بۋبليك – شيرەك فينالدا

ەرلەر مەن ايەلدەر ارا­سىنداعى جەكەلەگەن سا­يىستا باس جۇلدەنى ولجالاعان تەننيسشىلەردىڭ ارقاي­سىسىنا 2 550 000 ەۋرودان تابىس ەتىلەدى. فينالدا ۇتىلعاندار جوعارىدا كورسەتىلگەن سومانىڭ تەڭ جارتىسىن يەلەنەدى. جارتىلاي فينال مەن شيرەك فينالعا شىققاندار 690 000 پەن 440 000 ەۋرونى ەنشىلەيدى. ەكىنشى (265 000 ەۋرو), ءۇشىنشى (168 000 ەۋرو), ءتورتىنشى (117 000 ەۋرو) كەزەڭدە ويناعاندار دا مول مولشەردە سىياقى الادى. تىپتەن تۇساۋكەسەر كەزدەسۋدە سۇرىنگەندەر دە ۇيلەرىنە قۇر قول قايتپايدى. ولاردىڭ ارقايسىسىنا 78 000 ەۋرودان تيەسىلى. سول سەكىلدى جۇپتىق, ارالاس جۇپتار اراسىنداعى جارىسقا قاتىسۋشىلارعا دا ەداۋىر كولەمدە سىياقى قاراستىرىلعان.

ەلىمىزدىڭ بەس تەننيسشىسى ىرىكتەۋ تۋرنيرىنە قاتىستى. بىراق ءبا­رىنىڭ بىردەي جولى بولمادى. بەيبىت جۇقاەۆ پەن ميحايل كۋكۋشكين العاشقى اينالىمداردا ءسۇرىندى. تيموفەي سكاتوۆ پەن دميتري پوپكو ەكىنشى كەزەڭدە جەڭىلىستىڭ كەرمەك ءدامىن تاتتى. تەك الەكساندر شەۆچەنكو عانا, جاپونيالىق شينتارو موچيزۋكي, فرانتسيالىق ماتيس ەرارانا, اۋستريالىق فيليپ ميسوليچتەن ايلاسىن اسىرىپ, جارىستىڭ نەگىزگى بولىگىنە جولداما الدى. ءسويتىپ, ەلىمىزدىڭ ءتورت ويىنشىسى رولان گارروستا ونەر كورسەتۋ قۇقىعىنا يە بولدى.

ەلىمىزدىڭ ەڭ ۇزدىك تەننيسشىسى ەلەنا رىباكينا تۇساۋكەسەر كەزدەسۋىندە بەليندا بەنيچيچەن وي­ناۋعا ءتيىس ەدى. الايدا شۆەي­تساريانىڭ وكىلى جاراقاتىن جەلەۋ ەتىپ, جارىسقا قاتىسۋدان باس تارتتى. ونىڭ ورنىن ارگەن­تينالىق حۋليا ريەرا باس­تى. وتان­داسىمىز WTA رەيتينگىندە 204-ورىندا تۇرعان ويىنشىنى 6:1, 4:6, 6:4 ەسەبىمەن ۇتتى. يۋليا پۋتينتسەۆا دا ىرىكتەۋ تۋرنيرىندە توپ جارعان تاعى ءبىر ارگەنتينا وكىلى سولانو سەرامەن سايىسقا ءتۇستى. بۇل تارتىستا وتانداسىمىز جەڭىس­كە جەتتى – 6:1, 4:6, 6:4. ەرلەر اراسىنداعى ەلىمىز­دىڭ ءبىرىنشى راكەتكاسى الەكساندر بۋبليك اتر تىزىمىندە 92-ساتىعا جايعاسقان اۋس­تراليا وكىلى دجەيمس داكۆورتتى ەش قينالماي ەڭسەردى. 6:2, 6:4, 6:4 الەك­ساندر شەۆچەنكو سەربيالىق دۋشان لايوۆيچكە سان سوقتىردى – 6:2, 6:4, 7:6.

ەكىنشى كەزەڭدە رىباكينا امەريكالىق يۆا ءيوۆيچتى (6:3, 6:3), پۋتينتسەۆا تايپەيلىك دجوان­نا گارلەتتى (7:6, 6:3), بۋبليك اۋستراليالىق الەكس دە مينوردى (2:6, 2:6, 6:4, 6:3, 6:2) جولدا قالدىردى. شەۆچەنكو امەريكالىق يتان كۋينگە (4:6, 6:4, 7:6, 6:7, 5:7) ەسە جىبەردى. ءۇشىنشى اينالىمدا ەلەنا لاتۆيالىق ەلەنا وس­تا­پەنكونى (6:2, 6:2), الەكساندر پورتۋگاليالىق ەنريكە روشانى (7:5, 6:1, 6:2) ۇتتى. يۋليا رەسەيلىك ميررا اندرەەۆادان (3:6, 1:6) ايلاسىن اسىرا المادى. ءتورتىنشى كەزەڭدە ە.رىباكينا ءسۇرىندى. جەر­لەسىمىز پولشالىق يگا شۆەن­تەك­تىڭ وسال تۇسىن تابا المادى (6:1, 3:6, 5:7).

ءتورتىنشى كەزەڭدە الەكساندر بۋبليك الەمنىڭ بەسىنشى راكەتكاسى دجەك درەيپەرمەن كۇش سىناستى. بۇل باسەكەنىڭ ءفاۆوريتى اتر تىزىمىندە وتانداسىمىزدان 57 ساتى جوعارى تۇرعان ۇلىبريتانيانىڭ ويىنشىسى ەكەنى انىق ەدى. دەگەنمەن بۇل كەشتە الەكساندر وتە ءساتتى ويناپ, 5:7, 6:3, 6:2, 6:4 ەسەبىمەن جەڭىسكە جەتتى. ءسويتىپ, ەل تەننيسشىلەرى اراسىندا جارىس جولىندا جالعىز بۋبليك قانا قالدى.