سىبايلاس جەمقورلىق جايلاعان سالانىڭ ءبىرى ءبىلىم سالاسى ەكەنى جاسىرىن ەمەس. سوندىقتان ونىمەن كۇرەس قوعامنىڭ باستى مىندەتى. مەملەكەت ءبىلىم سالاسىنداعى سىبايلاس جەمقورلىقپەن كۇرەسىپ-اق ءجۇر.
بىراق قوعام دەرتىن جويۋ ءۇشىن ەلدىڭ ءاربىر ازاماتى بىرلەسىپ وسى كەسەلمەن كۇرەسۋگە كۇش بىرىكتىرۋى قاجەت. وسى ورايدا رەسپۋبليكانىڭ ءۇشىنشى مەگاپوليسىندە اتالعان ماسەلەنى كۇن تارتىبىنە شىعارىپ ۇلكەن تالقىلاۋعا سالعان ماڭىزدى جيىن بولدى. ول شىمكەنتتەگى ح.دۋلاتي اتىنداعى №8 مەكتەپ-گيمنازياسىندا وتكىزىلدى. جيىندا كوتەرىلگەن ماسەلە ءبىلىم بەرۋ جۇيەسىندەگى سىبايلاس جەمقورلىق تاۋەكەلدەرىن انىقتاۋ جانە ونىڭ الدىن الۋ تاقىرىبىنا ارنالدى. قوعامدا وزەكتى بولعان بۇل باسقوسۋدا ساراپشىلار, ماماندار ءبىلىم بەرۋ سالاسىنداعى قۇقىق بۇزۋشىلىقتار مەن ولاردىڭ سەبەپ-سالدارى جونىندە كەڭ اۋقىمدى تالقىلاۋ ۇيىمداستىردى.
اتالعان ءىس-شاراعا شىمكەنت قالاسى اكىمىنىڭ ورىنباسارى سارسەن قۇرانبەك پەن رەسپۋبليكالىق سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتىنىڭ باسشىسى قانات سۇلەيمەنوۆ قاتىستى. سونىمەن بىرگە باسقوسۋعا 300-گە جۋىق مەكتەپ, بالاباقشا, كوللەدج جانە قوسىمشا ءبىلىم بەرۋ ۇيىمدارىنىڭ باسشىلارى شاقىرىلدى.كەزدەسۋ بارىسىندا ءبىلىم بەرۋ سالاسىنداعى قارجىلىق قۇقىقبۇزۋشىلىقتار, ولاردىڭ قوعامعا تيگىزەر كەرى اسەرى جونىندە كەڭىنەن اڭگىمە قوزعالدى.
جيىندا ءسوز العان شىمكەنت قالاسى ءبىلىم باسقارماسىنىڭ باسشىسى گۇلناز سۇلەيمەنوۆا ءبىلىم بەرۋ سالاسىندا كوپشىلىكتى تولعاندىرعان وزەكتى ماسەلەلەردى قوزعادى. ونىڭ ىشىندە ءبىرىنشى كەزەكتە سىبايلاس جەمقورلىق قىلمىسىن اتاپ ءوتتى. شىمكەنتتىڭ باس پەداگوگى سونداي-اق ءوز بايانداماسىندا بارلىق ءبىلىم بەرۋ ۇيىمدارىنىڭ باسشىلارى قارجىلىق ءتارتىپتى ساقتاۋ كەرەكتىگىن, پاراقورلىقپەن كۇرەستىڭ ءتيىمدى جولدارىنىڭ ءبىرى مولدىرلىك پەن اشىقتىقتى قامتاماسىز ەتۋ ەكەنىن ەسكە سالدى. سونىمەن بىرگە ءبىلىم سالاسىندا جەمقورلىققا اكەپ سوقتىراتىن جاعداياتتاردى ءتىزىپ اتاپ, ولاردى بولدىرماۋدىڭ جولدارىن ۇسىندى.
ال سىبايلاس جەمقورلىققا قارسى كۇرەس قىزمەتى وكىلدەرىنىڭ سوزىنشە انتيكوردىڭ وسى سالادا ءبىراز قىلمىستاردىڭ بەتىن اشىپ دەرەكتەردى انىقتاعان. ماسەلەن ونىڭ ىشىندە كەيبىر ءبىلىم بەرۋ مەكەمەلەرىندە بيۋدجەت قاراجاتىن ماقساتسىز پايدالانۋ, ونىڭ ىشىندە جۇمىس ىستەمەيتىن تۇلعالارعا جالاقى تولەۋ جانە جەكەلەگەن قىزمەتكەرلەردىڭ ەڭبەكاقىسىن زاڭسىز ارتتىرۋ فاكتىلەرى بار. وسى ءتارىزدى قۇقىقبۇزۋشىلىقتاردىڭ الدىن الۋ ماقساتىندا شىمكەنت قالاسى اكىمدىگى مەن سىبايلاس جەمقورلىققا قارسى قىزمەت بىرلەسكەن ءىس-قيمىل جوسپارىن ازىرلەپ, ونى ءبىرازدان بەرى جۇزەگە اسىرۋ ۇستىندە.
جوعارىدا ايتقانىمىزداي ءبىلىم سالاسى جىل سايىن قۇقىق قورعاۋ ورگاندارىنىڭ نازارىنا ىلىگىپ وتىرادى. ايتالىق وسىدان ەكى جىل بۇرىن سوت ۇكىمىمەن قالالىق ءبىلىم باسقارماسىندا قىزمەت ىستەگەن 2 ازامات سىبايلاس جەمقورلىق قىلمىسى بويىنشا سوتتالعان. ولاردىڭ جەكەمەنشىك مەكتەپكە دەيىنگى مەكەمەلەردى تەكسەرمەگەنى ءۇشىن 100-500 مىڭ تەڭگەگە دەيىنگى سومادا ديرەكتورلاردان پارا الىپ كەلگەنى بەلگىلى بولدى. سونىمەن بىرگە وتكەن جىلى قالاداعى مەكتەپتەردىڭ ءبىرىنىڭ ەسەپشىسى الاياقتىق جولمەن اقشا جىمقىرىپ مەملەكەتكە 64 ملن تەڭگە كولەمىندە شىعىن اكەلگەن. ونىڭ دا قىلمىسى تولىق دالەلدەنىپ, سوت ۇكىمىمەن 8 جىلعا باس بوستاندىعىنان ايىرىلدى.
شىمكەنت