كەشە نايزاعايداي نامىستى جىرلارىمەن وقىرمان كوكىرەگىنە وت جاققان شايىرىن قازاق جۇرتى جەر بەسىككە ارۋلاپ قويدى. الاتاۋ عانا ما كۇڭىرەنگەن؟ الماتى اڭىراسا, تۇركىستان قابىرعاسىنان قاۋساعانداي, اتىراۋ مەن التاي اراسى قايعىرىپ, ارقا مەن جەتىسۋ جۇرتى ازا تۇتىپ, اقىنىن جوقتاپ قالدى. مەملەكەتتىك سىيلىقتىڭ لاۋرەاتى, قازاقستاننىڭ حالىق جازۋشىسى, اقىن تەمىرحان مەدەتبەكتىڭ دۇنيەدەن وتكەنى ۇلت رۋحانياتىنىڭ ورنى تولماس قازاسىنا اينالدى.
تەمىرحان اقىن تۋرالى تەبىرەنبەي سويلەمەۋ مۇمكىن ەمەس. ەسىمى اتالسا, كوك تۇرىكتەر سارىنى بىرگە ويانادى. اتتان ءتۇسىپ قالعانداي قازاق بالاسىنا كۇن تۇبىنەن كوك تۇرىكتەر رۋحىن الا كەلگەن شايىر تاۋەلسىزدىك تاڭى اتقانىن ۇلت پوەزياسىندا تەگەۋرىندى جىرلارى ارقىلى تانىتتى. ءسوز تانىعاندار تونىكوك پەن تەمىرحان ەگىز دەپ جازدى. اقىن تاۋەلسىزدىك جىلدارىنىڭ باسىندا «كوك تۇرىكتەر سارىنى» جىرلارىن تۋدىرعانعا دەيىن دە قازاق ولەڭىنىڭ شوقتىعى بيىك وكىلى رەتىندە باعالاندى. ولەڭ ولكەسىنە وقشاۋ بىتكەن جارتاستاي وردالى رۋح كوتەرىپ كىرگەن وعلان «جۇمىس كيىمىن» جامىلىپ, «ۇستا دۇكەنىندە» كورىكتە بالقىعان تەمىردى ءتوس ۇستىندە نايزاعايداي اۋناقشىتىپ, قالاي بولسىن سولاي يگەنى جىرسۇيەر قاۋىم جادىندا. «جانىمنىڭ جاپىراقتارى» اتتى العاشقى جيناعىنان باستاپ ولە-ولگەنشە قازاق رۋحىنا قىزمەت ەتكەن رۋح جارشىسى حالىق جازۋشىسىنا اينالعانى تەكتەن تەك ەمەس.
1945 جىلى تۇركىستان وبلىسىندا تۋعان اقىن شەرحان مۇرتازا باسشىلىق ەتكەن تۇستا «ەگەمەن قازاقستان» گازەتىنىڭ ماڭعىستاۋ وبلىسىنداعى ءتىلشىسى قىزمەتىن اتقارىپ, نامىسقا سۋارىلعان جىرلارى ارقىلى ۇلتتىق رۋحتىڭ الاۋىن جاقتى. «ساپار الدىندا», «الىس شاقىرىمدار», «مارتەبە», «اۋەدەگى تولقىندار», «داۋىس», «كوگەرشىن قاۋىرسىندارى», «اڭقا كەپتىرگەن اڭىزاق», «سىرىم بار ساعان ايتاتىن», «تاعدىرلى جىلدار جىرلارى», «كوك تۇرىكتەر سارىنى», ءىىى تومدىق «تاڭدامالى جىر جيناعى» سەكىلدى جىر جيناقتارىنىڭ, «مەنىڭ ابايىم», «بابا ءداستۇردىڭ مۇراگەرى كىم؟», «سەگىز قىرلى سەكسەن سىرلى الەم بۇل» اتتى سىن كىتاپتارى, «تولعاۋى توقسان دۇنيە» اتتى پۋبليتسيستيكالىق وي-تولعاۋلار مەن ەسسەلەر كىتابىنىڭ اۆتورى قازاق حالقىمەن ماڭگى جاساي بەرەرى ءسوزسىز.
«Egemen Qazaqstan» قالامگەرلەرى