بۇگىندە ەلىمىزدەگى بالالاردىڭ 46 پايىزى ينتەرنەتكە 5-8 جاس ارالىعىندا كىرسە, 5 پايىزى 4 جاسقا تولماي جاتىپ تسيفرلىق الەمنىڭ ەسىگىن اشادى ەكەن. سمارتفون – بالانىڭ ويىنشىعى عانا ەمەس, ۇستازىنا دا اينالدى. تسيفرلىق داۋىردە دۇنيەگە كەلگەن ۇرپاق ءۇشىن تەحنولوگيا تاڭسىق ەمەس – تابيعي ورتاسى. ەندەشە, ولاردىڭ اقپاراتتى قالاي تۇتىناتىنى, نەگە سەنەتىنى, ءتىپتى قانداي تىلدە سويلەيتىنى – وسى قۇرىلعىعا بايلانىستى. سول سەبەپتى بالالارعا ارنالعان قازاقشا تسيفرلىق قوسىمشالار مەن جوبالاردىڭ ماڭىزى ارتا ءتۇستى.
«Bilimland»
بالالارعا تسيفرلىق ءبىلىم بەرۋ سالاسىندا ايتارلىقتاي جۇمىس اتقارعان وتاندىق جوبانىڭ ءبىرى – «Bilimland». بۇل جوبا – ءبىلىمنىڭ قولجەتىمدى ءارى ساپالى بولۋىنا باعىتتالعان, تەحنولوگيا مەن مازمۇندى ۇيلەستىرە العان ەرەكشە ەكوجۇيە. پلاتفورما 2011 جىلدان باستاپ ۇزدىكسىز دامىپ كەلەدى. «بىلىمدىگە دۇنيە جارىق» دەگەن ءسوزدىڭ سالماعى قازىر بۇرىنعىدان دا ارتىپ, ءار بالانىڭ تاعدىرىنا اسەر ەتەتىن فاكتورعا اينالدى. باعدارلامادا بالا ءۇشىن قىزىقتى, ەستە قالاتىن انيماتسيالىق ۆيدەولار, زاماناۋي ترەناجەرلەر مەن سيمۋلياتورلار, ءارتۇرلى دەڭگەيدەگى ينتەراكتيۆتى تاپسىرمالار جيناقتالعان. مۇعالىمدەرگە ادىستەمەلىك كومەك الۋعا, اتا-انالارعا بالاسىنىڭ ءبىلىم الۋىن باقىلاۋعا, وقۋشىعا – ءبىلىمدى ويىن تۇرىندە يگەرۋگە جول اشىق. «Bilimland» تەك تەحنيكالىق ءونىم ەمەس. ونىڭ ارتىندا ءبىلىم سالاسىن جەتە بىلەتىن كاسىبي مۇعالىمدەر مەن ادىسكەرلەر, شىنايى شىعارماشىلىق يەلەرى – انيماتورلار مەن ديزاينەرلەر, مازمۇنعا جان بىتىرگەن رەداكتورلار مەن تەحنار-پروگرامميستەر تۇر.
ولار تەك ۆيزۋالدى نەمەسە تەحنيكالىق ساپاعا ەمەس, پەداگوگيكالىق مانگە دە اسا نازار اۋدارادى. «Bilimland» ۇستاناتىن باستى قاعيدا – ءبىلىمدى بارشاعا قولجەتىمدى ەتۋ. كومپانيا ەلىمىزدەگى ەلەكتروندى وقىتۋ نارىعىنىڭ نەگىزىن قالاۋشىلاردىڭ ءبىرى رەتىندە وقۋشى مەن مۇعالىمدى عانا ەمەس, اتا-انالاردى دا قامتۋعا تىرىسادى. ءار بالا ءبىلىم الۋى ءۇشىن ەرەكشە ءتاسىلدى قاجەت ەتەدى. وسىنى ەسكەرگەن «Bilimland» كونتەنتتى جاسايتىن كەزدە بالانىڭ قابىلداۋ قابىلەتىنە, قىزىعۋشىلىعىنا بەيىمدەيدى. بۇل – ەرتەڭگى ۇرپاقتىڭ تالابىنا جاۋاپ بەرە الاتىن از جوبالاردىڭ ءبىرى.
«iBars Kids»
بالا ويىنى – بولاشاقتىڭ تاربيەسى. قازىر ۇيالى تەلەفون ۇستاعان بالدىرعان قۇرىلعىنى بىزدەن جىلدام مەڭگەرەدى. ەندەشە, ولاردىڭ قولىنداعى تەلەفوندا نە بار – سول ماڭىزدى. وسى تۇرعىدان كەلگەندە, «iBars Kids» – ويىن ارقىلى ويلاندىراتىن, قىزىقتىرا وتىرىپ دامىتاتىن قازاقتىلدى العاشقى ءموبيلدى قوسىمشا. ول جاي قوسىمشا ەمەس, ءسابيدىڭ سويلەۋ قابىلەتىن ۇشتاپ, لوگيكاسىن جەتىلدىرەتىن تسيفرلىق كومەكشى.
2-5 جاس ارالىعىنداعى بالالارعا ارنالعان قوسىمشادا ميدى دامىتۋعا ارنالعان ويىن فورماتىنداعى تاپسىرمالار جيناقتالعان. اسىرەسە «ينتەللەكت» پەن «لوگيكا» بولىمدەرى بالانىڭ ويلاۋ قابىلەتىن شيراتىپ, تانىم كوكجيەگىن كەڭەيتەدى. ماتەماتيكا الەمىنە العاشقى قادام جاساعىسى كەلەتىن بالاقايلارعا ارنالعان «ساندار» ءبولىمى دە بار. ال ءۇش ءتىلدى قاتار مەڭگەرتۋ – بۇگىنگى زامان تالابى. سول سەبەپتى «iBars Kids» قوسىمشاسى ارقىلى بالالار قازاق, ورىس, اعىلشىن ءتىلىن قاتار ۇيرەنە الادى. قوسىمشادا بالالار تەك جاتتاپ قانا قويماي, شىعارماشىلىققا دا بەت بۇرادى. «بوياماق» بولىمىندە الەم مۋلتفيلمدەرىندەگى كەيىپكەرلەردى بوياۋ ارقىلى بالانىڭ قيالى مەن سەزىمى قاتار داميدى. ەڭ باستىسى – قوسىمشادا ساپالى دىبىستىق سۇيەمەلدەۋ بار. بۇل ءسابيدىڭ ءسوز تانۋىنا, سويلەۋ ءتىلىنىڭ قالىپتاسۋىنا وڭ اسەر ەتەدى. جوبانىڭ اۆتورى, «IT»-كاسىپكەر قازبەك ساعيدوللا بۇل باستامانى جاي بيزنەس ەمەس, ۇلتقا قىزمەت دەپ بىلەتىنىن ايتادى. «ويىنىمىز بالالارعا بارىنشا قىزىقتى بولۋى ءۇشىن ەرەكشە پەداگوگيكالىق تاسىلدەردى, جارقىن ديزاين مەن ساپالى دىبىستىق سۇيەمەلدەۋدى پايدالاندىق. قازىرگى تاڭدا ءموبيلدى ويىنىمىز رەسپۋبليكالىق, حالىقارالىق نارىقققا شىقتى. الداعى ۋاقىتقا ءبىزدىڭ جوسپارلارىمىز وراسان. قازىرگى كەزدە ويىننىڭ كومپيۋتەرلىك نۇسقاسى دا بار», دەيدى ستارتاپ نەگىزىن قالاۋشى.
«iBars Kids» قوسىمشاسىن «App Store» مەن «Google Play» دۇكەندەرىنەن جۇكتەپ الۋعا بولادى. ەڭ باستىسى, بۇل قوسىمشا بالانىڭ بىلىمگە دەگەن العاشقى قادامىن انا تىلىندە باستاۋىنا مۇمكىندىك بەرەدى.
«BalaTime»
«BalaTime» – زاماناۋي بالالاردىڭ كۇن ءتارتىبىن وڭتايلى ۇيىمداستىرۋعا ارنالعان ءموبيلدى قوسىمشا. اتا-انانىڭ دا, بالانىڭ دا ۋاقىتىن جۇيەلەپ, تارتىپكە شاقىرادى. بالاقايدىڭ ۇيقى ۋاقىتى, تاماقتانۋى, سەرۋەنى, ءتىپتى ەكران الدىنداعى ۋاقىتى – بارلىعىن جۇيەلى باقىلاۋعا بولادى. تسيفرلىق كومەكشى بالانىڭ كۇن ءتارتىبىن قالىپتاستىرىپ قانا قويماي, ونىڭ پسيحولوگيالىق جاي-كۇيىن دە نازاردا ۇستايدى. ەڭ باستىسى, «BalaTime» – قازاقتىلدى كونتەنتتى دامىتۋدى كوزدەيتىن ساناۋلى جوبانىڭ ءبىرى. ونىڭ ينتەرفەيسى دە, مازمۇنى دا انا تىلىمىزدە. ۇلتتىق رۋحتى جاڭا تەحنولوگيامەن ۇندەستىرىپ, بالانىڭ كۇنىن پايدالى ءارى ءتارتىپتى وتكىزۋگە باعىتتالعان «BalaTime» – XXI عاسىردىڭ سانالى ۇرپاعىن تاربيەلەۋدەگى تاماشا قۇرال.
«كيبەر تۇمار»
بالاعا تۇمار تاققان جۇرتپىز. بىراق بۇگىنگى عاسىردا تۇمار تەك مويىنعا تاعىلاتىن كوزمونشاق ەمەس, تسيفرلىق الەمدە قورعان بولاتىن تسيفرلىق جوبا. ينتەرنەت كۇن ساناپ بالالاردىڭ كۇندەلىكتى ءومىرىنىڭ اجىراماس بولىگىنە اينالىپ كەلەدى. يۋنيسەف ۇسىنعان دەرەكتەرگە سۇيەنسەك, بالالاردىڭ ينتەرنەتتى قولدانۋ جاسى جىل وتكەن سايىن كىشىرەيىپ بارادى. بالانىڭ قيالىن وياتار, شىعارماشىلىعىن ۇشتار مۇمكىندىك مول بولعانىمەن, ينتەرنەت ولاردى قاۋىپ-قاتەرمەن بەتپە-بەت قالدىرىپ وتىر. اسىرەسە قىز بالالار ءجيى كيبەربۋللينگ قۇربانىنا اينالادى. وسى سىن-قاتەرگە توسقاۋىل بولۋ ءۇشىن يۋنيسەف-ءتىڭ قازاقستانداعى وكىلدىگى ەۋروپالىق وداقپەن, وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتىمەن جانە Peremena.media پلاتفورماسىمەن بىرلەسە وتىرىپ, «كيبەر تۇمار» اتتى ماڭىزدى جوبانى ىسكە قوستى. بۇل – بالالارعا تسيفرلىق قاۋىپسىزدىك مادەنيەتىن ۇيرەتەتىن پلاتفورما. ماقسات – تسيفرلىق ساۋاتتى ۇرپاق تاربيەلەۋ.