قوستاناي وبلىستىق قۋىرشاق تەاترىندا 3 جاسقا دەيىنگى سابيلەرگە ارنالعان ەرتەگى ساحنالاندى. وزگەشە فورماتتاعى جاڭا قويىلىمنىڭ ەرەكشەلىگى سول – مۇندا ءداستۇرلى تەاترداعى ەرەجەلەر ساقتالا بەرمەيدى.
مىسالى, ساحنا, ورىندىق دەگەندەر اتىمەن جوق. بوبەكتەر اتا-انالارىمەن بىرگە جۇمساق تەكەمەتتىڭ ۇستىندەگى كورپەشەلەرگە جايعاسىپ, ءدال قاسىندا بولىپ جاتقان قىزىقتى جايتتاردى تاماشالايدى. ءتىپتى, ەرتەگى الەمىنە ەنىپ, ونداعى بولىپ جاتقان وقيعالارعا ارالاسىپ, كەيىپكەرلەرمەن تىلدەسە الادى.
باس-اياعى جارتى ساعاتتىق سپەكتاكل «مايماق قونجىق» دەپ اتالادى. اڭعال كەيىپكەر ءوزىنىڭ مايماقتىعىنا وكىنەدى. ءوزىن مازاق ەتكەن قويان, ءتيىن, شىمشىق ءتارىزدى دوستارىنا ىزالانىپ, «اياعىمدى قالاي تۇزەتىپ السام ەكەن» دەپ ناليدى. الايدا اناسىنىڭ, ەڭ باستىسى, جاڭا دوستارى كىشكەنتاي كورەرمەندەردىڭ كومەگىمەن جالپى ايۋ بىتكەننىڭ جاراتىلىسى وسىلاي بولاتىنىن ءتۇسىنىپ, كوڭىلى كوتەرىلەدى. قۋانعانى سونشا, جاڭا دوستارىنا قۋىرشاقتارىن ۇلەستىرىپ بەرىپ, ءبارى بىرگە قول ۇستاسىپ بيلەي جونەلەدى.
تەاتر ديرەكتورى تولەندى العوجانىڭ ايتۋىنشا, وبلىستىق قۋىرشاق تەاترى كىشكەنتاي كورەرمەندەرىنە بيىلدان باستاپ قانا قازاق تىلىندەگى قويىلىمدار ۇسىنا باستاعان.
«بيىل جالپى جەتى سپەكتاكل جوسپارلاپ وتىرمىز. ونىڭ ۇشەۋى قويىلدى. بۇگىن, مىسالى, ءۇشىنشى سپەكتاكلىمىزدى ۇسىندىق. بۇل – الماتىدان كەلگەن رەجيسسەرىمىز انار بەرىكقىزىنىڭ تۋىندىسى. التى ايلىق بالاسىمەن كەلىپ جاتقان اتا-انالار بار. ءۇش-ءتورت جاستاعى بالالار كوپ كەلىپ جاتىر. تاعى ءبىر ەرەكشەلىگى, سپەكتاكلگە پايدالاناتىن قۋىرشاقتارىمىز بەن رەكۆيزيتتەرىمىزدىڭ ءبارى قولدان توقىلعان. سۋرەتشىلەرىمىز بەن كوركەمدىك جەتەكشىمىز توقيدى. ۇستاۋعا ىڭعايلى ءارى جۇمساق. بۇل 5-6 ايلىق بالانىڭ اكتەرلەر جانىندا ەڭبەكتەپ ءجۇرىپ جاڭاعى جۇمساق قۋىرشاقتاردى ۇستاپ, كورىپ, سەزىپ, دامۋىنا اسەر ەتەدى. مىسالى, بۇگىنگى قويىلىمدا اكتەرلەر تاۋىقتاردىڭ قارنى اشىپ قالدى دەپ, ورتاعا بالالاردى شاقىرىپ, ءبارى بىرلەسىپ قۇستارعا تارى شاشىپ, تاماقتاندىراتىن ءسات بار. نەمەسە قونجىقتى ارا قۋالايتىن كەزدە قونجىق بالالاردىڭ اراسىنا جاسىرىنادى. بالدىرعاندار وعان كومەكتەسىپ, ارادان اراشالاپ قالادى. بالالار ءۇشىن كادىمگىدەي قىزىق», دەيدى تەاتر باسشىسى.
جاڭا قويىلىمدى تاماشالاۋعا ون شاقتى اتا-انا عانا كەلدى. ەكىدەن جاڭا اسقان ءامىردىڭ اناسى ديانا جۇنىسقىزى مۇنداي سپەكتاكلدەردىڭ ءجيى بولىپ تۇرعانىن قالايدى.
«بالا كۇتىمىمەن وتىرعاندىقتان, كوبىنە ۇيدەن شىقپايمىز. بۇگىن قۋىرشاق تەاترىنا كەلىپ, ءوزىم دە, بالام دا بوي سەرگىتىپ, ءبىر جاساپ قالدىق. سپەكتاكل, اسىرەسە, امىرگە قاتتى ۇنادى. ارتىستەرگە قوسىلىپ ءان ايتتى, قونجىقپەن بىرگە جۇگىرىپ بيلەدى. بالالار ءۇشىن قىزىق ءارى پايدالى قويىلىم ەكەن. بالامەن قوسا ۇيدە وتىرعان انالاردىڭ ءبىر اۋىق دەمالىپ كەتۋىنە دە سەپتىگىن تيگىزەدى», دەيدى ديانا.
قوستاناي وبلىسى