۋلينارياعا ارنالعان جالپى سانى 48 كابينەت بار. مەكتەپتە ينكليۋزيۆتىك تالاپتارى ەسكەرىلگەن. كاسىپتىك ءبىلىم بەرۋدىڭ العاشقى باسپالداعى رەتىندە بۇل اباي ەلىندەگى ەرەكشە مەكتەپتەردىڭ ءبىرى دەسە دە بولادى. اتالعان مەكتەپتىڭ قۇرىلىسىنا KAZ Minerals توبى 10 ميلليارد تەڭگە كولەمىندە ينۆەستيتسيا سالىپ, جوبا ءبىر جىل ىشىندە جۇزە اسقان.
اتالعان بايقاۋدا «جىل شاحتەرى» نوميناتسياسىندا جەڭىسكە جەتكەن ەرتىس كەنىشىنىڭ بۇرعىلاۋشىسى تيمۋر سەرىكباەۆ: «بۇل مەن ءۇشىن ۇلكەن مارتەبە. ارىپتەستەرىم مەن بارلىق كەنشىلەرگە راحمەت! بارشاڭىزعا دەنساۋلىق پەن ەڭبەك قاۋىپسىزدىگىن تىلەيمىن», دەيدى سونىمەن قاتار تاعى ءبىر جەرلەسىمىز «جىل تالىمگەرى» نوميناتسياسىندا جەڭىمپاز اتاندى. ول – اقتوعاي كەن بايىتۋ فابريكاسىنىڭ فلوتاتورى كۇلكەن داگيلوۆا.
– بۇل ادام كاپيتالىن دامىتۋعا ارنالعان ستراتەگيامىزدىڭ ماڭىزدى كەزەڭى. ءبىز تاجىريبەدەن وتكىزۋ, قايتا دايارلاۋ جانە مەكتەپتەردى بار قاجەتتىلىكپەن قامتاماسىز ەتۋ ارقىلى ءبىلىم بەرۋ سالاسىن كوپتەن قولداپ كەلەمىز. جاڭا ليتسەي جالپى ءبىلىم بەرۋ تالابىنا ساي, – دەيدى دەمەۋشىلەر.