«اتامەكەن» ۇلتتىق كاسىپكەرلەر پالاتاسىنىڭ بۇرىنعى توراعاسى, الاياقتىق ءۇشىن سوتتالعان ابىلاي مىرزاحمەتوۆ شارتتى تۇردە مەرزىمىنەن بۇرىن بوساپ شىعۋ تۋرالى ءوتىنىش ءبىلدىردى, دەپ حابارلايدى Egemen.kz پاۆلودار وبلىستىق سوتىنىڭ ءباسپاسوز قىزمەتىنە سىلتەمە جاساپ.
ابىلاي مىرزاحمەتوۆ پاۆلودار وبلىسىنداعى 46-قىلمىستىق-تۇزەۋ مەكەمەسىندە جازاسىن وتەپ جاتىر. جاقىندا باس پروكۋراتۋرا وسى مەكەمەدە تۇسىرىلگەن ۆيدەونى جاريالاعان بولاتىن. بەينەجازبادا تۇزەۋ مەكەمەسىندە بيگ-بەگ قاپتارىن وندىرەتىن شاعىن ءوندىرىس ىسكە قوسىلعانى كورسەتىلگەن. قاجەتتى جابدىقتار مەن جۇمىس ورىندارىن كاسىپكەرلەر قامتاماسىز ەتكەن.
باس پروكۋراتۋرانىڭ مالىمەتىنشە, ەڭبەكپەن تاربيەلەۋ ساياساتى اياسىندا كوپ سوتتالعاندار جۇمىسقا ورنالاسىپ جاتىر. ابىلاي مىرزاحمەتوۆ تە وسى باستامانىڭ بەل ورتاسىندا ءجۇر. ول ءوز قاراجاتىنا بىرنەشە تىگىن ماشيناسىن ساتىپ الىپ, باسقا سوتتالعاندارمەن بىرگە قاپ تىگۋ ىسىمەن اينالىسىپ جاتىر. ەڭبەكاقىسىنان بولەك, سىياقى جانە بونۋس جۇيەسى دە قاراستىرىلعان.
ەسكە سالايىق, ابىلاي مىرزاحمەتوۆ اسا ءىرى كولەمدە الاياقتىق جاسادى جانە كاسىپكەردى تۋىسىن قىلمىستىق جاۋاپكەرشىلىكتەن بوساتۋ ءۇشىن پارا بەرۋگە يتەرمەلەدى دەگەن كۇدىكپەن ۇستالىپ, 2024 جىلدىڭ مامىرىندا 5 جىلعا باس بوستاندىعىنان ايىرىلعان بولاتىن.
بيىل قاڭتاردا ول قالعان جازاسىن بوستاندىقتى شەكتەۋ تۇرىندەگى جازاعا اۋىستىرۋدى سۇراپ, سوتقا ءوتىنىش بىلدىرگەن. الايدا سوت بۇل ءوتىنىشتى قاناعاتتاندىرمادى. سەبەبى, جازاسىن وتەۋ بارىسىندا ونىڭ تەك ءبىر رەت قانا ىنتالاندىرىلعانى جانە بۇل ونىڭ نەگىزگى مىندەتى ەكەنى ايتىلعان.