يتاليانىڭ تۋرين قالاسىندا الەكساندر بۋبليكتىڭ جۇلدىزى جاندى. «چەللەندجەر» ساناتىنداعى دودادا ەلىمىزدىڭ ءبىرىنشى راكەتكاسى قارسىلاس شاق كەلتىرمەدى. جۇلدە قورى 227 270 ەۋرونى قۇراعان جارىستىڭ باستاپقى باسەكەلەرىندە بارلىق قارسىلاستارىن ەش قينالماي ۇتقان جەرلەسىمىز شيرەك فينالدا الەمدىك رەيتينگتە 51-ورىندا تۇرعان ارگەنتينالىق توماس مارتين ەتچەۆاريمەن كۇش سىناستى. 25 جاستاعى وڭتۇستىك امەريكانىڭ وعىلانى وسىدان ەكى جىل بۇرىن رولان گارروستىڭ شيرەك فينالىنا دەيىن جەتىپ, ۇزدىكتەر تىزىمىندە 27-ورىنعا دەيىن كوتەرىلدى. 2 ساعات 04 مينۋتقا سوزىلعان سايىس 6:2, 3:6, 7:5 ەسەبىمەن بۋبليكتىڭ پايداسىنا شەشىلدى. جارتىلاي فينالدا الەكساندر اتر رەيتينگىندە 71-ساتىدا تۇرعان گەرمانيالىق دانيەل التمايەردەن ايلاسىن اسىردى – 6:2, 6:4. فينالدا قىتايلىق بۋ يۋدەن (73) باسىم ءتۇستى – 6:3, 6:3.
ەكى جىلعا سوزىلعان ۇزىلىستەن كەيىن كورتقا قايتا ورالعان زارينا دياس تا ءوز جانكۇيەرلەرىن قۋانتتى. ول جاپونيانىڭ كۋرۋمە قالاسىندا جالاۋى جەلبىرەگەن ITF W50 تۋرنيرىندە الدىنا جان سالمادى. العاشقى اينالىمداردا جەرگىلىكتى ويىنشىلاردى ۇتقان جەرلەسىمىز جارتىلاي فينالدا قىتايلىق مەيلين ۆاندى قاپى قالدىردى – 6:3, 3:6, 7:5. فينالدا جاپونيالىق ايانو شيميتسۋگە شاڭ قاپتىردى – 6:4, 6:3.
ەلىمىزدىڭ ەكىنشى راكەتكاسى يۋليا پۋتينتسەۆا فرانتسيانىڭ ستراسبۋرگىندەگى ءتۋرنيردىڭ تۇساۋكەسەر كەزدەسۋىندە سلوۆاكيالىق رەبەككا شرامكوۆاعا ەش قايرات كورسەتە المادى – 0:6, 4:6. جارىستا پۋتينتسەۆادان بولەك ەلەنا رىباكينا دا ونەر كورسەتەدى. ول العاشقى اينالىمدا بوس بولدى. ەكىنشى كەزەڭدە ءبىرىنشى ويىنىندا گەرمانيالىق ەۆا ءليستى جەڭگەن قىتايلىق ۆان سينيۋيمەن شەبەرلىك بايقاسادى.