«دياديا ۆانيا» تەلەگرام-ارناسى وتاندىق تەننيسشىلەردىڭ بيىلعى تابىسىن جاريا ەتتى. ەڭ كوپ ولجاعا كەنەلگەن – ەلەنا رىباكينا. بۇل كۇندەرى WTA تىزىمىندە 12-ورىندا تۇرعان وتانداسىمىز جىل باسىنان بەرى 1 200 000 دوللار كولەمىندە پايدا تاپتى. ەكىنشى ورىندا – يۋليا پۋتينتسەۆا. ەلىمىزدىڭ ەكىنشى راكەتكاسىنىڭ تابىسى – 503 مىڭ دوللار. ۇزدىك ۇشتىكتى الەكساندر شەۆچەنكو تۇيىندەدى – 459 مىڭ دوللار. ودان كەيىنگى ساتىلارعا الەكساندر بۋبليك (339 مىڭ دوللار), اننا دانيلينا (120 مىڭ دوللار), ميحايل كۋكۋشكين (104 مىڭ دوللار), دميتري پوپكو (80 مىڭ دوللار), تيموفەي سكاتوۆ (48 مىڭ دوللار), دەنيس ەۆسەەۆ (36 مىڭ دوللار), بەيبىت جۇقاەۆ (32 مىڭ دوللار) جايعاستى.
«الاش پرايد» پروموۋشەنىنىڭ مۇرىندىق بولۋىمەن 27 مامىردا استانادا جالاۋى جەلبىرەيتىن ءدۇبىرلى جارىستا قازاقتىڭ ايگىلى ارالاس جەكپە-جەك شەبەرى, كەزىندەگى «ONE Championship» ۇيىمىنىڭ التىن بەلبەۋ يەگەرى قايرات احمەتوۆ (24-3) جەڭىل سالماقتاعى UFC-ءدىڭ ەكس-چەمپيونى, امەريكالىق الدجامەين ستەرلينگپەن كۇش سىناسادى. قوس ساڭلاق گرەپپلينگتىڭ ەرەجەسى بويىنشا ايقاسادى.
سپورتتىق گيمناستيكادان سلوۆەنيانىڭ كوپەر قالاسىندا وتكەن «Challenge Cup» تۋرنيرىندە دياس تويشىبەك (14,033 ۇپاي) «ات» جاتتىعۋىندا الدىنا جان سالماي, التىن تۇعىرعا كوتەرىلدى. كۇمىس مەدالدى قازاقتىڭ تاعى ءبىر دارىندى ۇلى زەينوللا ىدىرىسوۆ (13,866 ۇپاي) ەنشىلەسە, البانيالىق ماتۆەي پەتروۆ (13,200 ۇپاي) قولاعا قول سوزدى.
قىتايدىڭ تسزيانشان قالاسىندا اۋىر اتلەتيكادان ەرلەر مەن ايەلدەر اراسىنداعى ازيا چەمپيوناتى اياقتالدى. جارىستا ەلىمىزدىڭ قۇراماسى تىم ناشار ونەر كورسەتتى. 15 زىلتەمىرشىنىڭ تەك ەكەۋى عانا جەڭىس تۇعىرىنا كوتەرىلدى. 73 كگ سالماق دارەجەسىندەگى پيوتر حرەبتوۆ قولا مەدال, 102 كگ سالماقتاعى ارتيوم انتروپوۆ كۇمىس جۇلدە ەنشىلەدى.
حالىقارالىق اۋىر اتلەتيكا فەدەراتسياسىنىڭ رەسمي سايتىندا الداعى كەزدە ەرلەر مەن ايەلدەر اراسىنداعى ازيا چەمپيوناتتارى قاي جەرلەردە وتەتىنى جاريا ەتىلدى. سونىمەن 2026 جىلعى سارى قۇرلىقتىڭ باستى دوداسىن ءۇندىستاننىڭ گانديناگار قالاسى قابىلدايدى. 2027 جىلعى جارىس وڭتۇستىك كورەيانىڭ چونجۋ شاھارىندا ۇيىمداستىرىلادى.
فۋتبولدان قازاقستان پرەمەر-ليگاسىنىڭ توعىزىنشى تۋرى اياقتالدى. ماتچتاردا مىناداي ناتيجەلەر تىركەلدى: «وقجەتپەس» – «اقتوبە» 1:3, «اتىراۋ» – «جەتىسۋ» 1:1, «ەلىماي» – «قايرات» – 1:0, « ۇلىتاۋ» – «استانا» 0:2, «جەڭىس» – «قىزىلجار» 0:0, «قايسار» – «تۇران» – 1:0. «توبىل» مەن «ورداباسى» اراسىنداعى كەزدەسۋ اۋا رايىنىڭ قولايسىزدىعىنا بايلانىستى كەيىنگە شەگەرىلدى. تۋرنير كەستەسىندە قورجىنىندا 25 ۇپايى بار «اقتوبە» كوش باستاپ تۇر. ەكىنشى ورىنداعى «قايراتتىڭ» ولاردان ەكى ۇپايى كەم. ءۇشىنشى ساتىعا 21 ۇپايمەن «استانا» جايعاستى.